Аҟәа. Абҵарамза 27, 2023 шықәса. Аԥсныпресс. Абҵарамза 24 -25 рзы ақалақь Ростов-на-Дону аҿы 10-17; 18+ ақәратә категориа иаҵанакуа аспортсменцәа рыбжьара карате кекусинкаи (IFK) кумите азы Аладатәи Афедералтә Округи Нхыҵкавказтәи Афедералтә Округи  Аԥхьахәгареи 6-7; 8-9 шықәса зхыҵуа аспортсменцәа рыбжьара  карате кекусинкаи (IFK) кумите азы афестивали мҩаԥсуан.

Аԥхьахәгара рхы аладырхәит 350-ҩык акаратистцәа, афестиваль  –  140-ҩык Аԥсны, Астрахан, Волгоградтәи Ростовтәи абластқәеи Краснодартәи атәылаҿацә, Ҟарачы-Черкесстәи Ареспублика, Ҟабарда-Балкариатәи Ареспублика,  Ареспублика Ҟрым рҟынтәи аспортменцәа .

«Афестиваль аҿы ҳаспортсменцәа  Аԥсны Ареспублика ахьӡала иқәгылон, аԥхьахәгара аҿы - Ростовтәи аобласть ахьӡала, избан акәзар, аԥхьахәгара аҩныҵҟатәи акәны иҟан», – ҳәа иазгәеиҭеит Аԥсны зҽаԥсазтәыз азыҟаҵаҩ, Аресаублика Аԥсны карате кекусинкаи Афедерациа апрезидент  Витали Ҷыҭанаа.

Афестиваль аихшьаалақәа рыла, аԥснытәи аспортменцәа актәи аҭыԥқәа ҩба, аҩбатәи аҭыԥқәа хԥа, ахԥатәи аҭыԥқәа хԥа ааныркылеит.

Актәи аҭыԥқәа ааныркылеит Русҭам Ратиа (Агәыӡера аҳабла), Сандро Џьаӷмазиа (ақ. Очамчыра).

Араӡны медалқәа роуит Леон Џьынџьал (ақ.Аҟәа), Кира Заболотнаиа (Агәыӡера аҳабла), Левон Ходџьикиан (Агәыӡера аҳабла).

Ахԥатәи аҭыԥқәа ааныркылеит Леонель Дунамалиан (Агәыӡера аҳабла), Елизавета Барсукова (Агәыӡера аҳабла), иара убас Викториа Кондакчиан (Агәыӡера аҳабла).

Аладатәи Афедералтә Округи Нхыҵ-Кавказтәи Афедералтә Округи Аԥхьахәгара аихшьаалақәа рыла аԥснытәи аспортсменцәа атәи аҭыԥқәа хԥа, аҩбатәи аҭыԥқа ԥшьба, ахԥатәи аҭыԥқәа хәба ааныркылеит.

Аҟәа. Абҵарамза 27, 2023 шықәса. Аԥсныпресс. Белоруссиа  аҳҭнықалақь Минск аҿы имҩаԥысит хынттәи Олимпиатә чемпион Алеқсандр Уасил-иԥа Медведь зхы иақәиҭу аиқәԥара азы Гран-при 52-тәи Жәларбжьаратәи атурнир. Уи рхы аладырхәит ҩыџьа аԥснытәи аспортсменцәа: Аԥсны ахьӡала иқәгылоз Асланбек Гәарамиа (86 кь), Данил Харчлаа (65 кь), Урыстәыла ахьӡала иқәгылоз.

Аҟәа. Абҵарамза 24, 2023 шықәса. Аԥсныпресс. Аԥсны адәныҟатәи аусқәа рминистр Инал Арӡынба Урыстәыла иҟоу Шьамтәыла ацҳаражәҳәаҩ Башар Џьаафари диԥылеит, ҳәа адырра ҟанаҵоит Аԥсны адәныҟатәи аусқәа Рминистрра Амедиацентр.

Аиԥылара мҩаԥысит Москва ақалақь иҟоу Шьамтәыла Ацҳаражәҳәарҭа аҟны.

Аганқәа аполитикатә, ахәаахәҭра-економикатә, агуманитартә усхкқәа рҿы аԥсуа-шьамтәылатәи жәларбжьаратәи аусеицура иадҳәалоу актуалра злоу азҵаарақәа жәпакы ирылацәажәеит.   

