Аҟәа. Ԥхынгәмза 17, 2023 шықәса. Аԥсныпресс.  Нанҳәамза 5, 2023 шықәса рзы акультура Аминистрреи Гал араион Ахадареи рыцхыраарала Гал ақалақь аҿы араионтә рҿиаратә коллективқәа злаху аконцерти ақыҭанхамҩатә хәаахәҭратә цәыргақәҵеи мҩаԥгахоит.

Аԥсны атылауааи асасцәеи игәыҟаҵагоу амузыка азыӡарҩреи атәыла аҿы иҭрыжьуа афатә аалыҵқәа ргьама абареи рзы алшара рзаԥҵахоит.

Аҟәа. Ԥхынгәымза 17, 2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа усуратә визитла Гал араион даҭааит. Аҳәынҭқарра Ахада Гал Ақалақьтә парк хадаҟны дыҟан.

Администрациа ахада ихаҭыԥуаҩ Нарсоу Џьопуа Аслан Бжьаниа адырра ииҭеит 2022 шықәсазы ихацыркыз аиҭашьақәыргыларатә усурақәа шымҩаԥысуазы.

«30 шықәса раахыс апарк аҟны иақәнагоу аусурақәа мҩаԥгамызт. Шьҭа иԥсахуп асоветтә аамҭазы аӡымҩангаразы ишьақәыргылаз ажәытәтәи ажрақәа, ахаҳәтә цәхыԥқәа, арлашагақәа», - иҳәеит Џьопуа, арҭ аусурақәа аҭыԥантәи абиуџьет аҟнытә 5 млн мааҭк шырзаужьыз азгәаҭаны. Имҩаԥгоу аусурақәа ирылаԥхьаӡоуп ашьаҟамҩатә хаҳәҟьаԥсқәа рышьҭаҵара, асқамқәеи агәам-самҭрақәеи рыргылара.

Аҟәа. Ԥхынгәымза 15, 2023 шықәса. Аԥсныпресс. Аскульптура «Амшынҳәа аԥсҿыхҩы» ақалақь Амш аламҭалазы Очамчыра аԥшаҳәа аҿы ишьақәыргылан.  Аусумҭа аформала азганк иԥшаахны иҟаҵоу амшынҳәа ацәаареи егьи азганк аҵла ҳарак  ашьапы иакәыршаны изку ауаҩы инапи угәаланаршәоит.                                                                                            

Ажәытә ҳәамҭақәеи алегендақәеи ишырҳәо ала, жәытәнатәаахыс, Ашумер-Аккадтәи аҳраҿы Амшынҳәа-Анцәахәратә лагамҭа аазырԥшуа ԥстәык аҳасабала иахәԥшуан. Ашумераа рынцәахә дуӡӡақәа хԥа рахьтә руакы – Еа ҳәа изышьҭоу, аԥсыӡ ҵыхәа аманы иаарԥшын. Уи аҟәыӷара Анцәахәы, адгьыл аҵаҿтәи аӡқәа рхылаԥшра назыгӡоз, анаҩс ауаҩы дызшаз Анцәахәы аҳасабала иаақәгылеит, хьыӡқәасгьы иаиуит: Енки, Хаиа, Дагон, Оанес.

Аҟәа. Ԥхынгәымза 15, 2023 шықәса. Аԥсныпресс.  Абар шьҭа акгьы агым иахьа, Аҟәа ақалақь аҿы уажәраанӡа амаӡа «иҭалаҳәаз» ахҭысгьы аҟалара: ахәаша, ԥхынгәымза  14 рзы Аурыс драматә театр асценаҿы имҩаԥысит аусумҭа ҿыц апресс-рбара. Иахьагьы атеатр абзиабаҩцәа ирзыԥшуап XX ашәышықәсазы иаԥҵаз, иџьашьаху, уамашәа еиҿартәоу, иара убри аамҭазы иаарту ароман ала иқәыргылоу аспектакль «Роман с кокаином» аԥхьарбара.   

Аспектакль ықәиргылеит иара убас асахьаҭыхыҩ-ақәыргылаҩ иаҳасабала дықәгылеит аусуразы атеатр ахь ааԥхьара зауз арежиссиор Роман Кочержевски, алашара азы асахьаҭыхыҩ - Константин Бинкин, авидеосахьаҭыхыҩ - Игорь Домашкевич, акостиумқәа рзы асахьаҭыхыҩ – Наталиа Шпанова.

