Атурнир аартра ацеремониа рхы аладырхәит Сергеи Уасил-иԥа Багаԥшь иԥеи имоҭеи.

Аицлабрақәа мҩаԥыслоит ԥхынгәымза 2 инаркны ԥхынгәыза 6 аҟынӡа.  

Атурнир рхы аладырхәуеит Аԥсни Урыстәылеи рҟынтәи аа-командак.

Атурнир аӡбаҩ Хада – Алада Урыстәыла Аолимпиатә академиа апрезидент ихаҭыԥуаҩ, Урыстәылатәи Асоветтә Федеративтә Социалисттә Республика зҽаԥсазтәыз азыҟаҵаҩ, Ареспублика Аԥсны зҽаԥсазтәыз азыҟаҵаҩ,  «Ахьӡ-Аԥша» орден III аҩаӡара занашьоу  Алеқсандр Банников.

Атурнир аартра ацеремониа аҿы иқәгылеит Аԥсны Аҳәынҭқарратә жәлар рыкәашара ансамбль «Кавказ».

Атурнир еиҿкаан Аԥсны аҿари аспорти русқәа рзы Аҳәынҭқарратә Еилаки Аԥсны амҵәышәмпыл Афедерациаеи рылшарақәа рыла. Убри аан адгылара ҟарҵеит Аҟәа ақалақь Ахадара, Ареспубликатә Унитартә Наплакы «Амшынеиқәафымцамч», амобилтә еимадара Аилазаара «А-Мобаил». 

Раԥхьаӡа акәны атурнир аматчқәа ишиашоу ала ицо аефир ала иддырбалоит Аԥснытәи ателехәаԥшреи «Абаза-ТВ» рыла.