Аҟәа. Абҵарамза 24, 2023. Апсныпресс. Аԥсны Аҳәынҭқарра Актәи Ахада ихьӡ зхоу Агәыҳалалратә Фонд апроект «Редкие книги об Абхазии» аус адулара еиҿнакаауеит. Ааигәа иҭыҵит актәи аҭыжьымҭа. Уи иалалеит аиҳарак Гагра ақалақь иазку, Урыстәылатәи аимпериа аҿы ареволиуциа ҟалаанӡа иҭыжьыз аброшиурақәеи жә-шәҟәыки.

Иарбоу апроект иалагалоуп шамахамзар џьара ирзымдыруа, уаанӡа иҭыжьымыз, аҭоурыхҭҵааҩцәа реиԥш хыԥхьаӡара рацәала аԥхьаҩцәеи рзы аинтерес зҵоу ашәҟәқәа.   

Аҟәа. Абҵарамза 27, 2023 шықәса. Аԥсныпресс. Гагра араион ахада Иури Ҳагәышь Гагра ақалақь акоммуналтә маҵзурақәа рхаҭарнакцәеи Гагра араион ақыҭақәа рхадацәеи алархәны Гагра араион аҿы иҟалаз амшцәгьа инамаданы аҷыдалкаатә еилатәара мҩаԥигеит.

Иаха инаркны ақалақь акоммуналтә маҵзурақәа зегьы, Иҷыдоу аҭагылазаашьақәа рзы Аминистрра Гагра араион ала Аиқәырхара-ԥшааратә отриад, Гагра араион аҩныҵҟатәи аусқәа Русбарҭа, ирӷәӷәоу арежим ала аусурахь ииаган.  Аԥыԥшратә бригадақәа зегьы аҵых шаанӡа амҩақәа ирнаҳалаз аԥша иканажьыз аҵлақәа рҟынтәи идрыцқьон, ҳәа адырра ҟанаҵоит Гагра ақалақь Ахадаара апресс-маҵзура.

Аҟәа. Абҵарамза 27, 2023 шықәса. Аԥсныпресс. Абҵарамза 26-27 ауха Амшын Еиқәа ацәқәырԥара дууи амшцәгьеи иахҟьаны, аԥшаҳәа иахьаҵанакуа, аиҳарак Ҟрыми Краснодартәи атәылаҿацәи ааха роуит, Адлер - Хәасҭа рыбжьара аихамҩақәа рҿы афымца ыцәеит, аҵлақәа аихамҩа ианаҳалеит. Иара убас Лазаревскаиа астанциаҿы аихамҩа аӡы иқәнаӡӡәааит. Амшцәгьа Аԥснынӡагьы иааит, аха иҟоу адыррақәа рыла аихамҩа аҿы аҭагылазаашьа уажәазы иҭышәынтәалоуп, уи ааха амоуӡеит, ҳәа адырра ҟанаҵоит Ареспубликатә Унитартә Наплакы «Аԥсны Аихамҩа».

Иӷәӷәоу быжьбалк рҟынӡа инаӡо амшынеисра ҟалеит Гагра ақалақь акваториа иахьаҵанакуа. Уи амшын аԥшаҳәа иаҵанакуа аинфраструктура, ӷәала ааха анаҭеит.

Аҟәа. Абҵарамза 27, 2023 шықәса. Аԥсныпресс.  Гагра араион   афымцаҳа макьаназы амашәыр зхылҿиааша аҭагылазаашьа амоуп.

Пицунда ақалақьи Алаҳӡы аҳаблеи рҿы звольҳараку цәаҳәак-цәаҳәак аҿыхуп, ҳәа адырра ҟанаҵоит Ареспубликатә Унитартә Наплакы «Амшынеиқәафымцамч».

Бзыԥ аҳабла аҿы афымцала аиқәыршәара инагӡаны еиҭашьақәыргылоуп.

Гагра араион ахәҭак амшцәгьа иахҟьаны лашарада иаанхеит. Убас, Гагра ақалақь аҿы аҩнқәа рыгәраҵақәа аӡы ахьрыҵалаз иахҟьаны фымцалашарада иаанханы иҟоуп Абазгаа рымҩала игылоу аҩнеихагылақәа.   

«Афымцала аиқәыршәара аиҭашьақәыргылара иазку аусурақәа  ирылагоит аӡы анцалак ашьҭахь Аха макьаназы аԥсабаратә ҭагылазаашьа шыуадаҩу иаанхоит, акырџьара аӡы анеира иаҿуп.

