Аҟәа. Цәыббрамза 28, 2023 шықәса. Аԥсныпресс.  Аҟәа ақалақь ахада Беслан Ешба иӡбамҭа ала, цәыббрамза 30 рзы ауаажәларратә транспорт (автобусқәеи атроллеибусқәеи) аҳҭнықалақь аҿы хәыда-ԥсада аус аулоит. Абри азы адырра ҟаиҵеит Аҟәа ақалақь Ахадара аекономикеи атранспорти Рдепартамент адиректор Авҭандил Џьынџьал.

Цәыббрамза 30 рзы, цәыббрамза 28 рзы арратә парад арепетициа хада амҩаԥгараан еиԥшҵәҟьа, Лакоба имҩала аамҭалатәи ҩ-ганктәи аныҟәара еиҿкаахоит.

Аҳабла Ҿыц аҟынтәи аџьармыкьанӡа, анаҩс шьҭахьҟа Аҳабла Ҿыц ахь иныҟәо атранспорт Џьонуа имҩала иныҟәалоит.

Аҟәа. Цәыббрамза 25, 2023 шықәса. Аԥсныпресс. Аҟәа араион Ешыра ақыҭан 1992-1993шш. аԥсадгьыл ахьчаҩцәа рбаҟа аартра ацеремониа мҩаԥысит.  

Абаҟа аартра иазку ацеремониа рхы аладырхәит Аҳәынҭқарра Ахада Аслан Бжьаниа, Аҳәынҭқарра Ахада Ихаҭыԥуаҩ Бадра Гәынба, Жәлар Реизара-Апарламент Аиҳабы Лаша Ашәба, Аҳәынҭқарра Ахада Иусбарҭа анапхгаҩы Абесалом Кәарҷиа, атәыла аԥыза-министр актәи ихаҭыԥуаҩ Беслан Џьопуа, Жәлар Реизара-Апарламент адепутатцәа,  аибашьра аветеранцәа, ауаажәларра рхаҭарнакцәа.

Аусмҩаԥгатә аартуа Аҟәа араион ахада Алхас Ҷыҭанаа иеизаз зегьы иҭабуп ҳәа раҳәо иазгәеиҭеит:

«Ҳара ахаангьы иаҳхашҭраны иҟам ҳфырхацәа, аиааира ҳзаазгаз иреиӷьу ҳҵеицәа. Ҳаибашьцәа гәымшәақәа, иҭахаз ранацәа шҿаԥхьа ҳхырхәоит!» .

Алхас Ҷыҭанаа иара убас адизаинерцәа Наала Ломиаԥҳаи Наала Мирзоиани асахьаҭыхыҩ Рашь Занҭариеи абаҟа аԥҵара зхы алазырхәыз зегьы иҭабуп ҳәа реиҳәеит.

Аԥсны жәлар Рџьынџьтәылатәи еибашьра аҿы ԥшьҩык зыҷкәынцәа ҭахаз Ешыра ақыҭа ахада Ҭамара Аҩӡба абас лҳәеит:

«Ҳара ари аибашьра хлымӡаах аҿы аиааира агара ҳалзыршаз ҳгәеицамкреи ҳфырхаҵареи роуп.  Ҳара адунеи зегьы идҳарбеит ҳара ҳиааира ус ишымариам. Ҳара Ԥсадгьылк ауп иҳамоу, уаҳа даҽакы ҳаманы иҟам. Уи Анцәа иҳаҭәеишьаз адгьыл ауп. Агәра ганы сыҟоуп, ҳхәыҷқәа, ҳмаҭацәа, уҳәа ес еиҵагыло абиԥарақәа иҭахаз асолдатцәа зегьы рыхьӡ акамыршәра шрылшо, ранацәа шырыхьчало, аибашьра аинвалидцәа зегьы ҳаҭырла ишрызныҟәало.  Ҳара ҳфырхацәа ирыбзоураны ҳабацәеи ҳабдуцәеи ашәышықәсақәа рыбжьара иззықәԥоз ахьыԥшымра ҳауит. Аԥсны аҭоурых адаҟьақа зыхьӡқәа хьтәы нбанла ианыло ҳфырхацәа иашақәа ргәалашәара наунагӡа ҳгәаҵаҿы иаанхоит! Хатәгәаԥхарала аԥсуаа ирывагыланы еибашьуаз ранацәа, хабарда ибжьаӡыз ранацәа, зԥазаҵәқәа ҭахаз анацәа рҿаԥхьа ҳхырхәоит».

