Ажәытә ҵасла ақыҭаҿы инхо, ҳаҭыр-пату зқәу абырг иоуп аныҳәара амҩаԥгара знапы ианырҵо. Уажәазы аныҳәара мҩаԥигон Амиран Џьопуа. 

Аныҳәаҩ, амрагыларахь ихы рханы, иарма напаҿы ашьтәа агәи-агәаҵәеи зхоу  араса амахә кны, иарӷьа напаҿы аԥсуа ҩы зҭоу аҵәца кны аныҳәара далагоит.

Аныҳәаҩ иажәа ҳәаны данаалгалак ашьҭахь ику аҵәца иҭоу аҩы ижәуеит ашьтәа агәи- агәаҵәеи ргьама ибоит.

Уи аамышьҭахь еизаз зегьы иара еиԥшҵәҟьа агәи-агәаҵәеи ргьама рбоит. Аԥсуаа ихарҵоит ашьтәа агәи-агәаҵәеи ргьама убар, усҟан Анцәа иахь ухы рханы узаҳәаз зегьы ҟалоит ҳәа.

Анаҩс, аныҳәа агәырӷьачарала иацҵахоит.

Ацуныҳәа азы анкьа амилаҭтә чыс хкқәа – акәаци, абысҭеи, аҳампали, аџьыкеи рыда акгьы адрымгалозгьы, иахьа афатә хкқәа рхыԥхьаӡара иазҳаит, уимоу арыжәтәгьы нарго иалагеит.

Ари амш аҽны аисра, ацәҳара, иара ажәемакрагьы ҟалаӡом. Уи Анцәа игәамԥхо усқәоуп ҳәа иԥхьаӡоуп. 

Кәтол ақыҭан аныҳәара хыркәшаны аишәачара рнапы адыркуаны еиԥш, ақәа аура иалагеит. Уи даҽазныкгьы иҟарҵаз аныҳәара амч амоуп, ражәақәа Анцәа иҟынӡа инаӡеит ҳәа ауп иаанаго.