Аҟәа. Ԥхынҷкәынмза 6, 2023 шықәса. Аԥсныпресс.  Ареспубликатә Унитартә Наплакы «Аҟәатәи аӡыршьҭра» иҟанаҵо адыррақәа рыла, ԥхынҷкәынмза 7 рзы Лакобеи Воронови реихысырҭаҿы, Коӷониеи Воронови, Сахарови Ардзинбеи, Гулиеи Аинрал Аршба имҩеи реихысырҭақәа рҿы, иара убас аӡхагаларатә станциа  №4 аҿы (Гәымсҭа ақыҭа) имҩаԥгахо аремонттә усурақәа ирхырҟьаны, Аҟәа араионқәак рҿы 00:00 сааҭ инаркны 18:00 рҟынӡа   аӡылаеиқәыршәара аанкылахоит ҳәа адырра ҟанаҵоит. Убас аӡылаеиқәыршәара еиԥҟьахоит абарҭ араионқәа рҿы:

Аҟәа. Ԥхынҷкәынмза 1, 2023 шықәса. Аԥсныпресс. Есышықәса ԥхынҷкәынмза 1 –Ирҳау Ауаҩы ииммунитет азымхара асиндром (СПИД) аҿагылара Жәларбжьаратәи Амш азы, Аҟәа ақалақь Ареспубликатә хәышәтәырҭа ацәажьы-венерологиатә диспансер аҿы Ауаҩы ииммунитет азымхара зырҿио авирус (ВИЧ), агепатит В, С, Ирҳау Ауаҩы ииммунитет азымхара асиндром (СПИД), ардашыкь (асифилис), уҳәа  ачымазарақәа рзы хәыда-ԥсада анализқәа раҭаразы СПИД-центр имҩаԥнаго акциа мҩаԥысуеит.

СПИД-центр аҳақьым-алаборант  Саида Палба  Аԥсныпресс акореспондент диҿцәажәо сынтәа Ацентр иарбоу акциа изҭахыз зегьы рзы амҩаԥгара алымшаӡеит, избан акәзар  цәыббамза 6 рзы иҟалаз абылра иахҟьаны амаругақәа зегьы блит ҳәа адыра ҟалҵеит. Убри иахҟьаны алшара ҳмоуӡеит Аԥсны инаскьоу араионқәа рахь ацара. Ҳхықәкы хаданы иҟоу уажәы – аиҭашьақәыргыларатә усурақәа мҩаԥганы ихыԥадатәиу амаругақәа рыдгалареи ауп.

«Ҳара излауаз ала ауааԥсыра адырра раҳҭеит уажәазы ишьақәгылаз аҭагылазаашьақәа ирыхҟьаны аҭҵаарақәа зегьы стационарла адиспансер  аҿы ишымҩаԥгахо азы.    Ари аҩыза акциақәа ҳара есышықәса имҩаԥаагоит, ареспублика араионқәа зегьы рыхьӡара ҳҽазаҳшәоит. Алабораториа 2011 шықәса раахыс аус ауеит, ари аамҭа иалагӡаны ҳара иҭаҳҵааит 10 000-ҩык ауаа инареиҳаны. Ҳара ҳзы ари даара ишьаху ҳусура арбага ауп», – ҳәа илҳәеит лара.

Саида Палба ауааԥсыра акциа радыԥхьалара азы инацҵаны аглиукоза аҩаӡара азы, аҟырҟмыџьтә уатала агармонқәа рзы анализқәа ҳгон, иара убас аспециалистцәа, иаагозар агинекологцәагьы адаҳгалон ҳәа еиҭалҳәеит.  

Лара инаҵшьны иазгәалҭеит, аҭҵаарақәа зегьы анонимтә ҟазшьа аманы ишымҩаԥысуа, насгьы ишхәыда-ԥсадоу. Ирҳау Ауаҩы ииммунитет азымхара асиндром (СПИД) шьақәырӷәӷәахазар, усҟан анаҩстәи ашьаҿа – апациент ихы инаркны ишьапаҟынӡа игәаҭареи СПИД-центр аҿы ихәаԥшреи ауп.

Саида Палба инацҵаны иазгәалҭеит даҽакгьы. Ауаҩы ииммунитет азымхара зырҿио авирус еиҳа имаҷны иаарԥшхо иалагеит зцәа зтәым аҳәса рҿы, иҟоуп аҳәса абри аҩыза адиагноз шрымоугьы аҩбатәи, ахԥатәи ахәыҷқәа роура згәаӷьуа.