Аҟәа. Абҵарамза 24, 2023 шықәса. Аԥсныпресс. Очамчыра араион ахада Беслан Бигәаа ҳазҭоу 2023-тәи ашықәс, жәымз ирылагӡаны имҩаԥгаз аусуразы аҳасабырба ҟаиҵеит, ҳәа адырра ҟанаҵоит Telegram-канал «Очамчыра-информ».

«Ииасуа ашықәс аҿы зегьы реиҳа ихадоу проблеманы иҟоу акамшьиа акра иадҳәалоу асезон иахәҭоу аҩаӡараҿы иахьзыиамсыз ауп. Уи иахҟьаны, Очамчыра араион абиуџьет аҿы 80 миллион мааҭ инарзынаԥшуа азымхара шьақәгылеит»,  –  ҳәа иазгәеиҭеит Очамчыра Администрациа ахада.

Иааизакны, ахырхарҭақәа зегьы рыла арбагақәа реиӷьтәра шыҟоу умбар залшо. Ақалақь аиқәыршәазаара иазку аусурақәа мҩаԥысуеит, акоммуналтә маҵзурақәа рҭаххрақәа рзы иҷыдоу атехника аахәара алыршоуп.

Аҟәа. Абҵарамза 24, 2023 шықәса. Аԥсныпресс. Аԥсны аҳәынҭқарратә ҳазылхратә Еилакы  апресс-маҵзура иҟанаҵо адыррақәа рыла, ҳазҭоу ашықәс, абҵарамза 29, асааҭ 06:00 инаркны 22:00 сааҭ рҟынӡа Шәача ақалақь аҿы амашьынақәа рныҟәара аԥкрақәа алагалахоит.  

Иарбоу аԥкрақәа хә-тоннаки уи инареиҳаны шьҭызхуа аидарамҩангага машьына дуқәа роуп изыдҳәалахо. Уахь иаҵанакуеит иара убас Аԥснынтәи Урыстәылатәи Афедерациахь ицо амашьына дуқәагьы. Аҳәынҭқарратә ҳазылхратә Еилакы «хыхь иарбоу аԥрақәа амашьыналасқәеи Ареспублика Аԥсны аҳәынҭқарратә ҳәаа иахысуа хазхаҭалатәи ахаҿқәа аҵанакӡом» ҳәа адырра ҟанаҵоит.

«Убри инамаданы, заанаҵы шәныҟәарақәа рмаршрутқәеи раамҭеи азԥхьагәашәҭаларц азы аҳәара ҟаҳҵоит», - ҳәа иазгәаҭоуп аҳәынҭқарратә ҳазылхзратә Еилакы иҟанаҵо адырраҭара аҿы.

Аҟәа. Абҵарамза 27, 2023. Апсныпресс. Иӷәӷәоу быжьбалк рҟынӡа инаӡоз амшынеисра ҟалеит Гагра ақалақь акваториа иахьаҵанакуа.

Амшын аԥшаҳәа иаҵанакуа аинфраструктура, ахатәы ҩнқәа ӷәала ааха роуит.  Амшын ацәқәырԥара иахҟьаны  аӡхагаларатә станциақәеи атрасформатортә станцеиҵақәеи аӡымҩангага хадеи аӡы рыҵалеит.

Гагра ақалақь Аиқәырхара-ԥшааратә Отриад аԥсеиқәырхаҩцәа иҟалаз амшцәҟьа ахҟьаԥҟьақа рықәгара иаҿуп. Ԥыҭҩык ауаа аӡы зҵалаз аҭыԥқәа рҟынтәи ревакуациа мҩаԥгахеит.

Иҟалаз аԥсабаратә цәырҵра бааԥсы иахҟьаны хәҭакахьала Аҟәа ақалақь аҿы ахатәы ҩнқәак ааха роуит. Ҩыџьа ауаа аӡы зҵалаз аҭыԥқәа рҟынтәи ревакуациа мҩаԥгахеит. Аҳҭнықалақь аҿгьы аԥсеиқәырхаҩцәа иҟалаз амшцәгьа ахҟьаԥҟьақәа рықәгара иазку аусмҩаԥгатәқәа нарыгӡоит, ҳәа адырра ҟанаҵоит Иҷыдоу аҭагылазаашьақәа рзы Аминистрра апресс-маҵзура.