Аҟәа. Цәыббрамза 27, 2023 шықәса. Аԥсныпресс. Аԥсны Жәлар Реизара – Апарламент Аиҳабы Ашәба Лаша Аԥсны жәлар рџьынџьтәылатә еибашьра аветеранцәа, Аԥсны жәлар ирыдиныҳәалеит Аҟәа ахақәиҭтәра 30 шықәса ахыҵра амш.

Адныҳәалараҟны иҳәоуп:

«Акыр иаҳзаԥсоу 1992–1993 шш. Аԥсны жәлар рџьынџьтәылатә еибашьра аветеранцәа!

Аҟәа. Цәыббрамза 27, 2023 шықәса. Аԥсныпресс. Сергеи Багаԥшь ихьӡ зху аплошьад аҿы аҳҭнықалақь ашколхәыҷқәа рыбжьара ацәаҳәақәгыларатә ашәа азы аконкурс мҩаԥысит. 

Аусмҩаԥгатә алагаанӡа ашколхәыҷқәа рахь ихы рханы дықәгылеит Аҟәа ақалақь ахада Беслан Ешба.

«Аҟәа ақалақь ахақәиҭтәра ҳџьынџьтылатәи еибашьраҿы акырӡа иззыԥшыз мшны иҟалеит. Араҟоуп иахьыҵхыз Аиааира ашьаҭа!», - ҳәа инаҵшьны иазгәеиҭеит Беслан Ешба.

Аҟәа. Цәыббрамза 27, 2023 шықәса. Аԥсныпресс. Аҟәа ахақәиҭтәра ҟалеижьҭеи 30-шықәса аҵра иазкны иахьа Аҟәатәи астадион аҿы имҩаԥысит Мрагыларатәи Гәымсҭатәи (Мраҭашәаратәи) афронтқәа рветернцәа ршьапылампылтә командақәа рыбжьара аиҩызаратә матч мҩаԥысит.

«Иахьа шәыхәмарра иахәаԥшырц иааит абиԥара ҿыц иаҵанакуа аҿар. Урҭ шәара шәфырхаҵареи шәҟазшьеи ирыбзоураны ари аусмҩаԥгатә алахәхара азин рымоуп. Шәара усҟан иҟашәҵаз иабзоураны ҳара иахьа аԥсҭазаара ҳамоуп. Шәара шәаҳҿыԥшны ииашаны анхара ҳҵоит. Иҭабуп идуӡӡаны ҳәа шәаҳҳәоит уи азы!» - ҳәа аветеранцәа рахь ихы рханы иҳәеит Аԥсны ашьапылампыл Афедерациа апрезидент  Шабаҭ Логәуа.

Аҟәа. Цәыббрамза 27, 2023 шықәса. Аԥсныпресс.  Иахьа Аԥсны аҳҭнықалақь Аҟәа Қырҭтәыла аҳәынҭсовет архәҭақәа рҟынтәи ахақәиҭтәра ҟалеижьҭеи 30-шықәса ҵит.  Ахьӡ-Аԥша апарк аҿы имҩаԥысит 1992-1993 шш. Аԥсны жәлар Рџьынџьтәылатәи еибашьраҿы иҭахаз аибашьцәа Рмемориал амҵан ашәҭ шьыҵәрақәа рышьҭацара мҩаԥысит.  

Иҭахаз ҳаҭырла иргәаладыршәарц иааит Аҳәынҭқарра Ахада  Аслан Бжьаниа, Аҳәынҭқарра Ахада Ихаҭыԥуаҩ Бадра Гәынба, Аԥсны Жәлар Реизара-Апарламент Аиҳабы Лаша Ашәба, атәыла аԥыза-министр Алеқсандр Анқәаб, Аҳәынҭқарра Ахада Иусбарҭа анапхгаҩы Абесалом Кәарҷиа,   Ашәарҭадара Ахеилак амаӡаныҟәгаҩ Сергеи Шамба, Апарламент адепутатцәа, Аԥсны иҟоу Урыстәыла ацҳаражәҳәаҩ Михаил Шургалин, аибашьра аветеранцәеи иҭахаз рҭынхацәеи.  

