Аҟәа. Мшаԥымза 11, 2024 шықәса. Аԥсныпресс. Аԥсны аҩныҵҟатәи аусқәа Рминистрра аҿы аминистр Роберт Киути Урыстәылатәи Афедерациа аҩныҵҟатәи аусқәа Рминистрра Аусеилкаара-акриминалистикатә Центр аиҳабы, аполициа аинрал-леитенант Вадим Казьмини реиԥылара мҩаԥысит.
Аиԥылара аҿы Аԥсни Урыстәылеи Аусеилкаара-акриминалистикатә центрқәа русеицура арҭбааразы иҟаҵатәу азҵаарақәа ирылацәажәеит.
Асасцәа бзиала шәаабеит ҳәа раҳәо, Аԥсны аҩныҵҟатәи аусқәа рминистр Роберт Киут аҳәынҭқарратә зинхьчаратә хылаԥшырҭақәа аусеилыркаара-акриминалисттә усура аганахьала русеицура аҩаӡара аҳаракра адинамика убаратәы иҟоуп ҳәа иазгәеиҭеит.
Урыстәылатәи Афедерациа аҩныҵҟатәи аусқәа Рминистрра Аусеилкаара-акриминалистикатә Центр аиҳабы, аполициа аинрал-леитенант Вадим Казьмин хаҭала Аԥсны аҟазаара азы иоуз алшара даара гәахәарыла идикылеит ҳәа иазгәеиҭеит. Уи аҩ-тәылак рыбжьара аимадара аҿиара ахырхарҭа азҭо иреиҳау аҩаӡараҿы анапхгараҭара ауп ҳәа инаҵшьны иазгәеиҭеит.
«Аԥсни Урыстәылеи ҭоурыхла аиҩызаратә, аилибакааратә, аидгыларатә еизыҟазаашьақәа рыбжьоуп», – ҳәа иҳәеит Вадим Казьмин.
Роберт Киути Вадим Казьмини аҩганк ирыбжьаз аиқәшаҳаҭрақәа аҳәаақәа ирҭагӡаны еицынарыгӡахьоу аусмҩаԥгатәқәа ахә ҳаракны иршьеит.
Аиԥылара иара убас рхы аладырхәит Аԥсны аҩныҵҟатәи аусқәа рминистр актәи ихаҭыԥуаҩ Руслан Ажьибеи Аԥсны иҟоу Урыстәылатәи Афедерациа аҩныҵҟатәи аусқәа Рминистра ахаҭарнак Сергеи Голенкови.
Урыстәыла Аҩныҵҟатәи аусқәа Рминистрра Аусеилкаара-акриминалистикатә Центр аделегациа аҭааит аԥсуа Аусеилкаара-акриминалистикатә Центр. Дара аҭааит ахысратәии, анацәашьҭахыхратәии, абаллистикатәии руада.
Аԥсни Урыстәылеи Аусеилкаара-акриминалистикатә центр анапхгаҩцәа Руслан Дбари Вадим Казьмини русеицура арҭбааразы иҟаҵатәу азҵаарақәа ирылацәажәеит.