Аҳақьым иазгәалҭеит, адиспансер аҿы ашәҟәы иҭагалоу апациентцәа хәыда-ԥсада иааиԥмырҟьаӡакәа иахәҭоу ахәшәқәа шроуа. Авирустә қәыӷәӷәара азы атесттә гәаҭара, аиммунатә статус СD4, абиохимиатә, аклиникатә, анализқәагьы хәыда-ԥсада имҩаԥгахоит. Ауаҩы ииммунитет азымхара зырҿио авирус чымазара злаҽу апациентцәа анализқәа рыҟаҵареи ахәшәқәеи рзы аԥара ршәаӡом. Иҟоуп апациентцәа, астационар аҿы зҽызхәышәтәуа, хәшәқәак аныҟам ҟалалоит, усҟан агәабзиарахьчара Аминистрра урҭ раахәаразы афинансқәа азоунажьуеит.

Аҟәа. Ԥхынҷкәынмза 3, 2023 шықәса. Аԥсныпресс. Назаров ақалақь (Урыстәыла, Красноиарсктәи атәылаҿацә) аҟынтәи аҟаза ашыцмҿы иџьашьатәу асахьақәа ҭаԥиҟоит. Урҭ акала «нецке» ҳәа изышьҭоу иапониатәи асахьақәа иреиԥшуп.

«Амҿыҭыԥҟаҩы аҟазара атәы здыруа инапқәа рҿы амҿы аҟәырҷаха аԥсы ахалоит, уи даара аинтерес зҵоу, уагәылазхало аԥстәы, ма ауаҩы рсахьақәа алҵуеит. Амҿыҭаԥҟаҩы, аҟаза Николаи Килин  еицыдыруа алаҟәтә персонаж Папа Карло еиԥшҵәҟьа  иуадахәыҷы-иҟазарҭа аҿы дыҩнатәаны азныказы акала улахь имааиуа амҿтәы ҟәырҷахақәа  ирылихуеит зеиӷьаҟам, иџьашьаху иперсонажкәа». – ҳәа адырра ҟанаҵоит Ателеканал «Енисей» асаит https://www.enisey.tv/news/.   

Иазгәаҭатәуп, аҟаза иперсонажқәа злихуа амаҭәахә иныҟәарақәа раан Аԥснынтәи ишааигаз.

«Ари амҿы ахкы акырӡа икьакьоуп, иара аус адулара зынӡа имариаӡам,  уи акы алухырц азы даара уҽазҵәылхны, ачҳара аарԥшны, гәадкыларала аус ууроуп. Уажәы сара ацгәы-аныҟәаҩ асахьа аҟаҵара саҿуп. Абар араҟа иара ахәдакәырша ахазаауеит, зегьы ԥшӡаны, иҭыҟҟаны, еиҿкааны иҟалоит» – ҳәа еиҭеиҳәоит аҟаза.

Аҟәа. Ԥхынҷкәынмза 3, 2023 шықәса. Аԥсныпресс. Константин Ахба абокс азы 27-тәи Жәларбжьаратәи атурнир «Янтарные перчатки» аҿы аиааира игеит, ҳәа адырра ҟанаҵоит Аԥсны аҿари аспорти рзы аҳәынҭқарратә Еилакы.

Константин Ахба 54 кьыла рҟынӡа иҟоу акапантә категориа иаҵанакуа  2008-2009 шықәсқәа рзы ииз арԥарцәа рыбжьара дықәгылон. 

Атурнир мҩаԥысуан Калининград ақалақь аҿы ԥхынҷкәынмза 1 инаркны ԥхынҷкәынмза 3 аҟынӡа. Уи рхы аладырхәит атәылақәа: Урыстәыла, Белоруссиа, Германиа рҟынтәи 108-ҩык аспортсменцәа.

Аҟәа. Ԥхынҷкәынмза 2, 2023 шықәса. Аԥсныпресс. Ԥхынҷкәынмза 9 рзы Москва ақалақь аҿы имҩаԥысуеит ахҭыс шьахә - Нара Ԥлиа Лырҿиаратә ҟазарҭа (астудиа)  аспектакль «Аԥсҭазаара – мшынуп».

Ахәаԥшцәа рҿаԥхьа иқәгылараны иҟоуп ахәыҷтәы театралтә студиа «Сара саамҭа» аҟыбаҩ злоу артист ҿарацәа. Аспектакль ргәамԥхар залшом акульттә шәҟәыҩҩы,  адраматург Даниил Хармс ирҿиара абзиабаҩцәа.

