АЖӘАБЖЬҚӘА
сегодня 15:10
Абызшәатә политиказы аҳәынҭқарратә еилакы Аԥсны иреиҳаӡоу Аӡбарҭа аҳәынҭқарратә усзуҩцәа рзы аԥсуа бызшәа аҵаразы агәаҭаратә курс хацнаркуеит
Иахьа Аԥсны Иреиҳаӡоу Аӡбарҭаҿы имҩаԥысит аӡбаратә система аусзуҩцәа рыбжьара аԥсуа бызшәа адырра аҩаӡара ашьҭыхразы агәаҭаратә программа хацзыркуа аиԥылара. Иреиҳаӡоу Аӡбарҭа ахантәаҩы Саида Быҭәба иқәлыргылаз аԥшьгамҭа адгылара аиуит абызшәатә политиказы аилак ахантәаҩы Гәында Кәыҵниа аус лыцура иабзоураны.
Апрограмма алахәылацәа еихшан ҩ-категориакны: абызшәа «хьысҳаны издыруеи», «ибзианы издыруеи» ҳәа.
Аҽазыҟаҵарақәа Аӡбарҭа ахыбраҿы иааиԥмырҟьаӡакәа мчыбжьык ахь ҩынтә имҩаԥгахоит. Ари агәаҭаратә курс азинтә усхк аҟны абызшәатә ҭагылазаашьа аиӷьтәра адагьы егьырҭ аҳәынҭқарратә структурақәеи ачынуааи рзы иҿырԥшыганы иҟалоит.
«Ари аҿырԥштәы егьырҭ рзы иҿырԥшыгахоит. Ҳара ҳақәгәыӷуеит ҳкурс амҩа аанартып ҳәа, егьырҭ аусбарҭақәагьы уи иаҿыԥшып ҳәа, зегьы ҳаицхыраароуп аԥсуа бызшәа аиқәырхареи арҿиареи рзы» - ҳәа инаҵшьны иазгәарҭеит Саида Быҭәба.
Акур мҩаԥыргалоит ААУ аԥсуа бызшәа афакультетбжьаратә кафедра арҵаҩцәа Рада Ҵәыџьбеи Адгәыр Шьынқәбеи.
