Аҟәа. Хәажәкырамза 23, 2024 шықәса. Аԥсныпресс. Урыстәылатәи Афедерациа Ахада Владимир Путин «Крокус Сити Холл» иҟалаз атеррористтә акт инамаданы атәылауаа рахь ааԥхьара ҟаҵо дықәгылеит.
--- Ҳаҭыр зқәу Урыстәыла атәылауаа!
Шәара шәахь ааԥхьара ҟасҵоит жәаҩыла акагьы зхарамыз аҭынч уааԥсыра – ҳара ҳџьынџьуаа, зықәра наӡам аҿари ахәыҷқәеи аҳәсеи уахь иналаҵаны рҭахара зыхҟьаз, ишьаарҵәыраз атеррористтә акт инамаданы. Ааха зауз, зҭагылазаашьа уашәшәыроу зегьы рыԥсҭазаара аиқәырхара азы уажәы аҳақьымцәа ирылшо зегьы ҟарҵоит. Агәра згоит, урҭ ирылшогьы ирылымшогьы зегьы шыҟарҵо ахәрақәа зауз реиқәырхара азы. Ҷыдала иҭабуп ҳәа расҳәарц сҭахуп ирласу амедицинатә цхыраареи асанитартә авиациеи рекипажқәеи иҷыдоу аҟәшеиҵақәа рыруааи амцарцәаҩцәеи аԥсеиқәырхаҩцәеи. Урҭ ирылшоз зегьы ҟарҵеит ауаа рыԥсқәа аиқәырхаразы, амца ралгаразы.
Атрагедиа аныҟала раԥхьатәи аминуҭқәа инадыркны аҳақьымцәеи иҷыдоу амаҵзурақәа русзуҩцәеи ирывагыланы хацәнымырха арыцҳара иақәшәаз ацхыраара рызҭоз, ахәышәтәырҭақәа рахь иназгоз ауаа ртәы сымҳәар алшом.
Зыҩнаҭақәа рҿы агәырҩа неиз аҭаацәа, еиуеиԥшым ахәрақәа зауз иахәҭоу ацхыраара раҳҭоит. Зыуацәеи зҭынхацәеи зыԥхаз зегьы срыдышшылоит. Шәара шәгәырҩа шәыцеиҩыршоит Урыстәыла атәылауаа зегьы. Хәажәкырамза 24 азеиԥшмилаҭтә лахьеиқәҵаратә мшны ирыласҳәоит.
Москва ақалақьи Москватәи аобласти, атәыла арегионқәа зегьы рҿы атеррористҿагыларатәи адиверсиақәа рыԥхьырҟәҟәааратәи аҟазшьа змоу иназыцҵоу ауснагӡатәқәа мҩаԥгахоит. Уажәы зегьы ирыцку – ари ашьаарҵәыратә акт аԥшьызгази иназыгӡази уаҳа ацәгьоура ҟарымҵарц азы раанкылара.
Ари ацәгьоура аилыргареи аоператив-ԥшааратә уснагӡатәқәа рылҵшәақәеи ртәы акәзар, уажәазы иҟоу абри ауп. Атеракт назыгӡоз рыԥшьҩык ԥшааны иаанкылоуп. Урҭ аҽӡара рҽазышәо Украина аганахьала амҩа иқәын. Уаҟа, иҟоу адыррақәа рыла, урҭ рзы Украина аганахьала аҳәынҭқарратә ҳәаа ахысразы амҩа рзырхиан. Зынӡа иаанкылоуп 11-ҩык. Урыстәылатәи Афедерациа Афедералтә шәарҭадара Амаҵзура, егьырҭ азинхьчаратә усбарҭақәа атеррористцәа разыҟаҵаратә база зегьы: урҭ атранспорт ала еиқәзыршәоз, ацәгьоура ахьыруаз аҭыԥ аҟынтәи излацашаз амҩа дзырбоз, рабџьари рџьаԥҳани аҭаҵәахқәа еиқәзыршәоз, уҳәа ацәгьоура аиҿкаара напхгара азҭоз зегьы рааԥшреи раанкылареи рганахьала аус руеит.
Даҽазныкгьы исҳәоит, аусеилыргаратә азинхьчаратәи аусбарҭақәа ацәгьоура иадҳәалоу афактқәа зегьы реилкааразы зегьы ҟарҵараны иҟоуп. Аха уажәанатә иубаратәы иҟоуп ари иацклаԥшны, цәгьахәыцрала еиҿкааз атеракт адагьы, заанаҵы рҽазыҟаҵаны массала акагьы зхарамыз аҭынч уааԥсыра рнырҵәара иазырханы еиҿыркааз ацәгьоура бааԥсы шакәыз. Ацәгьоуцәа рыцҳашьарак ҟамҵаӡакәа ицон ҳауаажәлар, ҳхәыҷқәа рышьра гәҭакыс иҟаҵаны. Иҳаҩсхьоу аамҭақәа рзы анацистцәа аоккупациа ззыруз атерриторақәа рҿы ишыҟарҵалоз еиԥш ашьаарҵәыратә цәыршәаратә акциа мҩаԥыргарц рыӡбеит.
Ари ацәгьоура аԥшьызгаз, еиҿызкааз, иназыгӡаз зегьы хымԥада ақәнага иақәыршәахоит. Иазусҭцәазаалакгьы, иаазышьҭзаалакгьы, урҭ ажәлар ргәырԥса рықәымшәар ҟалом! Ҽазныкгьы исҳәоит, атеррористцәа ирыдҳәалоу, ари игыгшәыгу ацәгьоура еиҿызкаауаз, Урыстәыла, ҳара ҳажәлар ааха ду азҭаз зегьы хымԥада еилкааны иахьҳархәуеит! Ҳара шьахәлаҵәҟьа иаадыруеит атерроризм ашәарҭара атәы. Араҟа гәыкала ҳхьааи ҳгәырҩеи ҳацеиҩызшо, аус аҿы ҳамчқәа еилаҵаны зегьы иаҳзеиԥшу аӷа – жәларбжьаратәи атерроризми уи иацу ацәырҵрақәеи рҿагылара иазхиоу аҳәынҭқаррақәа рыцхыраара ҳақәгәыӷуеит.
Амилаҭ змам, аринахысгьы изоурангьы иҟам атеррористцәа, ауаҩшьцәа, ауаабааԥсқәа ирзыԥшу акоуп – агәырԥса ахьӡареи ақәӡаареи. Ԥхьаҟатәи аԥеиԥш урҭ ирымам. Ҳара зегьы: афронт аҿы еибашьуа ҳҩызцәа, ҳҳәынҭқарра атәылауаа зегьы уажәы иаҳуалԥшьоу акоуп – акзаареи аусеицуреи. Агәра згоит, ус иагьыҟалоит!
Избан акәзар аӡәгьи, акагьы ҳара ҳаидкылазаареи ҳгәамчхареи рыҵшәаара илшаӡом. Ҳара ҳагәаӷьреи ҳфырхаҵареи Урыстәыла иаку ажәлар амчи еицакра роуӡом ахаангьы. Аӡәгьы илшарым милаҭрацәала еилоу ҳауаажәларратә ҭаацәара аиӷара, ашәара, аҳәоуеиқәымшәара рылазҵо ишҳаму ажәла акра.
Урыстәыла уажәаԥхьагьы изныкымкәа иуадаҩӡоу, уи моу, зыхгара цәгьоу аԥышәарақәа ирхысхьан, аха уи еиҳагьы иаӡрыжәуан, иӷәӷәаҟацаӡа иҟанаҵон. Уажәгьы убасҵәҟьа иҟалоит.
