Аҟәа. Нанҳәамза 15, 2023 шықәса. Аԥсныпресс.  Гәылрыԥшь араион Апрокуратура Асланӡиа Ҳаџьараҭ Шьоҭа-иԥа иганахьала Аԥсны Ашьаустә Закәанеидкыла ахәҭаҷ 99, ахәҭа 1 инақәыршәаны (Ауаҩшьра) ашьаусеилыргара хацнаркит.    

«Аусеилыргаанӡатәи Аусбарҭа  ишышьақәнаргылаз ала, нанҳәамза 13, 2023 шықәса, 13 сааҭи 30 минуҭи инарзынаԥшуа,  Асланӡиа Ҳаџьараҭ, ацәгьоура гәҭакыс иҟаҵаны, акыраамҭа иҟаз аҭаацәаратә цәымыӷхара иахҟьаны, аусеилыргаратә усбарҭала макьаназы ишьақәыргылам автомашьына ала Гәылрыԥшь араион Бабышьра ақыҭан иҟоу аҭыԥ аҿы днеины Ԥачлиа Лаврик Шьиҭа-иԥа диԥылеит.  

Аҟәа. Нанҳәамза 15, 2023 шықәса. Аԥсныпресс. Аслан Бжьаниа идҵа ала, Аҳәынҭқарратә шәарҭадара Амаҵзура  аҵакҷыда змоу Ацентр аҿы аҩаша, нанҳәамза  15 рзы, Ацентр аинструкторцәа рнапхгарала аҽазыҟаҵарақәа ирхысуа аҵаратә гәыԥқәа рыбжьара аԥхьахәгара мҩаԥысит, ҳәа иаанацҳауеит Аҳәынҭқарратә шәарҭадара Амаҵзура апресс-маҵзура.  

Аԥхьахәгара рхы аладырхәит Аҳәынҭқарратә шәарҭадара Амаҵзура иатәу аштанҭыҵтәи арратә гәыԥ, ашәахтә маҵзура, аминистрцәа Реилазаара, Амилаҭтә банк, Ареспубликатә Унитартә Наплакы «Аԥснытәи амшынӷбаныҟәара», Ареспубликатә Унитартә Наплакы «Аԥсны аихамҩа» аусзуҩцәа, иара убас атәылауаҩратә резервистцәа ргәыԥқәа рыла еилоу акомандақәа.

Аԥхьахәгара ахықәкы хадақәа рахь иаҵанакуеит – агәыԥқәа рыҩныҵҟа еиқәшәаны аусуреи иалкаау аамҭа иҭагӡаны атактикатәи аибашьратәи ахыдҵақәа рынагӡара. Аус рыдулара мҩаԥган абарҭ аелементқәа: мцала аҽыхҩарала аусзуҩцәа рхыдҵақәа рынагӡара, еиуеиԥшым абџьар ала ахысра, ахәра зауз аҳақьымнӡатәи актәи амедицинатә цхыраара рыҭара, хаҭалатәи аилазаара анапхгараҭара азы акомандаҟаҵаҩ иусура.

Аҟәа. Нанҳәамза 15, 2023 шықәса. Аԥсныпресс. С.Дбар ихьӡ зху Аԥсны жәлар Рџьынџьтәылатәи еибашьра азы Аҳәынҭқарратә музеи аҿы иаатит хатәгәаԥхарала еибашьуаз Рымш иазку архивтә фотосахьақәа рцәыргақәҵа.

Амузеи адиректор Гәыгәыца Џьыкырба есышықәса афотосахьақәа рархив харҭәаахоит, иҳаҩсыз ашықәс азы урҭ рхыԥхьаӡара  293 рҟынӡа инаӡозҭгьы, уажәы амузеи аҭааҩцәа ахәаԥшразы ирыдгалахар алшоит 346 фотосахьа ҳәа иазгәалҭеит.  Лара афотосахьақәа амузеи ахь иаазгаз зегьы иҭабуп ҳәа ралҳәеит.

Гәыгәыца Џьыкрба лажәақәа рыла, амузеи аҿы Аԥсны ацхырааразы зегьы раԥхьаӡа иааз иреиуоу аинрал Сулҭан Сосналиев икабинет ыҟоуп. 

