Аҟәа. Ԥхынгәымза  12, 2023 шықәса. Аԥсныпресс.  Аԥсны атәылахьчара Аминистрра апресс-маҵзура амассатә информациа  ахархәагақәа рхаҭарнакцәа, аблогерцәеи ауаажәларратә журналистцәеи рахь аҳәара ҟанаҵоит ахылаԥшырҭа аусура иазкны адырраҭарақәа рыҟаҵараан агәҭакиашареи аҳаҭырқәҵареи аадырԥшларц.

«Ҵыбыргуп, иахьа Аԥсны акәша-мыкәша, иара адунеи зегьы аҿы ишьақәгыланы иҟоу ауаажәларра-политикатә ҭагылазаашьа аҿы ҳара зегьы даара агәҽанызаареи аобиективреи хымԥада иааҳарԥшлароуп. Иахьа  Аԥсны иазку иарбанызаалак аинформациа атәыла аҿагылаҩцәа рганахьала ҳреспублика азы хра злам ахархәара аиур алшоит.

Аҟәа. Ԥхынгәымза 12, 2023 шықәса. Аԥсныпресс. Ԥхынгәы 11-12, 2023 шықәсазы имҩаԥысит Жәларбжьаратәи Женеватәи аиҿцәажәарақәа 58-тәи рраунд. Аиҿцәажәарақәа ирылахәын Аԥсны Аҳәынҭқарра, Аахыҵ Уаԥстәыла, Урыстәылатәи Афедерациа, ЕАА рхаҭарнакцәа, ЕЕи ЕАРи, ОБСЕи рыцхантәаҩлара.

Аԥсны Аҳәынҭқарра Адәныҟатәи аусқәа рминистр Иракли Ҭыжәба зхадараҿы дыҟаз аԥснытәи аделегациа иалахәын: Аԥсны АШәМ ахантәаҩ ихаҭыԥуаҩ Заал Хәарцкьиа, Аԥсны ААР аусзуҩцәа Лаша Аҩӡба, Артур Гагәылиа.

Аҟәа. Ԥхынгәымза 12, 2023 шықәса. Аԥсныпресс. Москва Анапхгара Ацқьа Иоанн Ахьҿы ихьӡ зху Камантәи аберҭыԥ азы ауахәаматә маҭәахәқәа раахәара иазкны аԥара азоунажьит.

Ацқьа Иоанн Ахьҿы ихьӡ зху Камантәи аберҭыԥ азы ауахәаматә маҭәахәқәа раахәара иазкны аԥара азоужьра азы асертификат аберҭыԥ аиҳабы, аигумен Игнати (Киут) ииҭеит Москва ақалақь жәларбжьаратәии адәныҟаекономикатәи аимадарақәа рзы Адепартамент анапхгаҩы ихаҭыԥуаҩ – аконтрактә маҵзура анапхгаҩы Игорь Ткач.

«Ҳара Аԥсны Аиашахаҵаратә ныхабаақәа рзы ауахәаматә маҭәахәқәа раахәара иазкны  Москва Анапхгара аминистр Сергеи Евгени-иԥа Чериомин инапы зҵаиҩыз асертификат еиқәҳаршәеит.  Хара имгакәа уи шәара шныхабаа ахь иааргараны иҟоуп», - ҳәа иҳәеит Игорь Ткач.

Аҟәа. Ԥхынгәымза 12, 2023 шықәса. Аԥсныпресс.  Аԥсны атуризм аминистр Ҭеимураз Хышба ааигәа иҟаз амшцәгьақәа рыхҟьаԥҟьақәа Апансионатқәа Реидгыла «Акурорт Пицунда» аҿы рықәгара азҵаарақәа рыла аусуратә еилатәара мҩаԥигеит. Абри атәы аанацҳауеит атуризм Аминистрра апресс-маҵзура.

«Акурорт амаҵзурақәа ирӷәӷәоу арежим ала аус руеит, аномерқәа реиҭашьақәыргылареи аплиажқәа реилыргареи мҩаԥыргоит», - ҳәа иазгәаҭоуп адырраҭара аҿы. 

Афымцалашарала аиқәыршәарагьы еиҭашьақәыргылоуп.

Уажәы апансионатқәа Реидгыла «Акурорт Пицунда» аҿы инхоит 2228-ҩык.

Аҟәа. Ԥхынгәымза 12, 2023 шықәса. Аԥсныпресс. Кьалашәыр аӡиас иахьаҵанакуа иҟоу аӡхагаларатә станциа №3 аӡымҩангагатә шәыра  ааигәа Аҟәа ақалақь аҿы иҟалаз ақәаршҩы иахҟьаны ааха аиуит. Абри атәы аанацҳауеит аҳҭнықалақь Ахадара аофициалтә саит.

«Аӡы хыҵны аҟәара иқәлеит, уи аҟынӡа анаӡара уадаҩхеит. Иацтәи амш зегьы иалагӡаны алшара шааҟалалазҵәҟьа аусура алагаразы аӡиас аӡы аҩаӡара амониторинг мҩаԥаагон. Аӡхыҵра иахҟьаны аӡымҩангагатә шәыра аҟынӡа анаӡара уадаҩхеит», - ҳәа иҳәеит Амуниципалтә Унитартә Наплакы «Аӡыканал» адиректор  Даур Паҷкориа.

Аҟәа. Ԥхынгәымза 12, 2023 шықәса. Аԥсныпресс. Аԥсны аомбудсмен Анас Кьышьмариа Урыстәыла аомбудсмен Татиана Маскалькова лааԥхьарала Москваҟа дцеит.

