Лара илгәалалыршәеит ари афестиваль шаԥҵаз 2001 шықәсазы лани лаби ргәалашәара иазкны.

Хьыбла Герзмаа иазгәалҭеит акыр шықәса ирылагӡаны афестиваль аусура аҿы ишлывагылоу лара лҩызцәеи рколлегацәеи:

«Ильдар Абдразаков уажәадагьы Аԥсныҟа даахьеит, иара ҳара ҳҩыза ду иоуп. Акыр зыхьӡ нагоу амузыканцәа Аԥсныҟа иаахьеит. Урҭ иреиуоуп Владимир Спиваков, Елена Образцова, Денис Мацуев».

Ильдар Абдразаков Аҳәынҭқарра Ахада иҟаиҵаз адкыларазы, иара убас Хьыбла Герзмаа ари зеиӷьаҟам акультуратә усмҩаԥгатә Аԥсны еиԥш Урыстәылагьы иахьымҩаԥылго азы  иҭабуп ҳәа еиҳәеит.

«Ари афестиваль Аԥсни Урыстәылеи ирыбжьоу аимадара еиҳагьы иарӷәӷәоит, акультура аганахьала ҳаизааигәанатәуеит, еиҳа аԥхарра ҳабжьалоит.  Сара сзы насыԥ дууп Хьыбла Герзмаа еиҿылкаауа ари афестиваль Урыстәыла еиԥш Аԥсныгьы алахәхара. Сара уажәадагьы Аԥсныҟа саахьеит, аха есымша сгәы хыҭхыҭуеит арахь санаауа, еиуеиԥшым аплошьадкақәа рҿы санықәгыло, аиашазы, аԥсуа жәлар ргәыбылра скит», –  ҳәа инаҵшьны иазгәеиҭеит Ильдар Абдразаков.

Аҳәынҭқарра Ахада Аслан Бжьаниа  Ильдар Абдразаков «Аԥсны жәлар рартист» ҳәа ахьӡ ихиҵеит. Абри азы Ахада Аусԥҟа инапы аҵаиҩит ԥхынгәымза 15 рзы.

Аоператә шәаҳәаҩы Аҳәынҭқарра Ахада иҭабуп ҳәа еиҳәеит иоуз аџьшьара азы, ҳаҭыр ақәҵаны, гәадурала ишныҟәигало азгәаҭаны.

Аҳәынҭқарра Ахада асасцәа агәаларшәагатә ҳамҭақәа риҭеит. 

Амузыкатә фестиваль «Хьыбла Гьерзмааԥҳа шәаалыԥхьоит» аатуеит Аҟәа, ԥхынгәы 15 рзы. Аԥснытәи апрограмма хә-концертк рыла ишьақәгылоуп. Аҽа ф-концертки аҟазаратә-классқәеи Урыстәыла ақалақьқәа рыҟны имҩаԥысуеит, ҩба – Китаи.