Аҳәынҭқарра Ахада Иҷыдоу аҭагылазаашьақәа рзы Аминистрра аусзуҩцәеи аветеранцәеи рзанааҭтә ныҳәа рыдиныҳәалеит. Уи еизаз рҿаԥхьа дықәгыло иҳәеит:
«Ҳаҭыр зқәу Иҷыдоу аҭагылазаашьақәа рзы Аминистрра аусзуҩцәеи аветеранцәеи! Гәык-ԥсык ала ишәыдысныҳәалоит аусбарҭа аԥҵоижьҭеи 18 шықәса аҵра амш!
Аҷыдалкаатә ҭагылазаашьақәеи аԥсабаратә рыцҳара ахҟьа-ԥҟьақәа раԥыхреи рзы Аминистрра анаԥҵаз аԥхьатәи амшқәа лыҵшәа бзиала аусура шымҩаԥнаго агәра ҳнаргеит. Иҷыдоу аҭагылазаашьақәа ианаамҭоу раԥырҟәҟәаареи ианаамҭоу ақәҿыҭреи рзы акрызҵазкуа ауснагӡатәқәа рынагӡаразы раԥхьа инеиуа шәара шәоуп арыцҳара иақәшәаз рыҟны.
Иҷыдоу аҭагылазаашьақәа рзы Аминистрра аусзуҩцәа есқьынгьы аԥхьа игылоуп. Аус гәыкала азыҟазаара, агәымшәара, ахамеигӡара реиԥш иҟоу аҟазшьақәа шәыман шәара ахаангьы, ари ҳтәылауаа рганахьала аҳаҭырқәҵара шәаԥсаны шәҟанаҵеит. Шәара ишәыбзоураны ҳуааԥсыра шәҩыла реиқәырхара алыршоуп.
Иахьа ҳаҭырла иаҳгәалаҳаршәоит змаҵура анагӡараан иҭахаз. Урҭ хашҭра рықәӡам.
Ҷыдала иазгәасҭарц сҭахуп Иҷыдоу аҭагылазаашьақә рзы Аминистрра аветеранцәа рылшамҭақәа. Урҭ иахьа аус зуа аусбарҭа азеиԥш ҳара зегьы ҳзы ахаҵареи ахамеигӡареи рзы иҿырԥшыгоуп.
Аԥсны Аҳәынҭқарра Иҷыдоу аҭагылазаашьақәа рзы Аминистрра аусзуҩцәа зегьи аветеранцәеи ирзеиӷьасшьоит агәабзиара, ахирра, гәацԥыҳәарала аусура».
