Афонҿыцтәи аҳаԥы иахьатәи аԥсҭазаара атәы Аԥсныпресс акореспондент изеиҭеиҳәеит ари акомплекс адиректор ихаҭыԥуаҩ Дамеи Смыр:
«Ари аҳаԥы аҩныҵҟа иҟоуп азал дуқәа жәба, урҭ зегьы рхатәы хьыӡқәа рымоуп: «Анаҟәаԥиа», «Аԥсны», «Нарҭаа», «Аҩхаа», «Аԥхьарца», «Амҳаџьырқәа рзал», «Аспелеологцәа рзал», «Агелектиттә дамра», иара убас ара иҟоуп ари аҳаԥы аазыртыз ихьӡ зыхҵоу азалгьы – Гиви Смыр изал. Урҭ рахьынтә фба аҭааразы иазхиоуп, хԥа макьаназы мап. Иазгәаҭатәуп, иарку х-залк рҟынтәи акы аконцерттә зал аҳасабала аус шауаз, 15–20 шықәса раԥхьа араҟа имҩаԥыргон Аԥснытәи ахортә капела аконцертқәа. Ҳара иаҳҭахуп ари атрадициа шьахә аиҭарҿиара», – ҳәа иазгәеиҭеит Дамеи Смыр.
Адгьылаҵантәи аметро адәыӷба раԥхьатәи аушьҭра инаркны аҳаԥы атәыла иреиӷьу аҭыԥ ԥшӡарақәа иреиуахеит, уи есыҽны адунеи атәылақәа жәпакы рҟынтәи хыԥхьаӡара рацәала асасцәа аҭаауеит.
«Ҵыԥх аҳаԥы иаҭааит 389 нызықьҩык инареиҳаны, сынтәа уи иаҭааз рхыԥхьаӡара 100 нызықь рҟынӡа инаӡахьеит. Уи иаанаго, сынтәагьы аҭаацәа рацәаны иҳаур ҟалоит», – ҳәа иазгәеиҭеит Афонҿыцтәи аҳаԥы акомплекс анапхгараҭара ахаҭарнак.
Иара иажәақәа рыла, уажәы ахыркәшамҭахь инеихьеит аҳаԥы Анапхгараҭара ахыбра аҩныҵҟа ихацыркыз аиҭашьақәыргыларатә усурақәа:
«Ҳара административтә хыбра аҿы аиҭашьақәыргыларатә усурақәа хҳаркәшоит, уи џьара акала аесакурсиақәа рымҩаԥгара иаԥырхаганы иҟам. Аусурақәа рхыркәшара азԥхьагәаҭоуп ҩымз ирхымгакәа. Аусурақәа етап-етапла еихшан. Уажәы ахыбра арыӷьаратәи аганахьала аусурақәа рхыркәшара ҳаҿуп. Иқәгахеит ажәытә барҵа, уи ахаҭыԥан аҿыц аргылара ахыркәшарахь инеиуеит. Иара убас амаҵуратә транспорт азы амашьынаргыларҭа маҷк аҽарҭбааит», - ҳәа иҳәеит иара.
2025 шықәсазы аихамҩа шьаҭанкыла арҿыцра азԥхьагәаҭоуп.
«Иаахәаны ишьҭоуп ашпалақәа, арельсқәа, иара убас иаҭаху амаҭәахәи амаругақәеи зегьы. Аха уажәы атуристтә сезон ахьыҟоу инамаданы, аусурақәа ҳазрылагаӡом. Урҭ рылагара азԥхьагәаҭаны иҳамоуп ажьырныҳәамза 15, 2025 шықәса рзы. Сгәы иаанагоит хымз рыла иарбоу аусурақәа рхыркәшара ҳалшап ҳәа. Ари аамҭа алхра машәыршақә иҟамлаӡеит – усҟан иҟалаӡом атуристцәа, аҳаԥы аркызаауеит», - ҳәа еиҭеиҳәеит Дамеи Смыр.
Аԥсныпресс акорреспондент иара убас аҳаԥы аҭааҩцәа дрыҿцәажәеит, урҭ ирбаз цәаныррақәас ирызцәырнагаз азы дразҵааит.
«Ари угәы иҭымҵәо ҭыԥуп. Зегьы уаршанхоит. Сара уажәада Афон Ҿыц смааӡацызт, ари аҩыза сбоит ҳәагьы сыҟамызт. Акыр ҵуеит џьара ҳаԥык збарц сҭахиижьҭеи, Афонҿыцтәи аҳаԥы атәы ансаҳа, аԥсшьараамҭа сҽазыҟасҵо салагеит. Ашәҵатәы, ашьаҵатәы, арлашагақәа, афатә-ажәтә – уҳәа зегьы сыдызгалеит. Аха, анаҩс ишеилкаахаз ала, Афон Ҿыц аиқәыршәазаара аҩаӡара ҳаракны иҟалахьазаап, аҳаԥы ахь албаара акәым, ахаҳәтә музеи уҵаланы уцошәа угәы иабоит. Аекскурсиа ацәанырра ӷәӷәа сызцәырнагеит», – ҳәа илҳәеит Санкт-Петербург ақалақь аҿы инхо Анастасиа Денисенко.
Уи лыԥшәмахаҵа Максим Денисенко иара аҳаԥы аҭааразы аидеиа шизцәырҵыз атәы еиҭеиҳәеит:
«Афонҿыцтәи аҳаԥы аӡбахә сара сҩызцәа рҟынтәи исаҳаит, урҭ араҟа ҩы-шықәса раԥхьа ҭаацәаныла рыԥсы ршьон. Ҳҩызцәа даараӡа идырҽхәеит ари аҳаԥы. Сара уаанӡа агәаанагара сыман аҳаԥы, ари ашьхараҿы иҟоу акылҳара ауп ҳәа. Аха аус аҿы зегьы даҽакала ҳабла иаахгылеит. Аҳаԥы узлаҭало – абжьааԥны збара ҳашьцылахьоу ахыбрақәа иреиуоуп, уи аҩныҵҟа иҟазаап афымцадәыӷба ахьныҟәо аметро астанциа маҷ. Актәи азал аҿы ҳара иаабеит адгьыаҵантәи аӡиа. Уи аҭалара митәык ҳҽазаҳамшәеит, имамеиқәараны ахы ҳнарбеит, – ҳәа лафны иҳәеит иара. – Егьыс, аиашазы араҟа даараӡа иҭынчроуп, икаууа, ишьаҳиҭхазшәа зегьы гылоуп имҵысуа, иҿыхьҭоуп, аха аҳауа даара ицқьоуп, ихьшәашәоуп. Аекскурсиа мҩаԥызгоз илҳәеит араҟа аҳауеиҭарсра ԥсабаратәуп ҳәа. Араҟа сыԥшәмаԥҳәыси сареи акыр ҳзыршанхаз аԥсабаратә цәырҵра ҳалаԥш аахеит, уи ахыбаҩ еиԥшыз аминерал акәын. Аҵыхәтәан ҳазҭааз азал сара даараӡа саршанхеит. Уаҟа иҟан ишәыз аӡхыҽҽа асахьа змоу аԥсабаратә цәыҵра. Иаабаз зегьы даараӡа иаҳгәаԥхеит, сҩызцәа ирабжьызгалоит ари аҳаԥы хымԥада иаҭаарц», - ҳәа иҳәеит Максим Денисенко.