Аԥхьарбарақәа иаҭааз ахәаԥшцәа аӡәырҩы ргәаанагарала, аспектакль Аԥсны ииасуа ашықәс азы аиашазы атеатралтә аартраны иҟалеит. Арежисиори актиор ҿарацәеи ирылшеит ахәаԥшцәа имариоу, аха убри аан хадара злоу азҵаарақәа рыла рыҿцәажәара зламҩаԥыргоз  атеатралтә бызшәала апублика рыршанхара. Аиашазы, «Аԥсҭазаара – мшынуп, алахьынҵа – аԥша иаҩызоуп, ауаҩы иакәзар – уи дыӷбоуп».

Аҟәа. Абҵарамза 2, 2023 шықәса. Аԥсныпресс. Аминистрцәа Реилазаара амаҵураныҟәаратә харџьқәа абиуџьеттә хархәагақәа рыла рхарҭәааразы анорма ҿыцқәа шьақәнарӷәӷәеит.

Уи азы аиҭакрақәа алагалоуп ԥхынҷкәынмза  27, 2017 рзы аминистрцәа Реилазаара аҿы ирыдыркылаз «Амаҵураныҟәаратә харџьқәа Ареспублика Аԥсны абиуџьеттә система ахархәагақәа рыла рхарҭәааразы анорма ҿыцқәа рышьақәынарӷәӷәара азы» Ақәҵара №182.  

Ареспублика аҩныҵҟа инагӡоу амаҵураныҟәарақәа раан уахыки-ҽнактәи ашәатәы 250 мааҭ рҟынӡа инаӡоит.  

Аҟәа. Ԥхынҷкәынмза 2, 2023 шықәса. Аԥсныпресс. Ажьырныҳәамза 1, 2024 шықәса инаркны

Аҟәа. Ԥхынҷкәынмза 1, 2023 шықәса. Аԥсныпресс. Аминистрцәа Реилазаара аҿы ахәаша, ԥхынҷкәынмза  1 азы имҩаԥысыз аилатәара аҿы амшхәаԥштә иалагалаз  адгьылхархәаратәии амазаратәии азҵаарақәа рыла аӡбамҭақәа рыдыркылеит.

Аминистрцәа Реилазаара Зҭакԥхықәра Ҳәаақәҵоу Аилазаара «Дом отдыха «Черноморская жемчужина», Очамчыра ақалақь, Ҷанба имҩаҿы  иҟоу адгьылхәҭа 15 шықәса аҽҳәара аманы адгьылаҵантәи атермалтә ӡқәа рыҵхра азы ахархәаразы азин анаҭеит.

Хазхаҭалатәи аусдкылаҩ Ҳашба Стелла Дмитри-иԥҳа  убасҵәҟьа Очамчыра араион Кәтол ақыҭан иҟоу адгьылхәҭа 15 шықәса аҽҳәара аманы адгьылаҵантәи атермалтә ӡқәа рыҵхра азы ахархәаразы азин лыҭахоит.

Аҟәатәи акондитертә фабрика амазаратә комплекс априватизациа ззура ҟало аобиектқәа рсиа иалагалоуп. Атәыла Анапхгара уи априватизациа аҭагылазаашьақәа шьақәнарӷәӷәеит.

Аҟәа. Ԥхынҷкәынмза 1, 2023 шықәса. Аԥсныпресс. Аминистрцәа Реилазаара аҿы 2023 – 2024шш. ҭагалан-аӡынтәи аԥсыӡкраамҭазы аӡы-биологиатә ресурсқәа рхархәаразы ахәԥса азы Ақәҵара апроект иахәаԥшит.   

Ақыҭанхамҩа аминистр Беслан Џьопуа иажәақәа рыла, 2005-2006 шш. рзы аԥсыӡкраамҭа инаркны тоннак акамшьиа акра азы ахәԥса хынтә иазҳаит.

«Иҳаҩсыз ашықәс азы тоннак акамшьиа азы ахәԥса 1800 мааҭ рҟынӡа инаӡозҭгьы, сынтәа ҳара  2000 мааҭ, даҽакала иуҳәозар  11% рыла ашьҭыхра азы ажәалагала ҟаҳҵоит. Аусшәҟәы аҭҵаара апроцесс аҿы афинансқәа Рминистрра абиоресурсқәа рхархаразы ашәатәқәа 3500 мааҭ рҟынӡа ашьҭыхразы ажәалагала ҟанаҵоит», – ҳәа иҳәеит Беслан Џьопуа.

