Аҟәа. Абҵарамза 15, 2023 шықәса. Аԥсныпресс. Урыстәылатәи Афедерациа аҟны иҟоу Аԥсны Аҳәынҭқарра Ацҳражәҳәаҩ Алхас Кәыҵниа абҵарамза 15 рзы Урыстәыла аккредитациа змоу аҳәаанырцәтәи ацҳаражәҳәаҩцәа рзы ҷыдала еиҿкааз, «Урыстәылатәи Афедерациа иуникалтәу аихьӡарақәеи алшарақәеи ирызку» Жәларбжьаратәи ацәыргақәҵа-афорум «Урыстәыла» ахь аекскурсиа ихы алаирхәит.  Жәларбжьаратәи ацәыргақәҵа-афорум «Урыстәыла» Жәлар Рынхамҩа Аихьӡарақәа Рцәыргақәҵа аҿы абҵарамза  4 рзы аофициалла иаатит. Уи аус аулоит мшаԥымза 12, 2024 шықәса аҟынӡа.  

Аекскурсиа аҳәаақәа ирҭагӡаны аҳәаанырцәтәи апартниорцәа аус рыцуразы аперспектива ҿыцқәа аазыртуа Урыстәыла ааглыхратә, аенергетиатә, атехнологиатә, акультуратә потенциал аиҳарак ахшыҩзышьра аҭан.

Аҟәа. Абҵарамза 15, 2023 шықәса. Аԥсныпресс.  Асалам шәҟәы зҭоу аԥатлыка Аԥснынтәи Анапаҟа инаӡеит, ҳәа адырра ҟанаҵоит «Вестник Кавказа».

Анапа амшын аҟәара иҿықәнажьлеит асалам шәҟәы зҭоу аԥатлыка. Уи уаанӡа Пицунда зыԥсы зшьоз атуристцәа аӡы ихырҵеит.  

«Ари иреиӷьу курортуп! Иаҳҭаху ҳгәы иҭакны ҳацҳамҭа зҭоу аԥатлыка амшын ихаҳҵоит», – ҳәа иаҳәоит асаламшәҟәы атекст.

Асаламшәҟәы авторцәа уи зыԥшааз анасыԥ изеиӷьаршьеит.

Ари асаламшәҟәы зҭаз аԥатлыка  10 мыш аӡы ихын, уи ари аамҭа иалагӡаны  350 км. рҟынӡа инаскьеит. Иара дәықәҵан цәыббрамза  26 рзы.

«Жьҭаарамза 6 рзы аҳәарԥарра Малыи Утриш ахылаԥшратә ҵакыра  ахыи-аҵыхәеи дырхысуа ари аҳәарԥсарра аинспектор игәеиҭеит иарбоу ацҳамҭа», - ҳәа адырра ҟарҵеит аҳәарԥсарра апресс-маҵзура аҟны.

Аҟәа. Абҵарамза 15, 2023 шықәса. Аԥсныпресс. Залсралшара ҳараку амашьынақәа ааигәа Аԥсны Иҷыдоу аҭагылазаашьақәа рзы Аминистрра амедицинатә усбарҭа аԥшаара-еиқәырхаратә отриад ахь инагахоит.

Иҷыдоу атранспорт аҳәынҭқарратә биуџьет аԥаратә хархәагақәа рыла иаахәоуп. 

Аҟәа. Абҵарамза 15, 2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа инарҭбааны аилацәажәара мҩаԥигеит Ахада Иадминистрациа, Аиҳабыра рнапхгара, ақалақьтәи, араионтәи администрациақәа рхадацәа, апарламенттә еилакқәеи аӡбаратә еилазаареи рнапхгаҩцәа алархәны.

Аилацәажәараан аҳәынҭқарра Ахада аиԥылара иалахәыз Урыстәылатәи Афедерациахь иусуратә ныҟәара алҵшәақәа рылеиҳәеит.

Иара убас аилацәажәараҟны иахцәажәеит афымцамчтә шәарҭадареи аекономикаҿы иактуалтәу азҵаарақәеи.

Аҟәа. Абҵарамза 15, 2023 шықәса. Аԥсныпрессс. Абҵарамза  15 рзы Агәыҳалалратә фонд «Ашана» имҩаԥнаго акциа хада «Ҳаидгыланы аԥсҭазаара еиқәҳархап» 12 шықәса ахыҵуеит!

