Аҟәа. Ԥхынгәымза 11, 2023 шықәса. Аԥсныпресс.  Илеиз ақәаршҩы аҳҭнықалақь митәык аԥырхага анамҭаӡеит.  Абри азы адырра ҟаиҵеит аҳҭнықалақь Ахадара анхара-коммуналтә Нхамҩа Адепартамент адиректор ихаҭыԥуаҩ Руслан Аҩӡба.

«Аԥхынра аӡиасқәа рышьҭрақәа рыҭрыцқьаара иазкны имҩаԥгаз аусурақәа алҵшәа бзиақәа аадырԥшит. Басла, Аӡаԥшь аӡиасқәа хымҵӡеит. Абжьааԥны аӡы зҵалоз Бегәа имҩеи Титов имҩеи уажәы аӡы ықәымлаӡеит. Турбаза аҳабла акрыфарҭа Ҿыц азааигәара аӡхыҵра ҟалазшәа асоциалтә ҳақәа рҿы иҭоу авидео – уи ҵыԥхтәи аҭыхымҭа ауп, цасҳәа аӡәы аинтернет иҭеиҵеит. Сынтәа имҩаԥгаз аӡышьҭрарыцқьаратә усурақәа ирыбзоураны Басла аӡиас хымҵӡеит. Ҳара уахь ҳцаны иҟоу аҭагылазаашьа гәаҳҭеит», - ҳәа иҳәеит Руслан Аҩӡба.

Аҟәа. Ԥхынгәымза 11, 2023 шықәса. Аԥсныпресс. Ашьыжь, ԥхынгәымза 11 рзы Аԥсны Ахада Аслан Бжьаниа атәыла араионқәа рҟны иҟалаз аӡхыҵра иннажьыз аԥхасҭа аҭыԥ ақәҵара иазкны изаамҭанытәим аилацәажәара мҩаԥигеит.

Аилацәажәара аартуа, Аҳәынҭқарра Ахада иазгәеиҭеит ареспублика мҽхакы ҭбаала зеиԥш ҟамлацыз аԥсабаратә рыцҳара ишаниаз. «Арыцҳара ахьыҟалаз ҭыԥқәоуп Гагра араион, Гәдоуҭеи Очамчыреи рраионқәа рыхәҭак. Иацы ари аҩыза арыцҳара ҟалеит аҳҭнықалақь аҟны. Ааха ӷәӷәа роуит ахатәы ҩнқәа, акурорттә инфраструктура. Рыцҳарас иҟалаз, инықәырԥшны акәзаргьы, уажәы иҟалаз аԥхасҭа иаҳнаҭаз ахарџь ахьынӡаҟоугьы ҳаздырӡом. Аԥсабара ааха рнаҭеит акоммуникациақәа, амашьынамҩақәа ҵнаӡәӡәааит, иара убас иаанкылоуп Урыстәылатәи Афедерацеи Аԥсни ирыбжьоу аихамҩатә еимадара. Аха абри аҭагылазаашьаҿы ҳара ҳзы акраҵанакуеит атәылауаа рыԥсҭазаареи ргәабзиареи, аӡәгьы машәыр имыхьроуп, - ари хадароуп ҳара ҳзы», - ҳәа иҳәеит Аҳәынҭқарра Ахада.

Ԥхынгәымза 10 рзы, ахәылбыҽха Аҳәынҭқарра Ахада Аслан Бжьаниа Гагра араион аҟны аинспекциатә ныҟәара аныхиркәша ашьҭахь, иҟалаз арыцҳара аԥыхра иазку Ареспубликатә штаб аԥҵаразы адҵа инапы аҵаиҩит. Аштаб анапхгаҩыс даҭоуп атәыла аԥыза-министр Алеқсандр Анқәаб. 