Иара иҟаиҵаз адыррақәа рыла, 2021 шықәсазы аԥсыӡкраамҭа ибзианы имҩаԥысит, аха убри аан 2022-2023 шш. аусдкылаҩцәа русура заралхеит, избан акәзар  6 909 тонна акамшьиа ауп иркыз.

«Ҳара абиоресурсқәа рзы ахәԥса ашьҭыхра ҳақәшаҳаҭӡам, избан акәзар, азауадқәа афымцамч, арацәа, адизельтә былтәы ала ауп аус шыруа, урҭ рыхәԥса есаааира иазҳауеит.  Арахь абиржа аҿы аԥсыӡшылеи аԥсыӡшшеи рыхәԥса абиоресурсқәа рыхәԥса ҩынтә ацҵара рзышьҭыхыртә еиԥш ихамлаӡеит. Адизельтә былтәы литрак азы 72-73 мааҭ ахшәаатәуп, иаагозар, иҳаҩсыз ашықәс азы уи   48-50 мааҭ иркуан. Наплакык ахы иархәоит 500 тоннак рҟынӡа адизельтә былтәи  1000 тоннак рҟынӡа арацәеи», – ҳәа иазгәеиҭеит Беслан Џьопуа.

Аԥыза-министр ихаҭыԥуаҩ, афинансқәа рминистр Владимир Делба, афинансқәа Рминистрра алкаа, иааиуа ашықәс азы абиуџьет апроект арбагақәа рышьақәыргылараан Аминистрра шьаҭас ишьҭнахыз 45 нызықь тонна акамшьиа рҟынӡа инаӡо аквота ала ишьаҭаркын ҳәа иазгәеиҭеит.  

«Иарбоу апроект иахәаԥшуеит 27 нызықь тонна акамшьиа рҟынӡа инаӡо аквота ҳасаб азуны. Ҳара заанаҵы иаҳдыруеит иазԥхьагәаҭоу абиуџьет ахашәалахәытә рбагақәа шынамыгӡахо.  Уи ахашәалахәқәа рдефицит ацлара цәырнагар алшоит. Убри аҟнытә аӡытә-биоресурсқәа рзы ахәԥса маҷк аинедексациа азура азы ажәалагала ҟаҳҵоит», – ҳәа иҳәеит Владимир Делба.

Ақыҭанхамҩа аминистр ас еиԥш аҵаҵӷәыркра дақәшаҳаҭымхаӡеит. Уи аквота агырхара ала аӡытә -биоресурсқәа рыхәԥса ашьҭыхра ҟалаӡом ҳәа инаҵшьны иазгәеиҭеит.

Ахәҭакахьала, аԥыза-министр Алеқсандр Анқәаб иркуа аԥсыӡ зегьы аԥсыӡшылеи аԥсыӡшшеи аҟаҵарахьы идәықәҵахоит, ус акәымкәа, иарбоу аалыҵ  икыу аԥсыӡ аус адулара ашьҭахь иаанхо ацәынхақәа роуп излырхыша ҳәа иазгәеиҭеит.

Аҟәа. Ԥхынҷкәынмза 1, 2023 шықәса. Аԥсныпресс. Аҳәынҭқарратә программа «2022–2025 шш. Ареспублика Аԥсны асоциал-еконоикатә ҿиара» аиҭакрақәа алагалоуп.   

Аиҭакрақәа, ареспублика асоциал-економикатә ҿиара апрограмма аҳәаақәа ирҭагӡаны Урыстәыла Аԥсны ианаҭо адгылара иадҳәалоуп.  

«Ишыжәдыруа еиԥш, аҳәынҭқарратә цхыраара иазку ауснагӡатәқәа рымҩаԥгара аҳәаақәа ирҭагӡаны, урыстәылатәи аган ала аусмҩаԥгатәқәа реицфинансыркразы аҭагылазаашьақәа ыҟоуп. Аԥаратә хархәагақәа еффективла рхархәара хықәкыс иҟаҵаны, аарыхра-ҭыжьра иазку амаругақәа раахәара аганахьала иҟоу аҭагылазаашьақәа аиҭакрақәа ралагалара азы ажәалагала ҟаҵоуп», – ҳәа адырра ҟалҵеит аекономика аминистр  Кристина Озган.

Лара ишазгәалҭаз ала, асубсидиақәа ақыҭанхамҩатә усхкы амодернизациа азы амаругақәеи атехникеи рыхәԥса инагӡаны ашәара аналыршахалак ашьҭахь ауп ианырзоужьлахо ҳәа иазгәалҭеит.