Аҟәа. Абҵарамза 17,2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа Жәларбжьаратәи астудентцәа рымш инамаданы Аԥснытәи аҳәынҭқарратә университет аҟны аныҳәатә усмҩаԥгатә даҭааит.

Аҳәынҭқарра Ахада астудентцәа дрыдныҳәалеит, ирзеиӷьеишьеит аихьӡарақәа аҵараҿы, аҭҵаарадырратә усураҿы. 

Ауниверситет аректор Алеко Гәарамиа Аҳәынҭқарра Ахада иҭабуп ҳәа еиҳәеит аҵараиурҭа ганрацәала иаиҭо ацхырааразы. 

Аҟәа. Абҵарамза 17, 2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа Аԥсны иреиҳаӡоу аҵараиурҭақәа рыҟны аҵара зҵо астудентцәа зегьы Жәларбжьаратәи астудентцәа рымш рыдиныҳәалеит.

Адныҳәалараҿы иҳәоуп:

«Акыр иаԥсоу Аԥсны астудентцәа!

Гәык-ԥсык ала иишәыдысныҳәалоит Жәларбжьаратәи астудентцәа рымш.

1941 шықәса абҵарамза 17 рзы афашизм иаҿагыланы иқәԥоз атәылақәа рахьтә астудентцәа жәларбжьаратәи реиқәшәараҿы ишьақәырӷәӷәан астудентцәа Жәларбжьаратәи рымш, аидгылареи акзаареи ирсимволны.

Аҟәа. Абҵарамза 17, 2023 шықәса. Аԥсныпресс. Аԥсны АдәАр Амедиацентр аҿы имҩаԥысит онлаин-конференциа.

Онлаин-конференциа иалахәын: Аахыҵ Кавказ адәныҟатәи аусқәа рминистр Ахсар Џьиоев, Ареспублика Никарагуа адәныҟатәи аусқәа рминистр Денис Монкада, Шьамтәылатәи Арабтә республикаҿы иҟоу Аԥсны ацҳаражәҳәаҩ Мухаммад Али, Приднестровиатәи Молдавиатәи Ареспубликаҿ иҟоу Аԥсны ахаҭарнак Александр Ватаман, «Alpha News» Ермантәыла ахьӡала москватәи аредакциа аредактор Аик Халатиан.

Аконференциа алахәылацәа мраҭашәаратәи НПОқәа, ЕАР амаҵзурақәа русура актуалтә тенденциақәа ирылацәажәеит, рԥышәа еимырдеит иарбоу жәларбжьаратәи аилазаарақәа рнырра аҿагылара аусхк аҟны.

Аҟәа. Абҵарамза 16, 2023 шықәса. Аԥсныпресс. Аԥыза-министр ихаҭыԥуаҩ, аекономика аминистр Кристина Озган Instagram аҟны лдаҟьа аҿы Аԥсны атарифқәа рганахьала ишьақәгылаз аҭагылазаашьеи атарифтә политикеи дрылацәажәеит.   

«2022 шықәсазы атәыла Анапхгара афымцамч азы атарифқәа рышьҭыхра азы акыр ихадоу, аҭакԥхықәра зҵоу аӡбамҭа аднакылеит. Уи зыдҳәалаз зегьы ирдыруа аҭагылазаашьақәа ракәын – ареспублика аенергетикатә система афункциақәа рынагӡара алыршара ауп», - ҳәа илҳәеит  Кристина Озган.

Ԥхынгәымза 1, 2022 шықәсазы ауааԥсыра рзы афымцамч атариф  40 копек рҟынӡа инаӡон.

«Еилкаауп, кВт/с азы 40 копек ахшәаарала еизгахо аԥарала аенергетикатә система аныҟәгара шзалмыршахо. Убри аан иазгәаҭатәуп, 2022 шықәсанӡа ари атариф  10 шықәса ирылагӡаны зныкгьы ишышьҭыҵыцыз.  Сара изныкымкәа исҳәахьеит, афымцамч – ари тауаруп. Исшәырба џьара тауарк ахәԥса змам.  Иарбанызаалак амаҵзура аума, атауар аума аԥара ахшәаара ахәҭаны иҟоуп.  Избан акәзар уи иақәхарџьхоит афинанстә хархәагақәа, амчқәа аамҭа, уҳәа. Ҳара ҳааҟәымҵӡакәа атарифқәа шылаҟәы иаҳзааныжьуам. Убри аан аамҭакала иара асистемагьы иахәҭоу аҭагылазаашьа аҭареи атәыла афымцамч азы аҭаххрақәа зегьы рынагӡареи ҳалымшар ҟалап. Ари иузеицынамыгӡо усқәоуп», - ҳәа иазгәалҭеит лара.

Аҟәа. Абҵарамза 16, 2023 шықәса. Аԥсныпресс. Агәабзиарахьчара аминистр Едуард Быҭәба Гәдоуҭатәи араионтә Хәышәтәырҭа Хада аусура, ахәҭакахьала ахәышәтәырҭа аӡынра ишазхиоу гәеиҭеит. 

Анҭыҵтәи аилацәажәара аҿы арионтә хәашәтәырҭа Хада аҳақьым хада Ҳаџьараҭ Шамба аминистр иарбоу амедусбарҭа аҿы аус шауа адизельтә генераторқәа ҩба, урҭ рахьынтә акы шрезервтәу азы адырра иҭеит .

