Автоҳәынҭинспекциа аусура ахылаԥшра азҭо, аҩныҵҟатәи аусқәа рминистр ихаҭыԥуаҩ Беслан Ҷкадуа ишазгәеиҭаз ала, азинхархәаралшара аганахьала азҵаарақәк ыҟоуп. Убри инамаданы, иара, иарбоу азҵаара аҿы Жәлар Реизара-Апарламент адепутатцәа активла аус рыцура ахәҭоуп ҳәа инаҵшьны иазгәеиҭеит.
Аҩныҵҟатәи аусқәа рминистр Автоҳәынҭинспекциа Аусбарҭа анапхгаҩы ҿыц Дамеи Аҩӡба иҟынтәи хра злоу алҵшәақәа аазырԥшыша аӡбамҭақәа рыдкылара дшазыԥшу, аха убри аан урҭ рзы иара хаҭала аҭакԥхықәра шынаигӡало азгәеиҭеит. Убри аан аҩныҵҟатәи аусқәа Рмнистрра анапхгаҩцәа Автоҳәынҭинспекциа Аусбарҭа ипопулиарм аӡбамҭақәа ракәзаргьы, аха амҩа-транспорттә машәыртә хҭысқәа рырмаҷреи ауааԥсыра рыԥсҭазаара аиқәырхареи алзыршо рынагӡараҿы ацхыраара шарҭало азгәарҭеит, ҳәа адырра ҟанаҵоит атәыла аҩныҵҟатәи аусқәа Рминистрра апресс-маҵзура.