«Иара лассы-лассы амузеи даҭаауан, есымша дтәаны ашәҟәқәа иҩуан. Амузеи аҿы иаанханы иҟоуп хыԥхьаӡара рацәала иара инапы иҵыҵыз анҵамҭақәа. Урҭ рахьынтә имаҷымкәа аекспозициа аҿы ицәыргақәҵоуп», - ҳәа илҳәеит лара.

Аҟәа. Нанҳәамза 15, 2023 шықәса. Аԥсныпресс.  Иахьа Аԥсны иазгәарҭоит хатәгәаԥхарала еибашьуаз Рымш. Ари амш иазку аныҳәатә усмҩаԥгатәқәа мҩаԥысуеит 1992 – 1993 шш. Кавказ ашьхарыуа жәлар Рконфедерациа аштаб ахьыҟаз ақалақь – Фырхаҵа Гәдоуҭа.

Аҟәа. Нанҳәамза 15, 2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа Махачкала иҟалаз аҭҟәацра аан иҭахаз рыуацәеи рҭынхацәеи дрыдышшылеит.

Ареспублика Даӷьсҭан Ахада Сергеи Меликов ихьӡала идәықәҵаз адышшыларатә шәҟәы аҿы ахәҭакахьала иазгәаҭоуп:

«Ҳаҭыр зқәу Сергеи Алим-иԥа, Аԥсны гәалсра дула ирыдыркылеит Махачкала ақалақь абылтәыҭаҭәарҭаҿы иҟалаз аҭҟәацра  иахылҿиааз аԥсытәбара зцу арыцҳара азы ажәабжь хьанҭа.

Аҟәа. Нанҳәамза 15, 2023 шықәса. Аԥсныпресс. Урыстәылатәи Афедерациаҿы иҟоу Аԥсны ацҳаражәҳәаҩ Алхас Кәыҵниа нанҳәамза  15 рзы Махачкала ақалақь абылтәыҭаҭәарҭа аҟны иҟалаз аԥсытәбара зцу атрагедиа инамаданы Урыстәылатәи Афедерациа Ахада иҟны иҟоу Ареспублика Даӷьсҭан есымшатәи ахаҭарнак Владислав Толстиук ихьӡала адышшыларатә шәҟәы дәықәиҵеит.   

«Ас еиԥш атрагедиатә аамҭа азы аиашьаратә Даӷьсҭан ажәлар ргәырҩеи рхьааи рыцеиҩаҳшоит. Ари даара трагедиа дууп ареспублика ажәлар зегьы рзы, иҭахаз рыуацәеи рҭахцәеи рзы. Даара гәалсра дула иҳадаҳкылеит ари ажәабжь хьанҭа. Ааха зауз зегьы иаарласны ршьапы иқәгыло Анцәа иҟаиҵааит», - ҳәа иазгәаҭоуп адышшыларатә шәҟәы аҿы.

Аҟәа. Нанҳәамза 15, 2023 шықәса. Аԥсныпресс. Есышықәса нанҳәамза 15 рзы Аԥсны иазгәарҭоит хатәгәаԥхарала еибашьуаз рымш. Ишдыру еиԥш,  Аԥсны Аџьынџьтәылатә еибашьра иалагеит 1992 шықәса, нанҳәамза 14 рзы, адырҩаҽныҵәҟьа Нхыҵ-Кавказтәи Ареспубликақәа рҟынтә ҳтәыла иаҭааит  раԥхьатәи хатәгәаԥхарала еибашьуаз арԥарцәа ргәыԥ.

Аибашьра ианналага аҩбатәи амш, 1992 шықәса, нанҳәамза  15 инаркны Аҟабарда жәлар рҵеи иаша Султан Асланбек-иԥа Сосналиев напхгара ззиуаз раԥхьатәи хатәгәаԥхаралатәи аибашьцәа ргәыԥ ааны ҳаибашьцәа ирывагылеит.

Аҟәа. Нанҳәамза 15, 2023 шықәса. Аԥсныпресс. Аԥсны Аҳәынҭқарра Ахада 1992-1993 шш. Аԥсны Аџьынџьтәылатә еибашьра иалахәыз хатәгәаԥхаралатәи аибашьцәа дрыдныҳәалеит.