Аҟәа. Ԥхынгәымза 11, 2023 шықәса. Аԥсныпресс.  Риҵатәи ареликтә милаҭтә парк атехникатә маҵзурақәа ааигәа иҟалаз аԥсабаратә цәырҵра бааԥс ахҟьаԥҟьақәа рықәгара иадҳәалоу аусурақәа хдыркәшеит. Аӡиа Риҵеи аҭыԥҳарак Ауадҳәареи рҟынӡа  инагоу амҩа иқәнажьыз ахаҳә-мҿыҳә аҟынтәи ирыцқьоуп. Абри азы Аԥсныпресс ахь адырра ҟаиҵеит Риҵатәи ареликтә милаҭтә парк адиректор Адамыр Багаҭелиа.

«Ҳара иацы ахәылбыҽха амҩа ааҳартит. Ҳмаҵзурақәа зегьы дрыцқьеит, уажәы абжьааԥнытә режим ала аусура ҳаҿуп», - ҳәа адырра ҟаиҵеит Адамыр Багаҭелиа.

Уи иажәақәа рыла, Риҵатәи ареликтә милаҭтә парк шьыжьы инаркны иаҭаахьеит 500-ҩык инареиҳаны ауаа. 

Аҟәа. Ԥхынгәымза 11, 2023 шықәса. Аԥсныпресс.  Иҷыдоу аҭагылазаашьақәа рзы Аминистрра аԥшаара-еиқәырхаратә отриад аусзуҩцәа  ԥшьымш раԥхьа ашьхара хабарда ибжьаӡыз 60- шықәса зхыҵуа Очамчыра араион Ҷлоу ақыҭа инхо Рамаз Ҵәыџьба иԥшаара рылшеит, ҳәа адырра ҟанаҵоит аиқәырхаратә Хылаԥшырҭа апресс-маҵзура.

Аҟәа. Ԥхынгәымза 11, 2023 шықәса. Аԥсныпресс. Ареспубликатә унитартә Наплакы «Аԥснытәи аихамҩа» Гагра ақалақь аихамҩатә вокзал аҿы ааигәа иҟалаз аԥсабаратә цәырҵра ахҟьа-ԥҟьақәа рықәгара мҩаԥнагеит. Гагранӡа аихамҩатә ныҟәара еиҭашьақәыргылоуп, ҳәа адырра ҟанаҵоит Аԥснытәи аихамҩа апресс-маҵзура.

Уажәы аусурақәа мҩаԥысуеит «Гагра – Бзыбь» акаҵар аҿы.

Зынӡа инагӡаны аихамҩатә ныҟәара аиҭашьақәыргылара ԥхынгәымза 12 ахәылбыҽханӡа иазԥхьагәаҭоуп.

Аҟәа. Ԥхынгәымза 11, 2023 шықәса. Аԥсныпресс.  Иҳаҩсыз ауха иҟалаз ақәаршҩы иахҟьаны Гәылрыԥшьи Очамчыреи  араионқәа рҿы 20 инарзынаԥшуа ахатәы ҩнқәа аӡы рыҵалеит.

Аҟәа. Ԥхынгәымза 10, 2023 шықәса. Аԥсныпресс. Апансионатқәа Реидгыла «Акурорт Пицунда» акорпусқәа рҿы илеиз ақәаршҩы иахҟьаны  70 номер инарзынаԥшуа аӡы рыҵалеит.  Абри азы ԥхынгәымза  8 ауха инаркны ԥхынгәымза 9-нӡа  иҟалаз аԥсабаратә рыцҳара ахҟьа-ԥҟьақәа раԥыхра азҵаарақәа ирызкны Гагра араион Ахадараҿы имҩаԥгаз аусуратә еилатәара аҿы адырра ҟаиҵеит атуризм аминистр Ҭеимураз Хышба.

«Аӡы рыҵалеит аиҭашьақәыргыларатә усурақәа ахьымҩаԥырымгац ажәытә хыбрақәа. Ауаа егьырҭ аномерқәа рҿы индырхеит, уи инамаданы уадаҩра ҳәа акгьы ыҟаӡам. Ааха заузгьы ыҟаӡам»,- ҳәа иҳәеит иара.

