Франциа гигориантәи амзар ахь аиасра ашьҭахь, иулиантәи амзар иадгылоз ауаа мшаԥымзазы ашықәс ҿыц алагара азгәарҭон. Урҭ уи аҽны уамашәа иубаша аҳамҭақәа роуан. Уажәы Франциа мшаԥымза 1 раԥхьатәи мшаԥымзатәи амш аԥсыӡ ҳәа иашьҭоуп, избан акәзар уаанӡа ари амш Аԥсыӡқәа реҵәаџьаа аҿы иҟан, убасҵәҟьа ақьырсиантә хыҵхырҭақәа аман, избан акәзар Ачгара Ду аамҭа иақәшәон. Шәара ари амш азы Франциа шәҟалар, насгьы џьара аӡәы шәашьҭахь, шәыбӷа ақьаад иалху аԥсыӡ адирҷаблар, уамашәа ишәымбан, избан акәзар уи хәмаршақә инарыгӡо атрадициақәа руак ауп.
Великобританиа ари аныҳәа убасҵәҟьа егьи амзар ахь аиасра иадҳәалоуп, аха шьыбжьонынӡа ауп алаф аҳәара аныҟало, мап анакәха аманшәалара уцлаӡом ҳәа иԥхьаӡоуп.
Испаниа Аччара Амш азгәарҭоит ԥхынҷкәынмза 28 рзы, убри аҟнытә мшаԥымза 1 шамахамзар иазгәасҭо маҷҩуп, аха араагьы шәара шәыбӷа ақьаад иалху ауаҩы исахьа ақәдырҷабыр алшоит. Ари амш аҽны аԥара уалла аҭара ҟалаӡом ҳәа иԥхьаӡоуп, избанзар урҭ рыргьежьра ахәҭаны иҟам, убас иҟоуп атрадициа.
Еиду Америкатәи Аштатқәа рҿы зегьы даара имриоуп. Урҭ рҿы иаԥуп амассатә информациа ахархәагақәа рҿы ихыҭҳәаау ажәабжь ҿыцқәа ркьыԥхьра. Ауаа алаф еибырҳәоит, иҵәылеибахуеит, зымҩаԥгара азԥхьагәаҭам аумҩаԥгатәқәа рахь ааԥхьарақәа еимырдоит.
Аҟәа ақалақь ауааԥсыреи уи иаҭаауа асасцәеи мшаԥымза 1 атеатр аҿы иазгәарҭарц алшара рымоуп. Ари амш аҽны Аурыс Драматә Театр аҿы Уильиам Шекспир ипиеса ала иқәыргылоу акомедиа «Виндзортәи аҳәса цәикқәа» аԥхьарбара мҩаԥгахоит, аҿатә театр аҿы - Д. Псафас ипиеса ала иқәыргылоу аспектакль «Амцҳәаҩ даҭахуп» («Требуется лжец») мҩаԥысуеит.
Џьоукы-џьоукы ауаа ари амш даараӡа активла рҽазыҟарҵоит, иоригиналу акриативтә лафқәеи ахыхәмаррақәеи рхәыцуеит. Изеиԥшразаалак аԥкра ҳәа акгьы ыҟам, аха зегьы ирыцку урҭ ауаҩы иаҳаҭыр ладмырҟәазароуп, аӡәгьы ааха имоуроуп.
Аччара Амш ауаа абжьааԥнытәи русқәеи рыпроблемақәеи рызхәыцра амыцхәрас ргәалаҟазаара ашьҭыхреи алафҳәареи анеиӷьаршьо мшны иҟоуп. Ари амшныҳәа узырччаша, угәалаҟазаареи уааигәа-сигәа иҟоу ргәалаҟазаареи шьҭызхуа зеиӷьаҟам аҿыҵга ауп.