Адныҳәалараҟны иҳәоуп:

Акыр иаԥсоу ҳаибашьцәа, гәык-ԥсык ала ишәыдысныҳәалоит Хатәгәаԥхаралатәи аибашьҩы имш.

31 шықәса раԥхьа 1992-1993 шш. Аԥсны Аџьынџьтәылатә еибашьра иалагеит. Убасҟан, аибашьра ианналага аҩбатәи амш инаркны Аҟабарда жәлар рҵеи иаша Султан Асланбек-иԥа Сосналиев напхгара ззиуаз хатәгәаԥхаралатәи аибашьцәа ргәыԥ ааны ҳаибашьцәа ирывагылеит.

Ақырҭуа агрессор иҿагыланы ахақәиҭразы иқәԥоз   хажәлар иарӷьажәҩаны ирыдгылан хатәгәаԥхаралатәи аибашьцәа Алада Урыстәыла, Нхыҵ Кавказ ареспубликақәа рыҟнытә, мшыннырцәынтә ҳџьынџьуаа, Аахыҵ Уаԥстәыла Ареспубликеи Приднестровиатәи Молдавиатәи Ареспубликеи рыҟнытә.

Абас хамеигӡарада игылаз Аԥсны жәлари урҭ аиҩызара, аиашьара рзызуаз  аибашьцәеи ирыбзоураны иҳалшеит Аԥсны ахақәиҭреи ахьыԥшымреи реиқәырхара.

Аԥсны Аџьынџьтәылатә еибашьра иалахәын 2000-ҩык инареиҳаны хатәгәаԥхаралатәи аибашьцәа, урҭ рахьтә фырхаҵарала иҭахеит 460-ҩык инареиҳаны.  Аԥсны жәлар наунагӡа ирхашҭраны иҟаӡам ҳаԥсадгьыл Аԥсны ахақәиҭра зхы ақәызҵаз хатәгәаԥхаралатәи аибашьцәа иаадырԥшыз афырхаҵара.

Урҭ рыхьӡ кашәара ақәӡам.

Аҟәа. Нанҳәамза 15, 2023 шықәса. Аԥсныпресс. Нанҳәамза 15 рзы Аԥсны Аҳәынҭқарраҟны Хатәгәаԥхаралатәи аибашьҩы имш азгәарҭоит. Аԥсны Жәлар Реизара – Апарламент Аиҳабы Ашәба Лаша 1992–1993 шш. Аԥсны Аџьынџьтәылатә еибашьра хатәгәаԥхаралатәи аибашьцәа-аветеранцәа рахь ааԥхьара ҟаиҵеит!

Ааԥхьараҟны иҳәоуп:

«Акыр иаԥсоу аибашьцәа – 1992–1993 шш. Аԥсны  Аџьынџьтәылатә еибашьра аветеранцәа!

Ҳаҭыр зқәу ҳауаажәлар!

Аԥсны Жәлар Реизара – Апарламент ахьӡала ишәыдысныҳәалоит Хатәгәаԥхаралатәи аибашьҩы имш.

1992–1993 шш. иуадаҩыз  Аԥсны Аџьынџьтәылатә еибашьра ашықәсқәа раан ацхырааразы иаҳзааз хатәгәаԥхаралатәи аибашьцәа зегьы еидызкылоз акәны иҟан аиашьара, аиҩызара аныҟәгара, аиашара адгылара, аҭынчреи агуманизми рыхьчара алзыршо аҟазшьақәа.

Аҟәа. Нанҳәамза 14, 2023 шықәса. Аԥсныпресс.  Аҟәа ақалақь, Акьырҭаа имҩа аҿы амцакра ҟалеит. Мыцхәы идууцәам асасааирҭа ҩны амца акит. Амца ааигәа игылаз ахыбрахь ииасит.

12 сааҭи 39 минуҭи рзы амцарцәаҩцәа ахҭыс ахьыҟалаз аҭыԥ аҿы инеихьан. Амцарцәара иалахәын амцарцәаҩцәа рыбригадақәа ԥшьба, ҳәа Аԥсныпресс ахь адырра ҟарҵеит Иҷыдоу аҭагылазаашьақәа рзы Аминистрра апресс-маҵзура аҟны.