«Афымцамч арцәара иахҟьаны ҳара апроблемақәа ҳазцәырымҵыроуп, избан акәзар иҳамоу адизельтә генераторқәа рыҩбагьы ибзианы аус руеит, урҭ иахәҭоу ахылаԥшра рымоуп», -ҳәа иҳәеит Ҳаџьараҭ Шамба.

Аҟәа. Абҵарамза 16, 2023 шықәса. Аԥсныпресс. Нестор Цужба ианашьоуп аԥкьаҭмпыл азы 2-тәи аиҳабацәа рразриад, ҳәа адырра ҟанаҵоит аҿари аспорти русқәа рзы аҳәынҭқарратә Еилакы.

Аԥсуа аԥкьаҭмпыласҩы қәыԥш 10 шықса роуп ихыҵуа, аха иара иқәра аҿы Урыстәыла актәи аракетка ҳәа ахьӡ иоухьеит.

Нестор Алеқсандр Островски ихьӡ зху Академиа аҿы Алеқсандр Мальцев инапхгарала иҽазыҟаиҵоит. Иара Арзамеҭ Ҭарба ихьӡ зху Аԥснытәи Ареспубликатә аԥкьаҭмпылтә школ адиректор Елизабеҭ Акәыциа лааӡамҭа иоуп.

Аҟәа. Абҵарамза 16, 2023 шықәса. Аԥсныпресс. Агәабзиарахьчара Аминистрра ашьха иаԥну Ԥсҳәы   ақыҭантәи ауааԥсыра ахәшәқәа рзоурыжьит.  

Аҟәа араион Ԥсҳәы ақыҭа аҿы цәыббрамзазы мҽхакы ҭбаала имҩаԥгаз адиспансеризациа аихшьаалақәа рыла, ақыҭаҿы инхо ачымазцәа рыхәышәтәразы ихымԥадатәиу ахәшәқәа рсиа шьақәыргылан.

Агәабзиарахьчара аминистр Едуард Быҭәба Идҵа инақәыршәаны, аминистрра изыхәҭоу зегьы хәшәыла реиқәыршәара азы ахәшәқәа раахәара еиҿнакааит.

Ахәшәқәа рсиа иалалеит: авитаминтә комплексқәа, аепилепсиаҿагыларатәи аллергиа хызҽуа аппаратқәа, ахьаартәагақәа, антибиотиқәа, антисептикқәа, ашоурартәагақәа.   

Зынӡа иаахәаз ахәшәқа ирақәхарџьхеит 230 нызықь мааҭ инареиҳаны.

Аҟәа. Абҵарамза 16, 2023 шықәса. Аԥсныпресс. Аԥсны адәныҟатәи аусқәа рминистр Идҵа ала Аҷыдалкаатә Зинмчы змоу 2 акласс Ацҳаражәҳәаҩ Артур Гәыргәылиа Аԥсны адәныҟатәи аусқәа Рминистрра  Ааигәатәи Мрагылареи Африкеи Рдепартамент аиҳабыс дҟаҵоуп, ҳәа адырра ҟанаҵоит атәыла адәныҟаполитикатә Хылаԥшырҭа апресс-маҵзура.  

Артур Гагәылиа 20-шықәса инареиҳаны Аԥсны адәныҟатәи аусқәа Рминистрра аҿы аус иуеит. Иара еиуеиԥшым ашықәсқәа рзы иарбоу ахылаԥшырҭа ихадоу адепартаментқәа анапхгара аиҭон.  

2012 ш. – Аԥсны адәныҟатәи аусқәа Рмин

Аҟәа. Абҵарамза 15, 2023 шықәса. Аԥсныпресс. Аԥсны адәныҟатәи аусқәа рминистрра Амедиацентр аҿы имҩаԥысит Адәныҟатәи аусқәа рминистр Инал Арӡынбеи Ҭырқәтәыла иҟоу аԥсуа культуратә центрқәа Рфедерациа ахантәаҩ ҿыц Левент Аҭрышбеи Ҭырқәтәыла иҟоу Аԥсны азинмч змоу ахаҭарнак Ибраҳим Аҩӡбеи онлаин реицәажәара.

Инал Арӡынба Левент Аҭрышба идиныҳәалеит инапынҵа ҿыц, изеиӷьеишьеит иусураҟны ақәҿиарақәа, ҳәа адырра ҟанаҵоит Аԥсны адәныҟатәи аусқәа Рминистрра апресс-маҵзура.  

Аҟәа. Абҵарамза 15, 2023 шықәса. Аԥсныпресс. Атәыла агәабзиарахьчара аминистр Едуард Быҭәба ахырхарҭа иақәшәо аҳақьымцәа алархәны Аҟәатәи аҿыкчымазара ахәышәтәырҭа ашьаҭаҿы ареанимациатә ҟәша аартра азҵаара алацәажәаразы аусуратә еилатәара мҩаԥигеит, ҳәа адырра ҟанаҵоит атәыла агәабзиарахьчара Аминистрра апресс-маҵзура.

Аилатәара рхы аладырхәит аминистр ихаҭыԥуаҩ Саида Делбеи Аҟәа ақалақь Ахадара Агәабзиарахьчара Аусбарҭа анапхгаҩы Ирма Воубеи.

Аҟәатәи аҿыкчымазаратә хәышәтәырҭа аҿы ареанимациатә ҟәша аартразы аԥшьгара ҟарҵеит иарбоу ахәышәтәырҭа анапхгара.