«Сыжәлар гәакьа, бзиа избо ауаа, ҳаҳҭнықалақь иаҭааз асасцәа, зегьы иахьа алшара роуеит Маринтәи атеатр аоркестр амузыка шьахә азыӡырҩра», - ҳәа илҳәеит лара.

Хьыбла Герзмаа Аҳәынҭқарра Ахадеи афестиваль аиҿкаараҿы ацхыраара ҟазҵо зегьи иҭабууп ҳәа ралҳәеит.

«Сара насыԥ сыманы исыԥхьаӡоит, иҭабуп ҳәагьы сҳәоит Аҳәынҭқарра Ахада Аслан Бжьаниа иҟантәи, Аԥсны акультура Аминистрреи аӡәырҩы сҩызцәа-амеценатцәа рҟынтәи есымша еиԥш уажәгьы ас еиԥш ацхыраареи адгылареи ахьҳауо. Ҳара ацхыраара ду ҳанаҭеит Урыстәылатәи Афедерациа Ахада иҟны иҟоу акультуратә аԥшьгарақәа Рфонд. Ирацәаны ауаа ҳфестиваль ацхыраара иазхиоуп», - ҳәа илҳәеит  Хьыбла Герзмаа.

Аԥсныҟа иаара аҟынтәи иоуз ацәаныррақәа ртәы еиҭеиҳәеит Ильдар Абдразаков.  

«Сара сзы насыԥ дууп ари иџьашьаху атәыла аҭаара, акыр шықәса раахыс сҩыза гәакьаны иҟоу Хьыбла Герзмааԥҳа лывагылара азы алшара ахьсоуз. Иҟан аамҭақәак, ари иналукааша ҳашәаҳәаҩ  лааигәара агыларагьы схахьы ианысзаамгоз. Иахьа сара сааит исылшо ала Хьыбла Герзмааԥҳа лфестиваль амҩаԥгараҿы адгылара лысҭарц азы», - ҳәа иҳәеит иара. Ильдар Абдразаков иара убас гәахәарыла иазгәеиҭеит Башкортосҭани Ҭаҭарсҭани Жәлар рартист ҳәа имаз ахьӡ инамаданы иахьарнахыс иара Аԥсны Жәлар рартист ҳәа ахьӡ шихҵоу.