Аҟәа. Ажьырныҳәамза 9, 2024 шықәса. Аԥсныпресс.  Аԥснытәи ашьапылампыласҩы, гәдоуҭатәи «Риҵа» ааӡамҭа, Апрфессионалтә шьапылампылтә Клуб «Динамо» (ақ. Ставрополь) ижәыло абжахьчаҩ Лука Багаҭелиа Воронеж ақалақь ахь ахәаԥшразы ааԥхьара иоуит. Лука Багаҭелиа урыстәылатәи иԥхьагылоу алига аклуб «Факел» дацны Ҭырқәтәылаҟа актәи аизгарақәа рахь дцоит.  Абри азы адырра ҟанаҵоит аҿари аспорти русқәа рзы аҳәынҭқарратә Еилакы аофициалтә саит.

«Аԥхынтәи аизгарақәа раан ҳара ҳкомандеи  акоманда «Ахмати» рыбжьара аиҩызаратә матч мҩаԥган.  Грозныи ақалақь аҟынтәи акоманда азыҟаҵаҩ  хадас усҟан дыҟан Сергеи Ташуев. Уи ицхырааҩ Виачеслав Молчанов ахәмарра ашьҭахь даасыдгылан ус иҳәеит: «Ҳара уара уаҳгоит». Анаҩс Сергеи Ташуеви Виачеслав Молчанови аклуб «Факел» ахь ииасит, аха сыхәмарра иазҿлымҳан. Сара аҭакԥхықәра шсыду сдыруан, аматчқәа зегьы рҿы исымоу астиль сҽақәыршәаны изласылшоз ала акоманда азы ибзианы, схәарҭаны сҟаларц азы ахәмарра сҽазысшәон. Сыгәра згаз ахәмарыҩцәа, азыҟаҵаҩцәа, аспорт абзиабаҩцәа, уҳәа зегьы рзы исылшоз ала сықәԥон.  Аааԥхьара аиашазы даараӡа гәахәара дула исыдыскылеит. Аизгарақәа ажьырныҳәамза 9 рзы иалагоит, сара сҿаԥхьа ахықәкы ҳаракқәа ықәсыргылоит. Даара сгәыӷуеит сыгәҭакқәа рынагӡара сылшап ҳәа», – еиҭеиҳәеит Лука Багаҭелиа.

Иара ишеиҭеиҳәаз ала, Ставрополь ақалақь аҿы иара адгылара иоуит.

Аҟәа. Ажьырныҳәамза 9, 2024 шықәса. Аԥсныпресс.  Иреиҳаӡоу аспорттә ҟазара Ареспубликатә школ акоманда – аҭыԥҳацәа ркомандақәа рыбжьара амҵәышәмпыл азы Аԥсны Ахраҿа агеит, ҳәа адырра ҟанаҵоит Аԥсны аҿари аспорти русқәа рзы аҳәынҭқарратә Еилакы апресс-маҵзура.

Афинал аҿы Иреиҳаӡоу аспорттә ҟазара Ареспубликатә школ акоманда асчиот 64:49 ҳәа акоманда «Аԥсны амҵәыжәҩақәа» иаиааит.  Ахԥатәи аҭыԥ ааннакылеит акоманда «Спартак 2», уи асчиот 62:45 ҳәа Афонҿыцтәи акоманда иаиааит.

Атурнир иреиӷьу ахәмарыҩцәа ҳәа иалкаахеит Алексиа Кәыҵниа, (Иреиҳаӡоу аспорттә ҟазара Ареспубликатә школ акоманда), Ева Гәыбаз («Аԥсны амҵәыжәҩақәа»), Камилла Занҭариа («Спартак»). Дарина Каҷарааԥҳа – зегь раасҭа далкаахеит (MVP - аред. азгә.)

Аҟәа. Ажьырныҳәамза 8, 2024 шықәса. Аԥсныпресс.  Аибашьра иадҳәалоу 11 категориа ирыҵақакуа атәынчаҩцәа ажьырныҳәамза 2024 шықәса инаркны иназыцҵоу атәынчахәы роулоит. Абри азы адырра Аԥсныпресс ахь иҟаиҵеит Аԥсны Атәанчаратә Фонд ахантәыҩы Денис Гәылариа.

