Аҟәа. Мшаԥымза 1, 2024 шықәса. Аԥсныпресс. Аԥсны асахьаҭыхыҩцәа Реидгыла иблыз ахыбра аҿы аилыргаратә усурақәа рымҩаԥгараан, Амилаҭтә сахьатә галлереиа ахьыҟаз аҩбатәи аихагыла аҿы еиқәхаз усумҭақәак рыԥшааит.
«Иахьатәи амш ҳақәҿиеит ҳәа уҳәаратәы иҟоуп. Уаанӡа ҳара иҳамԥыхьашәон Валентина Хәырхәмал лнапы иҵыҵыз акерамикатә вазақәа – мыцхәы идууцәам афигуркақәа, иара убас Виачеслав Хәырхәмал идекоративтә ваза. Иахьа ирыԥшааит Валентина Хәырхәмал лусумҭақәа зегьы рҟынтәи еиҳа аҵакы змоу – аскульптуратә композициа «Аҽыбӷаҟаза хәыҷқәа» (Маленькие наездники»). Ари еицырдыруа усумҭоуп. Уи изныкымкәа Аԥсны еиԥш уи анҭыҵгьы еиуеиԥшым ацәыргақәҵақәа рҿы иқәдырглахьан», – ҳәа иҳәеит Амилаҭтә сахьатә галлереиа адиректор Сурам Сақаниа.
Еиқәхеит иара убас Алеқсандр Чачба-Шервашиӡе иусумҭақәакгьы. Урҭ иреиуоуп – «Мадемуазель Бессон», «Женщина в красной шляпе», иара убас атетралтә декорациақәеи акостиумқәеи рзы аескизқәак.
«Ҳара ари даара ҳаигәырӷьеит. Иҟалап џьара еиҭа ак аԥшаара ҳалшаргьы», – ҳәа иазгәеиҭеит Сурам Сақаниа.
Ажьырныҳәамза 21 ауха Аԥсны асахьаҭыхыҩцәа Реидгыла Ацәыргақәҵатә зал Хада ахыбра аҿы абылра ҟалеит. Амилаҭтә сахьатә галереиа афондқәа рҿы иҟаз ԥшь-нызықь усумҭа рҟынтәи еиқәхаз аусумҭақәа рхыԥхьаӡара 200 цыра иреиҳаӡам.
