Аҟәа. Ԥхынгәымза 28, 2024 шықәса. Аԥсныпресс. Аԥснытәи Аиашахаҵаратә Уахәама ахада аиереи Виссарион (Аԥлиаа) Ауахәаматә Хеилак аилатәара аҿы ҩаԥхьа Аԥснытәи Аиашахаҵаратә Уахәама азинтә шьаҭа аганахьала агәҭынчымра ааирԥшит. Аилатәара аартуа иара Аԥсны аканонтә дгылара азхом ҳәа инаҵшьны иазгәеиҭеит.
«Шәааи ааԥхьарак ҟаҳҵап ҳнапхгаҩцәа рҟынӡа инеиуа, аиашахаҵаратә дин ныҟәызго зегьы рҟынӡа инеиуа … Уи ҟаҳамҵар, аиашахаҵаратә дин ныҟәызго ҳажәлар хра злам аҭаглазаашьа роур ҟалоит», - ҳәа адинмаҵзуҩцәа рахь ихы рханы иҳәеит Аиашахаҵаратә Уахәама ахада.
Аигумен Игнати (Киут) – Каман ақыҭан игылоу аԥшьаҩыцқьа Иоанн Ахьҿы ихьӡ зху аберҭыԥ аиҳабы – Аԥсны Аиашахаҵаратә Уахәамеи Урыстәыла Аиашахаҵаратә Уахәамеи аимадара ӷәӷәа рыбжьоуп ҳәа инаҵшьны иазгәеиҭеит.
«Ҳара аԥшьаҩцәас ҳҟалон, доуҳала ҳазҳауан аурыс уахәама аҿы», - ҳәа инаҵшьны иазгәеиҭеит аигумен Игнати.
Аилатәара аҿы иҟаз адинмаҵзуҩцәа зегьы еицҿакны Аԥсны ақьырсиан дин ныҟәызго ажәлар Урыстәылатәи Аиашахаҵаратә Уахәама адгылара иабзоураны рдоуҳатә ԥсҭазаара шьақәгылоит ҳәа иазгәарҭеит. Убри аан Урыстәылатәи Аиашахаҵаратә Уахәама исуверентәу аҳәынҭқарра акультура изеиԥшразаалак ақәыӷәӷәара шанамҭо, Қырҭтәылатәи Аиашахаҵаратә Уахәамеи Аԥсны Аиашахаҵаратә Уахәамеи изеиԥшразаалак еимадара ҳәа акгьы шамам инаҵшьны иҳәан.
Аилатәара ихы алаирхәит Аԥсны Аиашахаҵаратә Уахәама ахада аиереи Виссарион Аԥлиа ааԥхьара зиҭаз Аԥсны иҟоу Урыстәылатәи Афедерациа Ацҳаражәҳәаҩ Михаил Шургалин.