Иааизакны иҳараку атәанчахәқәа зауа рзеиԥш хыԥхьаӡара–  5 174 -  ҩык рҟынӡа инаӡоит.

Атәынчахәқәа рыцҵара азы мызказы инацҵаны иаҭаххоит 45  млн. мааҭ, шықәсык азы - 550 млн. мааҭ инарзынаԥшуа.  

2 000 мааҭ рыла ртәынчахәқәа шьҭыххоит абарҭ акатегориақәа ирыҵанакуа атәанчаҩцәа:

Аперсоналтә тәанчахәы зауа атәанчаҩцәа – 73-ҩык, урҭ ртәанчахәы ахышәа-ҵышәа – 12 000 мааҭ рҟынӡа инаӡалоит;

Аперсоналтә тәанчахәы зауаз, зыԥсҭазаара иалҵыз атәанчахәы иҭаацәа – 31 - ҩык, урҭ ироуло атәанчахәы ахышәа-ҵышәа – 12 000 мааҭ рҟынӡа инаӡалоит;

1992-1993 шш. Аԥсны жәлар Рџьынџьтәылатәи еибашьра I агәыԥ иаҵанакуа аинвалидцәа – 310 -ҩык, урҭ ироуло атәанчахәы ахышәа-ҵышәа – 12 000 мааҭ рҟынӡа инаӡалоит;

1992-1993 шш. Аԥсны жәлар Рџьынџьтәылатәи еибашьра II агәыԥ иаҵанакуа аинвалидцәа – 2316-ҩык,  урҭ ироуло атәанчахәы ахышәа-ҵышәа – 9 500 мааҭ рҟынӡа инаӡалоит;

1992-1993 шш. Аԥсны жәлар Рџьынџьтәылатәи еибашьра III  агәыԥ иаҵанакуа аинвалидцәа – 95-ҩык,  урҭ ироуло атәанчахәы ахышәа-ҵышәа – 8 500 мааҭ рҟынӡа инаӡалоит;

1992-1993 шш. Аԥсны жәлар Рџьынџьтәылатәи еибашьра аҿы иҭахаз рҭаацәа,  I агәыԥ иаҵанакуа – 25-ҩык, урҭ ироуло атәанчахәы ахышәа-ҵышәа – 12 000 мааҭ рҟынӡа инаӡалоит;

Зыԥсҭазаара иалҵхьоу 1992-1993 шш. Аԥсны жәлар Рџьынџьтәылатәи еибашьра аинвалидцәа рҭаацәа,  II агәыԥ иаҵанакуа – 51-ҩык, урҭ ироуло атәанчахәы ахышәа-ҵышәа – 9 500 мааҭ рҟынӡа инаӡалоит;

Зыԥсҭазаара иалҵхьоу 1992-1993 шш. Аԥсны жәлар Рџьынџьтәылатәи еибашьра аинвалидцәа рҭаацәа,  III агәыԥ иаҵанакуа – ҩыџьа, урҭ ироуло атәанчахәы ахышәа-ҵышәа – 8 500 мааҭ рҟынӡа инаӡалоит;

Аҟәа. Ажьырныҳәамза 8, 2024 шықәса. Аԥсныпресс.  Ԥхынҷкәынмза 27 инаркны атәыла аҩныҵҟатәи аусқәа Рминистрра  русбарҭақәа хабарда ибжьаӡыз Софииа Олеиник лыԥшааразы аоператив-ԥшааратә усмҩаԥгатәқәа мҩаԥыргоит.

Уажәазы иҟоу адыррақәа рыла, ажьырныҳәамза 7 рзы  Софииа Олеиник дырбон Очамчыра араион Аӡҩыбжьа ақыҭан.

Макьаназы Софииа Олеиник дахьыҟоу аҭыԥ еилкааӡамкәа иаанхоит, ҳәа адырра ҟанаҵоит аҩныҵҟатәи аусқәа Рминистрра апресс-маҵзура.  

Аҟәа. Ажьырныҳәамза 8, 2023 шықәса. Аԥсныпресс. Ашьыжь шаанӡа, ажьырныҳәамза  7 рзы, Очамчыра араион Ҷлоу ақыҭан ахатәы ҩны амца акит.