Аспектакль иалахуп атеатр атруппа аҿар биԥара ахаҭарнакцәа:  Емиль Петров (Вадим), Екатерина Барышева (Ан), Милана Ломиа (Нелли/Кокаин), Ирина Делба (Ахәыҷхылаԥшҩы/Китти), Мадлена Барцыц (Сониа), Лоида Ҭырқьба (Зиночка/Идырым аҭыԥҳа), Кирилл Шишкин (Иаг), Осман Абыхәба (Буркевиц), Рубен Депелиан (Штеин), Руслан Жьиба (Аизенберг/Мик), Саид Лазба (Апап/Хирге).

Аҟәа. Ԥхынгәымза 15, 2023 шықәса. Аԥсныпресс. Дмитри Гәазаа ԥхынгәымза 15-16 рзы Мизано ақалақь аҿы имҩаԥысраны иҟоу ачемпионат Fanatec GT World Challenge Europe Рowered by AWS ихы алаирхәуеит, ҳәа адырра ҟанаҵоит Аԥсны аҿари аспорти русқәа рзы аҳәынҭқарратә Еилакы аофициалтә саит.

Аҟәа. Ԥхынҷкәынмза 15, 2023 шықәса. Аԥсныпресс.  Ԥхынгәымза 15 рзы Очамчыра  2523 - шықәса ахыҵра  азгәарҭоит.

Аныҳәатә усмҩаԥгатәқәа 1992-1993 шш. Аԥсны жәлар Рџьынџьтәылатәи еибашьраҿы иҭахаз аибашьцәа рбаҟа амҵан ашәҭ шьыҵәрақәа рышьҭаҵарала иалагеит.

Амшын аԥшаҳәа иахьаҵанакуа иаатит Очамчыра, Гал, Гәылрыԥшь араионқәа рҟынтәи ақыҭанхамҩатә аалыҵ ахәаахәҭратә цәыргақәҵа. Иара убас еиҿкаахеит аҟазацәеи асахьаҭыхыҩцәеи рцәыргақәаҵа.

Аҟәа. Ԥхынгәымза 15, 2023 шықәса. Аԥсныпресс.  Ԥхынгәымза 3 – 13 рзы атәылахьчара Аминистрра ахысырҭақәа рҿы аштаттә хысыҩцәа алархәны имҩаԥгаз аҽазыҟаҵарақәа хыркәшахеит. Иарбоу аусмҩаԥгатә аҿы ихадоу ахшыҩзышьҭра аиуит аибашьратә дәы аҿы лассы-лассы зҽеиҭазкуа аҭагылазаашьақәа раан икылкааны ахысыҩцәа  русура иҿыцу аформақәеи аҟаҵашьақәеи рԥышәара, ҳәа адырра ҟанаҵоит Аԥсны атәылахьчара Аминистрра.  

Аҟәа. Ԥхынгәымза 14, 2023 шықәса. Аԥсныпресс /Алеқсеи Шамба/. Аԥсны Sputnik  амультимедиатә пресс-центр аҿы, ахәаша, ԥхынгәымза 14 рзы имҩаԥган  ԥхынгәымза 14 рзы Аԥснытәи аҳәынҭқарратә филармониа аҿы имҩаԥысраны иҟоу аконцерт иазкны апианинорҳәаҩы-авертуоз, акомпозитор, аранжировкаҟаҵаҩ, абенд-лидер Сергеи Жилин ипресс-конференциа.  

Амузыкант ишеиҭеиҳәаз ала, агәыԥ «Земля, ветер и огонь»» аҳаҭыр иазкны имҩаԥгахо аконцерт апрограмма аҿы ритм-енд-блиуз, соул, фанк, џьаз, диско, рок астильқәа рыла арҿиамҭақәа ахәаԥшцәа ирыдгалахоит.

Аҟәа. Ԥхынгәымза 14, 2023 шықәса. Аԥсныпресс.  Гәылрыԥшь араион Ахадараҿы имҩаԥысыз анҭыҵтәи аилатәара аҿы ақыҭанхамҩеи  афатә-ажәтәи рзы араион Ахадара Аусбарҭа аиҳабы Рафик Григориан Аҳәынҭқарра Ахада иҿаԥхьа  2023 шықәса актәи азбжа азы имҩаԥгаз аусура азы аҳасабырба ҟаиҵеит.

Аусбарҭа ахада агәра ганы дыҟоуп Гәылрыԥшь араион ақыҭанхамҩатә потенциа ду шамоу.