12 шықәса – ари имаҷу, мамзаргьы ирацәоу?

Ари азҵаара аҭак ҟарҵоит Акультура-гәыҳалалратә Фонд «Ашана» аусура аеффективра атәы зҳәо арбагақәа.

Убас, иҳаҩсыз 12 шықәса рыла ачымазара бааԥсқәа змоу ахәыҷқәа рыхәышәтәра иазоуҳажьхьеит 101 миллион 878 нызқьи 425 мааҭ. 427-ҩык ахәыҷқәа рзы 621 курс ахә шәоуп.  260 инареиҳаны агәыҳалалратә акциақәа мҩаԥган.  

Аҟәа. Абҵарамза 15, 2023 шықәса. Аԥсныпресс. Зыԥсҭазаара иалҵыз аштангашьҭыхҩы, жәларбжьаратәи акласс аспорт азҟаза, Асовет Еидгыла, иара убасгьы адунеи арекордсмен, атлетика хьанҭазы ачемпион, Аԥсны жәлар Рџьынџьтәылатәи еибашьра аветеран, Леон Иорден акавалер, «Ахьӡ-Аԥша III аҩаӡара аорден занашьоу Руслан Расим-иԥа Ҭаркьыл иԥсыжра аиҿкаара азы аԥыза-министр актәи ихаҭыԥуаҩ Џьансыхә Нанба ихантәаҩрала аҳәынҭқарратә комиссиа еиҿкаауп.  

Аҟәа. Абҵарамза 15, 2023 шықәса. Аԥсныпресс. 74-шықәса дшырҭагылаз иԥсҭазаара далҵит аштангашьҭыхҩы, жәларбжьаратәи акласс аспорт азҟаза, Асовет Еидгыла, иара убасгьы адунеи арекордсмен, атлетика хьанҭазы ачемпион, Аԥсны жәлар Рџьынџьтәылатәи еибашьра аветеран, Леон Иорден акавалер, «Ахьӡ-Аԥша III аҩаӡара аорден занашьоу Руслан Расим-иԥа Ҭаркьыл. 

«Алегенда иалиааз, хьӡи-ԥшеи згымыз ҳаспортсменцәа рыԥсҭазаара ралҵра гәыхь дууп. Руслан Расим-иԥа дыздыруаз зегьы рзы дҿырԥшыганы даанхоит. Иара ииааирақәа рҿырԥшала иааӡан аԥсуа ҿар рабиԥарақәа акыр. Аԥсны аҿари аспорти русқәа рзы аҳәынҭқарратә Еилакы гәалсра дула ирыдышшылоит Руслан Расим-иԥа Ҭаркьыл иуацәеи иҭынхацәеи, иара убас иҩызцәеи.  Ари даара цәыӡ дууп  аспорттә еилазаара зегьы азы», - ҳәа иазгәаҭоуп аҳәынҭқарратә Еилакы иҟанаҵо адышшылара аҿы.

Аштангашьҭыхыҩ, Асовет Еидгыла ачемпион, адунеи арекордсмен Ҭаркьыл Руслан Расим-иԥа диит 1950 шықәса лаҵара 5 рзы Гәдоуҭа араион Дәрыԥшь ақыҭан.

1972 шықәсазы далгеит Аҟәатәи аҳәынҭқарратә арҵаҩратә Институт. Аҟәа ақалақь аҿы атлетика хьанҭа ала иҽазыҟаиҵо далагеит. Атлетика лас азы – аихампыл аршәразы Аԥсны арекордсмени ачемпиони ҳәа ахьӡ ихҵахеит.

1969 шықәсазы Руслан Ҭаркьыл атлетика хьанҭа азы арԥарцәа рыбжьара Асовет ачемпионс дҟалеит, 1970 шықәсазы –  аиуниорцәа рыбжьара Асовет Еидгыла ачемпион ҳәа ахьӡ ихҵахеит.

Аҟәа. Абҵарамза 15, 2023 шықәса. Аԥсныпресс.  Аԥснытәи аспортсмен Елҟан Ӷәазаа атлетика хьанҭазы Урыстәыла аԥхьахә агараҿы 124 кьыла  агәыҵасрала ашьҭыхраҿы аиааира игеит.