Иҟалаз амцакра иахҟьаны 60 шықәса зхыҵуаз аԥҳәыс дҭахеит, ҳәа адырра ҟанаҵоит Иҷыдоу аҭагылазаашьақәа рзы Аминистрра апресс-маҵзура.  

Аҟәа. Ажьырныҳәамза 8, 2024 шықәса. Аԥсныпресс. Аԥсны анапхгара Урыстәылатәи Афедерациа аҳәынҭқарратә мчра аусбарҭақәа рахь ааԥхьара ҟанаҵеит Аԥсныҟа анефтаалыҵқәа раагара иадҳәаланы ицәырҵыз апроблема аӡбара алыршаразы. Абри азы ТАСС ахь адырра ҟаиҵеит ареспублика аекономика аминистр ихаҭыԥуаҩ Ҭеимураз Миквабиа. 

«Ҳара Урыстәылатәи Афедерациа  аҳәынҭқарратә усбарҭақәак рахь ареспублика анефтаалыҵқәа рыла еиԥҟьарада аиқәыршәара алыршараҿы ацхыраара ҳаҳәеит. Дара ашықәс нҵәаанӡа акагьы аҟаҵара иахьымӡаӡеит, ҳазыԥшуп раԥхьатәи аусуратә мшқәа рзы еиҭакрақәак ҟалап ҳәа», – ТАСС акорреспондент диҿцәажәо  иҳәеит Ҭеимураз Миквабиа.

Аминистр ихаҭыԥуаҩ иажәақәа рыла, уажәы аус злоу аҭыԥантәи аилазаарақәа рыла зыхәԥса шәоу абылтәы ареспублика ахь аагара алыршара, насгьы иааизакны ареспублика анефтаалыҵқәа рыла аиқәыршәара азҵаара аҭышәынтәалара ауп.

«Уажәы «Роснефть» ауп Аԥсныҟа абылтәы аагара зылшо», - ҳәа иазгәеиҭеит иара.

Ҭеимураз Миквабиа иажәақәа рыла, Аԥсны абылтәы аганахьала макьаназы адефицит ыҟаӡам, «уажәы атәыла аҿы иҟоу абылтәы азхаратәы иҟоуп, аха «уадаҩрас иҟоу, аҭыԥантәи аилазаарақәеи абылтәы ҭаҭәарҭатә Станциақәеи зегьы аус  ахьырзымуа ауп».

Аԥсныҟа анефтаалыҵқәа аазго аилазаара дуқәа иреиуоу аилазаара «АЗиД» иалагалаз аԥкрақәа ирыхҟьаны, Ашықәс Ҿыц ҟалаанӡагьы  ахатәы абылтәыҭаҭәарҭатә Станциақәа рҿы анефтаалыҵқәак роужьра ааннакылеит.  Абылтәы уаанӡа ибжьаҵаз аиқәшаҳаҭрақәа рыла иалкаау анефтаалыҵқәа рыхәԥса зшәахьоу аиуристтә хаҿқәа ахсаалагақәа рыла ирзоужьхоит.  

Аҟәа. Ажьырныҳәамза 7, 2024 шықәса. Аԥсныпресс. Адунеи зегьы аҿы аиашахаҵаратә дин ныҟәызго ақьырсианцәа есышықәса, ажьырныҳәамза  7 рзы иазгәарҭоит Иаса Қьырса иира Амш.  

Ажьырныҳәамза 6 -7 ауха, асааҭ  23:00 рзы  Анцәа дзыхшаз Ацқьа Мариа Лгәырӷьаҽҳәаша акафедралтә уахәама аҿы Қьырсаныҳәа иазку анцәаныҳәара амҩаԥгаразы еизеит хыԥхьаӡара рацәала ауаа. Анцәаимҵаныҳәарақәа иара убас имҩаԥган  Афон-Ҿыцтәи аберҭыԥ, ааӡабхгаҩы Ацқьа Гьаргь-Аиааирагаҩы ихьӡ зху ауахәама, уҳәа  Аԥсны аус зуа ауахәамақәа зегьы рҿы.

