Аҟәа. Ԥхынгәымза 16, 2024 шықәса. Аԥсныпресс. Ԥхынгәымза 15 рзы, Аԥсны Аҳәынҭқарра Ахада Аслан Бжьаниа Апарламент адепутатцәа, Аԥсны араионқәеи ақалақьқәеи рхадацәа алархәны инарҭбааз аилатәара мҩаԥигеит. Абри атәы аанацҳауеит Аҳәынҭқарра Ахада ипресс-маҵзура.
Аиԥылара иалахәын, иара убас Аҳәынҭқарра Ахада ихаҭыԥуаҩ Бадра Гәынба, атәыла аԥыза-аминистр Анқәаб Алеқсандр, Жәлар Реизара Аиҳабы Ашәба Лаша, Аконстиуциатә ӡбара ахантәаҩы Диана Ԥлиа, апрокурор Хада Адгәыр Агрба, Аҳәынҭқарра Ахада Иубарҭа анапхгаҩы Абесалом Кәарҷиа, Иреиҳаӡоу Аӡбара Ахантәаҩы Саида Быҭәба, Ашәарҭадара Ахеилак Амаӡаныҟәгаҩ Сергеи Шамба, Аҳәынҭқарра Ахада Иусбарҭа анапхгаҩы ихаҭыԥуаҩ Зураб Қаџьаиа, аиҳабыра алахәылацәа, амчратә усбарҭақәа рнапхгаҩцәа.
Амшхәаԥштә аҟны иқәгылан «Аԥсны Аҳәынҭқарра Очамчыра, Тҟәарчал, Гал араионқәа рсоциал-економикатә ҿиара аҩаӡара ашьҭыхразы уснагӡатәқәак рзы» азакәан апроект алацәажәара. Адепутатцәа Герман Қарчаа, Беслан Емырхәба, Алмас Акаба Аԥсны Жәлар Реизара - Апарламент аҟны ашәҟәы иҭаргалаз ари азакәанапроект хықәкыс иамоуп Аԥсны мрагыларатәи арегионқәа рыҟны асоциал-економикатә ҭагылазаашьа аиӷьтәра.
Аизара иалахәыз реиҳараҩык Тҟәарчал, Очамчыра, Гал араионқәа аекономикатә цхыраара хымԥада ишырҭаху азгәаҭаны иарбоу азакәан апроект адгылара арҭеит. Аслан Бжьаниа иҳәеит арҭ араионқәа рсоциал-економикатә ҿиара аҳәынҭқарразы акыр шаҵанакуа, убри аҟнытә хырԥашьа змам ауснагӡатәқәа шымҩаԥгатәу.
Ари азакәан апроект адкылара шьаҿа бзиахоит Аԥсны мрагыларатәи ахәҭа аҿиареи аҭышәынтәалареи рус аҟны, ари арҭ араионқәа рыҟны аԥсҭазаара акыр еиӷьнатәуеит, иара убас аекономика ашьҭыхразы аҭагылазаашьа аԥнаҵоит.
Аԥсны Жәлар Реизараҟны иаарласны ари азакәанапроект иахәаԥшраны иҟоуп.