Аҟәа аҳҭнықалақь ахақәиҭтәразы аоперациа алагеит цәыббрамза 16, 1993 шықәсазы. Аҟәа ахақәиҭтәразы аиҿагылара ӷәӷәақәа мҩаԥысуан инеиԥынкыланы 12 мшы. Аҟәа ахақәиҭтәразы ажәыларатә операциа напхгара арҭон Аԥсны атәылахьчара аминистр, аинрал-маиор Сулҭан Сосналиеви Аԥсны Аҳәынҭқарра Арбџьармчқәа ркомандаҟаҵаҩ Хада Сергеи Дбари.

Аҟәа. Цәыббрамза 27, 2023 шықәса. Аԥсныпресс. Аҟәа аеалақь ахада Беслан Ешба аҟәаа Аԥсны аҳҭнықалақь ахақәиҭтәра амш 30 -шықәса ахыҵра инамаданы дрыдныҳәалеит.

«Ҳаҭыр зқәу Аҟәаа! Ишәыдысныҳәалоит ҳаҳҭнықалақь ақырҭуа гвардеиццәа рҟынтәи ахақәиҭтәра амш 30-шықәса ахыҵра! Аԥсынтәыла агәеисырҭа Аҟәа ахы ианақәиҭтәыз амш аҽны Аԥсны гәыла-ԥсыла ахы иақәиҭхеит. Аҟәа ақалақь ахақәиҭтәра ҳџьынџьтылатәи еибашьраҿы акырӡа иззыԥшыз мшны иҟалеит.

Аҟәа аҳҭнықалақь ахақәиҭтәразы аоперациа алагеит цәыббрамза 16, 1993 шықәсазы. Аҟәа ахақәиҭтәразы аиҿагылара ӷәӷәақәа мҩаԥысуан инеиԥынкыланы 12 мшы. Мҩадуцыԥхьаӡа, ҩныцыԥхьаӡа, абжьаларҭақәа, ахыбрақәа, уҳәа, шьаҿа-шьаҿала аҳҭнықалақь ақырҭуа мпыҵахалыҩцәа рҟынтәи ахы иақәиҭхон.  Ҳаибашьцәа гәымшәақәа ирылшеит 12-нызықьҩык рҟынӡа инаӡоз аӷа хәымга ирхәҭақәа шьҭахьҟа рынаскьагара. Аҵыхәтәаны, цәыббрамза 27, 1993 шықәса рзы ҳаҳҭнықалақь агәаҿы игылаз Аминистрцәа Реилазаара ахыбра иахашәыршәырит Аԥсны Аҳәынҭқарра абираҟ. Ҳаԥсадгьыл аҳҭнықалақь ахы иақәиҭтәын», - ҳәа иазгәаҭоуп адныҳәара аҟны.

Аҟәа. Цәыббрамза 27, 2023 шықәса. Аԥсныпресс. Ҳаҭыр зқәу ҳауаажәлар! Ишәыдысныҳәалоит ҳаҳҭнықалақь Аҟәа ахақәиҭтәра 30-шықәса ахыҵра амш. 1993 шықәса, цәыббрамза 27 Аԥсны жәлар Рџьынџьтәылатәи еибашьраҟны фырхаҵара згым, аҵак  ду змоу арыцхәқәа ируакуп.

Абри амш аҽны ихыркәшан Аҟәа зегьы ахьынӡанаӡааӡо ахақәиҭтәразы 11 мшы ицоз аоперациа.

Ҳархәҭақәа Аԥсны аҳҭнықалақь абираҟ шәыршәыруа ианахадыргыла ашьҭахь, ҳтәыла ахи-аҵыхәеи аӷа дықәцаны аҭарцәразы ажәылара иацырҵеит.

Аҟәа аҭарцәра марианы иҟамлаӡеит. Иҳацәҭахеит шәҩыла ҳҵеицәа гәымшәақәа, иара убас аԥсуа жәлар зҭагылаз аамҭа хьанҭақәа раан аиашьара рзырурц иааз хатәгәаԥхаралатәи  аибашьцәа. Рыхьӡ кашәаа ақәым урҭ, хьӡи-ԥшеи згым афырхацәа!

Аҟәа. Цәыббрамза 26, 2023 шықәса. Аԥсныпресс.  71-шықәса дшырҭагылаз лыԥсҭазаара далҵит апоетесса Инна Ҳашԥҳа.

Аԥсуа поетеса, апублицист, ауаажәларратә усзуҩ, ахәыҷтәы журнал «Амцабз» аредактор хада Инна Никәала-иԥҳа Ҳашба диит лаҵарамза 20, 1953 шықәса Очамчыра араион Ԥақәашь ақыҭан. Асовет Еидгылеи (1989) Аԥсни ашәҟәыҩҩцәа Реидгылақәа рлахәла, Аԥсны ажурналистцәа Реидгыла алахәыла.