«Гәылрыԥшь араион аҿы 2023 шықәсазы амхыцәаӷәақәа рымҽхак - 800 гектар рҟынӡа инаӡеит, убри аан  600 гектар рҟынӡа аџьықәреи ала илаҵоуп, ауҭраҭых ала - 150 гектар, акартош ала - 20 гектар, акарпыжәи ашьынкеи рыла - 20 гектар, аҟәыд, аҟабақ, ацыца рыла - 10 гектар. Аамҭакала 86,21 гектар рҟынӡа  1992-93 шш. Аԥсны жәлар Рџьынџьтәылатәи еибашьра аҿы иҭахази аинвалидцәеи рҭаацәа рзы аџьыкәреи алаҵаразы амхурсҭақәа ааԥынтәи ацәаӷәарақәа мҩаԥгоуп. (120 нхамҩа) Уи иақәхарџьхеит 419 239 мааҭ. Гәылрыԥшь араион ахарџь ала 86 гектар иреиҳаны ицәаӷәан», - ҳәа еиҭеиҳәеит иара.

Аҟәа. Ԥхынгәымза 14, 2023 шықәса. Аԥсныпресс. Гәылрыԥшь араион аҿы афымцамч азы ашәатәқәа руал 70 млн. 132 нызықь мааҭ рҟынӡа инаӡоит, ҳәа анҭыҵтәи аилатәара аҿы Аҳәынҭқарра Ахада Аслан Бжьаниа адырра ииҭеит Гәылрыԥшь араион Афымцастанциа аиҳабы  Зураб Ханагәуа.

Зураб Ханагәуа  ахархәара зауз афымцамч азы ашәатәқәа реизгара 23,2% рҟынӡа инаӡоит ҳәа иазгәеиҭеит.

«Ҳазҭоу ашықәс фымз ирылагӡаны Гәылрыԥшь араион аҿы ахархәара зауз афымцамч азы иахыԥхьаӡалоу ашәатәы 91 млн. 292 нызықь мааҭ рҟынӡа инаӡоит, урҭ рахьынтә ишәоуп – 21 млн. 159 нызықь», - ҳәа инаҵшьны иазгәеиҭеит Зураб Ханагәуа.

Уи иажәақәа рыла, иҳаҩсыз ашықәс аиԥш-зеиԥшыз ашықәс азы аизгара апроцент 29,3% рҟынӡа инаӡон.

«Фымз рыла ахархәара зауз афымцамч азы аиуристтә хаҿқәа рыла иҟаҵоу ашәатәқәа 71.6% рҟынӡа инаӡоит. Иахыԥхьаӡалоуп 13 млн. 946 нызықь мааҭ, ишәоуп – 9 млн. 979 нызықь мааҭ, ауал  - 3 млн. 967 нызықь мааҭ. Фымз рыла ахархәара зауз афымцамч азы хазхаҭалатәи ахаҿқәа рыла иҟаҵоу ашәатәқәа - 14,5 % рҟынӡа инаӡоит. Иахыԥхьаӡалоуп - 77 млн. 345 нызықь мааҭ, ишәоуп - 11 млн. 180 нызықь мааҭ, ауал  – 66 млн. 165 нызықь мааҭ », - ҳәа адырра ҟаиҵеит Зураб Ханагәуа.

Уи иҟаиҵаз адыррақәа рыла, араион аенергосистема ахархәаратә ҭагылазаашьа арманшәалареи акурорттә сезони аӡынтәи аамҭахәҭеи разыҟаҵара азы ҳазҭоу ашықәс актәи азыбжа иалагӡаны имҩаԥган 50 километр рҟынӡа инаӡо афымцамҩангагатә цәаҳәақәа реиқыршәара,  35 цыра аҿыхгақәа ԥсахын, звольҳараку акабельқәа еиҭашьақәыргылан.

«143 инарзынаԥшуа амҿтәы шьаҟақәа аихабетонтә ала иԥсахуп. Араион ауааԥсыра фымцалашарала реиқәыршәара ахаҭабзиара аиӷьтәра азы инацҵаны  ишьақәыргылан  14 трансформатор, иԥсаххеит 15 иблыз атрансформаторқәа, 35 км. рҟынӡа инаӡо афамцамҩангагақәа рыԥсахит,  уҳәа аусурақәа мҩаԥган», - ҳәа иҳәеит Зураб Ханагәуа.