Аҟәа. Ԥхынҷкәынмза 30, 2023 шықәса. Аԥсныпресс. Азинхьчаратә усбарҭақәа иааныркылеит хҩык Узбекьысҭан атәылауаа. Дара зегьы анаҩс аҭира хықәкыс иҟаҵаны зыкапан рацәоу анаркотикатә маҭәашьарқәа изакәанымкәа рыиагареи рыҵәахреи рзы ахара рыдҵоуп.
Зыкапан рацәоу анаркотикатә маҭәашьар идырбалеит 2001 шықәсазы ииз Абдуллаев Акмалџьон Адхамџьон-иԥа.
Акмалџьон Абдуллаев анаркотикатә маҭәашьар шимаз дааныркылеит Ешыра ақыҭан.
Хаҭала игәаҭараан иаанкылаз хыхьтәи ишәҵатәы аџьыба иҭыргеит аиҵәа ԥштәы змоу апакет иҭаз, аҭиразы ирхиаз 56 еилаҳәара. Атәыла аҩныҵҟатәи аусқәа Рминистрра аексперт-криминалисттә Центр аҿы имҩаԥгаз аҭҵаара ишаҳнарбаз ала, уи «метадон» ҳәа изышьҭоу анаркотикатә маҭәашьар акәын.
Иара убас ишьақәыргылахеит Акмалџьон Абдуллаев Гәымсҭа ақыҭан имаӡоу аҭаҵәах шыҟаиҵахьаз. Аҭыԥ агәаҭараан ареспубликатә трасса иаваршәны амилициа аусзуҩцәа ирыԥшааит анаркотикатә маҭәашьар згәылаҳәаз аилаҳәара.
Акмалџьон Абдуллоев дахьынхоз ауада аҿы ирыԥшааит ахаҵа иарҭмаҟ, уи иҭан анаркотикатә маҭәашьар згәылаз 16 еилаҳәара.
Амилициа аусзуҩцәа Гагра ақалақь, Абазгааи Адыгааи рымҩеихысырҭа аҿы ирыԥшааит анаркотикатә маҭәашьар згәылаҳәаз даҽа 5 еилаҳәарак.
Акмалџьон Абдуллаев имхыз «метадон» ҳәа изышьҭоу анаркотикатә маҭәашьар азеиԥш капан 22 грамм рҟынӡа инаӡоит.
Акмалџьон Абдуллаев дҭакуп.
Аҩныҵҟатәи аусқәа Рминистрра Анаркотикатә маҭәашьарқәа реикәыршареи рхылаԥшреи рзы Аусбарҭеи Гәылрыԥшь араион аҩныҵҟатәи аусқәа Русбарҭа ашьаусԥшааратә ҟәшеи русзуҩцәа дааныркылеит 1999 шықәсазы ииз Тошпулатова Гуллакхон Инобиддин-кизи.
Хаҭала лгәаҭараан иаанкылаз аԥҳәыс илымаз аполиетилентә пакет иҭаз, анаркотикатә маҭәашьар «метадон» згәылаҳәаз 22 еилаҳәара лхала ицәырылгеит.
Гуллакхон Тошпулатова Аҟәа ақалақь аҿы имаӡоу аҭаҵәахқәа рыҟаҵарала анаркотикатә маҭәашьарқәа рыларҵәара мҩаԥылгон. Аҟәа ақалақь, Адлеиба имҩала игылоу хә-еихагылак змоу аҩнеихагыла аҩналарҭа №2 аҿы амилициа аусзуҩцәа ирыԥшааит «метадон» згәылаҳәаз даҽа 33 еилаҳәара.
Гуллакхон Тошпулатова илыдырбалаз, анаҩс илымхыз анаркотикатә маҭәашьарқәа рзеиԥш капан 41,65 грамм рҟынӡа инаӡоит.
Гуллакхон Тошпулатова дҭаркит.
Имаӡоу аҭаҵәахқәа рыҟаҵарала анаркотикатә маҭәашьарқәа рыларҵәареи рыҭиреи рзы гәҩарас дҟаҵаны даанкылоуп аамҭала Аҟәа ақалақь аҿы инхо Бозоров Асадбек Абдуроззок-углы.
Хаҭала игәаҭараан амилициа аусзуҩцәа иаанкылаз ахаҵа ишкәакәоу аххыраԥшра змоу амаҭәашьар згәылаҳәаз 3 еилаҳәарак идырбалеит. Иаанкылаз ишазгәеиҭаз ала, иарбоу аилаҳәарақәа иргәылоуп иџьбароу анаркотикатә маҭәашьар «метадон».
Анаҩстәи аоператив-ԥшааратә усмҩаԥгатәқәа рынагӡараан ишьақәыргылан Асадбек Бозоров Аԥсныҟа дшааз анаркотикатә маҭәашьарқәа рыларҵәара хықәкыс иҟаҵаны, еилкаахеит иара убас уи уаанӡа иҟаиҵахьаз имаӡоу аҭаҵәах ҭыԥқәа рырбара дшазхиоу.
Убас, Гәылрыԥшь араион Маҷара ақыҭан, ауаажәларратә траспорт аангыларҭа ашьҭахь иҟоу абжьаларҭа аҿы, иара убас аихамҩа иаваршәны еиуеиԥшым аҭыԥқәа рҿы амилициа аусзуҩцәа ирыԥшааит анаркотикатә маҭәашьар згәылаҳәаз 6 еилаҳәара.
Атәылауаҩ Асадбек Бозоров идырбалаз анаркотикатә маҭәашьар «Метадон» азеиԥш капан 7,192 грамм рҟынӡа инаӡоит.
Асадбек Бозоров анаҩс аҭира хықәкыс иҟаҵаны зыкапан ҷыдала ирацәоу анаркотикатә маҭәашьар изакәанымкәа аахәареи адгалареи аҵәахреи аиагареи, аҭиреи рзы ахара идҵахоит.
Асадбек Бозоров дҭакуп.