Ԥхынгәымза 13 азы аҩ-тәылак рзинхьчаратә институтқәа рыбжьара аганқәа реилибакаара азы аиқәшаҳаҭра анапаҵыҩра азԥхьагәаҭоуп. Абри азы адырра ҟанаҵоит Аԥсны ауаҩы изинқәа рыхьчаразы Азинмчы змоу Иаппарат апресс-маҵзура.

Аҟәа. Ԥхынгәымза 12, 2023 шықәса. Аԥсныпресс. Урыстәылатәи Афедерациа Ахада иҟны иҟоу Урыстәылатәи жәлар рынхамҩеи аҳәынҭқарратә маҵзуреи Ракадемиа абаза ала апрезиденттә грантқәа Рфонд адгыларала Урыстәылазегьтәи ибжьаратәу азанааҭҵара иаҵанакуа аҵараиурҭақәа рҵаҩцәеи рырҵаҩцәеи, иара убас Аԥсны иҟоу Урыстәылатәи аҭоурыхтә еилазаара ахаҭарнакра ахеиалак ахантәаҩы анапхгара зылҭо Аԥснытәи ашколхәыҷқәеи арҵаҩцәеи рделегациеи    рзы Санкт-Петербург ақалақь аҿы Афорум мҩаԥысуеит,  ҳәа иаанацҳауеит   Аԥсадгьыл-инфо. 

Ари апроект ахықәкы хадас иамоуп аҵаҩцәеи арҵаҩцәеи Аџьынџьтәылатәи еибашьра Дуӡӡа ашықәсқәа раан анацистцәеи урҭ рыдгылаҩцәеи рҟынтәи асовет ҭынч уааԥсыра ирхыргаз агеноцид атема аазырԥшуа алитература аӡыргара, иара убас иарбоу атемала иҩу атекстқәа аус рыдулара аметодика алацәажәареи иазку аусура радыԥхьалара.  

Аҟәа. Ԥхынгәымза 12, 2023 шықәса. Аԥсныпресс. Атуризм аминистр Ҭеимураз Хышба ааигәа иҟалаз аԥсабаратә рыцҳара иахҟьаны аиҳарак ааха зауз  Лӡаа ақыҭа даҭааит. Араҟа уажәы аӡышьҭрарҽеиратә усурақәеи ацҳақәа ҩба реиҭашьақәыргылареи мҩаԥысуеит.  Абри азы адырра ҟанаҵоит атуризм Аминистрра апресс-маҵзура.

Аҟәа. Ԥхынгәымза 12, 2023 шықәса. Аԥсныпресс /Алеқсеи Шамба/. Аԥсны  Sputnik амультимедиатә пресс-центр аҿы ахаша, ԥхынгәымза  12 рзы жәлрбжьаратәи агентра Sputnik  «Агәабзиара ашәарҭадареи ааигәатәи аҳәаанырцәтәи атәылақәа рыҟны  акурорттә ԥсшьараамҭеи» атема ала  авидеоцҳа  Москва-Минск- Аҟәа - Бишкек  мҩаԥгахеит.

Апресс-конференциа аформат ала ажурналистцәа рызҵаарақәа рҭак ҟаиҵон Урыстәыла Анаукақәа Ракадемиа академик, Урыстәылатәи аҵарадырра Академиа апрезидент ихаҭыԥуаҩ  Геннади Онишьенко.

Аҟәа.

Аԥсны аганахьала аиԥылара амодератор Инал Лазба изҵаарақәа ареспублика аҿы аҵыхәтәантәи амшқәа рзы иҟалаз ақәаршҩы ӷәӷәа ахҟьа-ԥҟьақәа ирыдҳәалахеит: амшын аҭалара анбаҟало, анхамҩатә фонд аӡы аҵалара инамаданы аҿкы чымазарақәа рылаҽра азы ашәарҭара ыҟоу иҟаму.

Геннади Онишьенко Амш Еиқәа ахала аҽарыцқьаразы иамоу алшара ҳаракуп, убри аҟнытә ақәоурақәа рышьҭахь  уахыки-ҽнаки анҵлак ашьҭахь уи аҭалара ҟалоит ҳәа иазгәеиҭеит. Аинфекциақәа ртәы акәзар, аӡы зқәылаз аҭыԥқәа рҿы агепатит уахь иналаҵаны, урҭ зхылҿиаауа егьырҭ авирусқәеи абактериақәеи ыҟазар алшоит. Аха убри аан, Геннади Онишьенко аҭыԥантәи аспециалистцәа «ауааԥсыра аҽкы чымазарақәа рылаҽра рацәыхьчаразы аҭагылазаашьа иахәҭоу ахылаԥшра шарҭо» азы агәрагара ааирԥшит.

Аҟәа. Ԥхынгәымза 11, 2023 шықәса. Аԥсныпресс. Урыстәылатәи Афедерациа апрокуратура Аԥсны Аҳәынҭқарра апрокуратура Хада  Аԥсны Ашьауӷатә Закәанеидкыла ахәҭаҷ 105, ахәҭа  4 ала (машәырла ауаҩы иԥсҭазаара алҵра зыхҟьаз гәҭакыла агәабзиара ӷәӷәала ааха аҭара) азы ахара зду, 1994 шықәсазы ииз Саакиан Давид Карекин-иԥа иҭаразы иҟанаҵаз аҳәара иадгылеит.

Хәажәкырамза 29, 2022 шықәсазы Гагра ақалақь аҿы  Давид Саакян  1995 шықәсазы ииз Аԥсны атәылауаҩ Дудукчиан  Е.Е. иареи иаалырҟьаны ирыбжьалаз аимак-аиҿак аан ӷәӷәала ахәрақәа иниҵеит. Урҭ ирыхҟьаны Дудукчиан Е.Е. ахәышәтәырҭаҿы иԥсҭазаара далҵит.