1979 шықәсазы - А.М. Горки ихьӡ зху Аҟәатәи аҳәынҭқарратә арҵаҩратә Институт афилологиатә факультет далгеит.

1977 шықәса инаркны — Агазеҭ «Аԥсны ҟаԥшь» акорреспондент.

1985 шықәса инаркны — Аԥснытәи аҳәынҭқарратә шәҟәҭыжьырҭа аредактор, иара убри ашықәс анҵәамҭа инаркны — ажурнал «Алашара» аредакциа аҟәша анапхгаҩы.

1995 шықәса инаркны — Д. И.  Гәлиа ихьӡ зху Алитература-мемориалтә музеи адиректор.

2003 - 2005 шш. — Аԥсны ашәҟәыҩцәа Реидгыла Алитературатә фонд адиректор.

2007 шықәса инаркны ахәыҷтәы журнал «Амцабз» аредактор хадас дыҟан.

Лара аԥсҭазааратә ԥышәа ду лоуит, уи леиҿкааратә лшарақәа аиҳарак ала иаарԥшхеит Д.И.Гәлиа ихьӡ зху Алитература-мемориалтә музеи адиректорс даныҟарҵа ашьҭахь, иара убас Аԥсны ашәҟәыҩцәа Реидгыла Алитературатә фонд адиректори ахәыҷтәы журнал «Амцабз» аредактори рмаҵураҭыԥ аҿы аус анылуаз. Инна Никәала- иԥҳа аус ахьылуазаалагьы аус лыцузуаз зегьы рҿы ҳаҭар лықәын.

Инна Ҳашба 1972 шықәса раахыс лырҿиамҭақәа акьыԥхь ахь ицәырҵуан. Уи лажәеинраалақәа, лочеркқәеи лыстатиақәеи кьыԥххьон ажурналқәа: «Алашара», «Абаза»; агазеҭқәа: «Аԥсны ҟаԥшь», «Аԥсны», «Еҵәаџьаа», «Литературная газета» (ақ.Москва); аизгақәа: «Однажды в апреле. Стихи» (ақ. Қарҭ, 1982ш.), «...Памятник нам сыновей не заменит... Стихи и песни» (ақ. Аҟәа, 1994ш.), «Ахаҵарашәа. Ажәеинраалақәа. Ажәабжьқәа. Астатиақәа. (Аҟәа–Сухум, 1995); во втором томе «Аԥсуа поезиа Антологиа. XX ашәышықәса» (Аҟәа–Москва, 2001; 2009)уҳәа убас иҵегьы.

Аҟәа. Цәыббрамза 26, 2023 шықәса. Аԥсныпресс.  Хабарда ибжьаӡны иҟаз Аԥсны ар аибашьцәа Леонид Пкьыни Арсен Ефендиеви рыԥсыбаҩ ахаҭара анышьақәдыргыл ашьҭахь  анышә амадара иазку алахьеиқәҵаратә митинг мҩаԥысит Аҟәа ақалақь, Ахьӡ-Аԥша апарк аҿы. 

Алахьеиқәҵаратә митинг аартуа, Аҟәа ақалақь ахада ихаҭыԥуаҩ  Авҭандил Сурманиӡе, Аԥсны иахьа уажәраанӡа ирацәаны иаанханы иҟоуп  зыбаҩ ахаҭара шьақәыргылам аԥсуа еибашьцәа, ҳәа иазгәеиҭеит.

«Иахьа ҳзеизаз афырхацәа ҭахеижьҭеи акрааҵуеит, аха урҭ рыԥсыбаҩ ахаҭара шьақәыргыламызт. Аԥсны иахьа уажәраанӡа ирацәаны иаанханы иҟоуп  зыбаҩ ахаҭара шьақәыргылам аԥсуа еибашьцәа. Ари даара иуадаҩу усуп. Урҭ Аиааира рхы ақәырҵеит», – ҳәа иҳәеит иара.

Атәылахьчара аминистр ихаҭыԥуаҩ Давид Бжьаниа иажәақәа рыла, иарбан жәларызаалакгьы, иарбан тәылазаалакгьы, Аиааиреи Ахьыԥшымреи рышьақәыргылара рзымариамызт.