Елкан Ӷәазаа Урыстәыла Аԥхьахәгара аҿы игаз аиааира изикит зыԥсҭазаара иалҵыз иабжьгаҩ, иара изы иҿырԥшыганы иҟаз, аштангашьҭыхҩы, жәларбжьаратәи акласс аспорт азҟаза, Асовет Еидгыла, иара убасгьы адунеи арекордсмен, атлетика хьанҭазы ачемпион, Леон Иорден акавалер, «Ахьӡ-Аԥша III аҩаӡара аорден занашьоу  Руслан Расим-иԥа Ҭаркьыл.  

Аицлабрақәа мҩаԥысуеит Ареспублика Адыгеиа Маиҟәаԥ ақалақь аҿы. Уи иалахәуп Урыстәыла 45 регион рҟынтәи 450-ҩык аспортсменцәа.

Елҟан Гәазаа зыкапантә категориа 67 кьыла рҟынӡа иҟоу рыбжьара Татарсҭан ахьӡала дықәгылон.

Аҟәа. Абҵарамза 14, 2023 шықәса. Аԥсныпресс.  Аԥсны асахьаҭыхыҩцәа Реидгыла иатәу ацәыргақәҵатә зал Хада аҟны иаатит «Амра ашәахәақәа» ҳәа хыс измоу аԥсуа сахьаҭыхыҩ Борис Ашәба хаҭалатәи ицәыргақәҵа.

Ацәыргақәҵа ахь инагоуп 100 инареиҳаны аусумҭақәа –  иҿыханҵоу аԥсабарасахьақәеи апортретқәеи, иара убас амҳаџьырра атема иазку аусмҭақәа рсериа.

Ицәыргақәҵоу аусумҭақәа рхыԥхьаӡараҿы иҟоуп – «Амреи амзеи реиԥылара», «Агәыӷра», «Ажәытә Аҟәа», «Абугенвиллиа ашәҭра», «Зыԥсадгьыл зцәыӡыз - зегьы ицәыӡит», «Шьыжьбзиа, исызгәакьоу Аҟәа», «Ашьхақәа рыԥсыԥлагаҩагара», «Ажәҵысқәа», «Иҭынчу афҩышьҭқаара», «С. Ҷанба ихьӡ зху Аԥснытәи аҳәынҭқарратә драматә театр», «Адоуҳамч», «Ашымҳа ашәшьыраҿы», уҳәа убас ирацәаны.  

Ацәыргақәҵа аартуа, Аԥсны асахьаҭыхыҩцәа Реидгыла ахантәаҩы Витали Џьениа еизаз бзиала шәаабеит ҳәа реиҳәеит, иара убас Борис Ашәба  дидныҳәалеит.

«Араҟа иахьа ицәыргоу аусумҭақәа рхыԥхьаӡараҿы  Москва ақалақь аҿы еиԥш асахьаҭыхыҩ иԥсадгьыл аҿы иҭихқәазгьы ыҟоуп. Аиҳарак уи иусумҭақәа Аԥсны акультура иазкуп. Ҳара иколлегацәа-асахьаҭыхыҩцәа уи иусура ахәшьара ҳаракы аҳҭоит», - ҳәа иҳәеит Витали Џьениа.

Аҟәа. Абҵарамза 14, 2023 шықәса. Аԥсныпрсс. Калдахәаратәи ашкол-интернати Бзыԥтәи абжьаратәи ашколи 80-ҩык инареиҳаны аҵаҩцәа актәи аҳақьымнӡатәи ацхыраара аҭара азы атренингқәа рхы аладырхәит.

Атренингқәа еиҿкаахеит Аԥсуа-база Жәлар Адунеизегьтәи Рконгресси Иҷыдоу аҭагылазаашьақәа рзы Аминистрра аспециалист Индира Амҷбеи.

Аҵаҩцәа лабҿаба иддырбеит аԥсмаҷхарақәа, абылрақәа, ауаҩы амра ихы ианаслак, абҩаԥҵәара, ахәахәа-чахәарақәа, ашьацарақәа,  аԥстәы ауаҩы ианицҳа, уҳәа рышьҭахь актәи амедицинатә цхыраара аҭара шымҩаԥгатәу  атәы рзеиҭарҳәеит.

Аҵаҩцәа иара убас ишиашам агәы амассаж аҟаҵара, иара убас иҷыдоу атренажиор ала иԥсабаратәым аԥсыԥлагаҩагареи ртехника аилкааразы  алшара рыман.