Аҵх зегьы лацәааихьшь ҟамҵаӡакәа ақьырсианцәа аныҳәара мҩаԥыргон, иргәаладыршәон  Иаса Қьырса иԥсҭазааратә мҩа, илшарақәа, ажәлар ирзаанижьыз иажәа.  Иара убас имҩаԥган Евхаристиа ҳәа изышьҭоу аныҳәара, араҟа анцәаныҳәара ашьҭахь ақьырсианцәа Иаса Қьырса ижьи ишьеи символра азызуа аҩы ҟаԥшьи ачеи ргьама рбеит, иара убри ала Иаса Қьырсеи дареи иуеиҟәмыҭхо акакәны ишыҟоу шьақәдырӷәӷәеит. Ас еиԥш адинхаҵаратә усмҩаԥгатә алахәхара-ақьырсианцәа зегьы рзы ихымԥадатәиуп.

Аҟәа. Ажьырныҳәамза 7, 2024 шықәса. Аԥсныпресс. Аԥсны Жәлар Реизара-Апарламент Аиҳабы Аԥсны ажәлар Қьырса ныҳәа рыдиныҳәалеит.

«Адунеи зегьы аҿы аиашахаҵаратә дин ныҟәызго ақьырсианцәа реиԥш, Аԥсны иазгәарҭоит Иаса Қьырса иира Амш. Ари аныҳәа ауааԥсыра агәнаҳақәа рыҟнытә рҿыхреи наӡаӡа аԥсҭазаареи рзы агәыӷра рынаҭоит.  Ҳреспублика ауааԥсыра реиҳараҩык рзы Қьырса аныҳәа – ари доусы рыуацәеи рҭынхацеи рҩызцәеи рбара иаамҭоуп. Ари аныҳәа аилибакаара, арыцҳаибашьара, агәыҳалалра, аԥсадгьыл ахь абзиабара, аҳаҭыреиқәҵара, уҳәа иреиӷьу аҟазшьақәеи атрадициақәеи реихаҳара ахьӡала ауаа еиднакылоит.  

Аҟәа. Ажьырныҳәамза 07, 2024 шықәса. Аԥсныпресс. Аԥсны Аҳәынҭқарра Ахада Аслан Бжьаниа Аԥсны жәлар Қьырса ныҳәа лаша рыдиныҳәалеит.

Адныҳәалараҿы, ҷыдала, иҳәоуп:

«Акыр иаԥсоу ҳауаажәлар!

Гәахәарала ишәыдысныҳәалоит Иаса Қьырса Иира амш, Қьырса ныҳәа. Ари амш Аҿыхҩы ауаа агәнаҳақәа рыҟнытә рҿыхреи, наӡаӡа аԥсҭазааразы ириҭо агәыӷреи ирсимволуп. Абри аҽны анцәахаҵара иаша ныҟәызго ақьырсианцәа аныхақәа ирҭаауеит Ииз Қьырса имҵахырхәарц.

Иаса Қьырса Иира аныҳәа иацны иааиуеит аиҭакрақәа, аус бзиақәа рынагӡарахь иҳаԥхьоит. Иахьа адунеи аҿы имҩаԥысуа аибашьрақәа, аԥсабаратә рыцҳарақәа иҳарҳәоит аиқәхаразы, аидгыларазы, арыцҳаибашьаразы Анцәа ихаҵара иамоу аҵакы.

Аҟәа. Ажьырныҳәамза 6, 2023 шықәса. Аԥсныпресс. Аҳәынҭқарра Ахада Аслан Бжьаниа Аԥсни Урыстәылеи Жәлар рартистка, аорден «Ахьӡ-аԥша» актәи аҩаӡара занашьоу Хьыбла Гьерзмааԥҳа лира Амш лыдиныҳәалеит.

Адныҳәаларатә шәҟәы аҿы ахәҭакахьала иазгәаҭоуп:

«Ҳаҭыр зқәу Хьыбла Леуарса-иԥҳа! Ишәыдысныҳәалоит шәиара Амш, гәхәара дула иахьа зықьҩыла шәҟазара абзиабаҩцәа иҟарҵо адныҳәаларақәа сҽаласырхәуеит.