Аҟәа. Ԥхынгәыза 10, 2023 шықәса. Аԥсныпресс. Гал араион ахада Константин Ԥлиа ԥхынгәымза 10 рзы, араион ахада ихаҭыԥуаҩцәа, аҟәшақәа реиҳабацәа, араион аструктуратә ҟәшеиҵақәеи амаҵзурақәеи рнапхгаҩцәа алархәны аусуратә еилатәара мҩаԥигеит. Аусуратә еилатәара иалахәыз араион аҿы ақәаршҩы аура инамаданы ишьақәгылаз аҭагылазаашьа азы адырра ҟарҵеит.

Ақалақьтә нхамҩа Аусбарҭа адыррақәа рыла, аҩнқәа аӡы рыҵамлаӡеит. Аҵыхәтәантәи ҩы-шықәса рыла Аусбарҭа ала ақәаршыҩншьҭахьтәи аҩнқәа аӡы рыҵалара аԥхьырҟәҟәаара азы мҽхакы ҭбаала аусура мҩаԥнагеит.

Гагра. Ԥхынгәымза 10, 2023 шықәса. Аԥсныпресс.  Гагра араион ақәыршҩы ӷәӷәа иахҟьаны ааха аиуит. Ԥхынгәымза 10 рзы, ашәахьа, араион иаҭааит Аԥсны Аҳәынҭқарра Ахада Аслан Бжьаниеи атәыла аԥыза-министр Алеқсандр Анқәаби.

Абарҭ аминуҭқәа рзы аԥсабаратә рыцҳара ахҟьа-ԥҟьақәа раԥыхра азҵаарақәа ирызкны Гагра араион Ахадараҟны  аилацәажәара мҩаԥысит.

Араион Ахада Иури Хагәышь Аҳәынҭқарра Ахада адырра ииҭеит иҟалаз аԥсабаратә рыцҳара инамаданы аусурақәа шцо азы. Иури Хагәышь излаиҳәо ала, Гагра араион иҟалаз ақәаршҩы иахҟьаны ԥхынгәымза 9 рзы еилкаахеит аԥхасҭа ӷәӷәа шроуыз  ақыҭақәа хԥа: Ԥсахара, Лӡаа, Алаҳаӡы, Бзыԥҭа ҳаблак, Гагра ақалақь ахәҭақәак.

«Ааха роуит 1100 нхарҭа, иара убас  250 цыра инарзынаԥшуа автомашьынақәа», - ҳәа иҳәеит Иури Ҳагәышь.

Аҟәа. Ԥхынгәымза 10, 2023 шықәса. Аԥсныпресс. Аслан Бжьаниа ԥхынгәымза 8 – 9 рзы иауз ақәыршҩы ӷәӷәа иахҟьаны ааха зауз Гагра араион ақыҭақәа дырҭааит.

Алаҳаӡы ақыҭан 250 инареиҳаны ахатәы ҩнқәа аӡы рыҩналеит, иара убас аҩақәа ирныз акаҭран ҵнаӡәӡәааит.  

Убасҵәҟьа иҟоуп Лӡаа ақыҭангьы аҭагылазаашьа. Аԥсабаратә рыцҳара иахҟьаны ахатәы ҩнқәеи асасааирҭаҩнқәеи амҩақәеи ӷәӷәала аԥхасҭа роуит.  

Аԥслымӡ, ахаҳәқәа, иҵнажәаз аҵлақәа рымахәқәа, уҳәа амҩа иҿықәнагалаз агәам-сам автотранспорт аныҟәара акыр иаԥырхагоуп. Аԥсыӡзауад ахь инагоу амҩа ахәҭак ыҵнаӡәӡәааит.  

Атуристцәа аӡрыжәтәи ачеи рыла реиқәыршәара аиҿкаара алыршаразы Аҳәынҭқарра Ахада иахь аҳәара ҟарҵеит. Иара убас ахәыҷыфатә анагаразгьы аҳәара ҟаҵан.

Аԥсшьаҩцәа иара убас дара рцара ауртә еиԥш амҩақәа ррыцқьара анбазалыршахо ҳәа иазҵаауан.