Давид Бжьаниа Аԥсны атәылахьчара аминистри Арбџьармчқәа ахатәы еилазаареи рыхьӡала аветеранцәа, аибашьцәа-аинтернационалистцәа зегьы дрыдныҳәалеит.
«Аибашьра зхызгаз, бџьаршьҭыхлатәи аконфликтқәа ирылахәыз , аиниаразы агәыӷреи агәрагареи змаз, згәалашәара згәаҿы иҵәахны измоу зегьы, азин сышәҭозар, ишәзеиӷьасшьар сҭахуп зегьы раԥхьаӡа иргыланы агәабзиара, агәамч, аизҳазыӷьара, агәҭынчра», - ҳәа иҳәеит иара.
«Есышықәса жәабранмза 15 рзы, аибашьцәа-аинтернационалистцәа ргәалашәара Амш аҽны, ҳара бџьаршьҭыхлатәи аиҿагыларақәа ахьыҟаз аҭыԥқәа рҿы зырратә уалԥшьа назыгӡо аруаа рыгәаӷьреи рфырхаҵареи рзы иҭабуп ҳәа раҳҳәоит. Иахьа ҳара Афганисҭан ицоз аибашьра аветеранцәа рыдагьы, 30 инареиҳаны аконфликтқәеи аибашьрақәеи ирылахәыз милионки бжаки урыстәылатәи аруаагьы ҳгәалаҳаршәоит. 25 нызықьҩык урыстәылатәи аруаа рмаҵзуратә уалԥшьа анагӡара рхы ақәырҵеит.
Аибашьа аветеранцәа иахьа афырхаҵареи атәылауаҩреи апатриотреи зыԥсы ҭоу ҿырԥшны иҟоуп. Зегьы ирзеиӷьасшьар сҭахуп агәабзиара, агәамч, аманшәалара», – ҳәа амитинг аҿы дықәгыло иҳәеит Аԥсны иҟоу Урыстәыла аус ацуразы Ахаҭанакра анапхгаҩы Дмитри Федотов.
Агәалашәаратә митинг ахыркәшамҭаз ажәа ирҭеит Ареспублика Афганисҭан еибашьуаз Реидгыла ахантәаҩы Даур Ҵулукиа.
«Иахьатәи амш – Афганисҭан хьыӡла-ԥшала зырратә уалԥшьа назыгӡоз аибашьцәа-аинтернационалистцәа ргәалашәара Амш ауп. Иахьа абра иааиз зегьы аныҳәа шәыдысныҳәаларц сҭахуп. Гәык-ԥсыкала ишәзеиӷьасшьоит агәабзиара, ашықәснҵыра ду. Аибашьра адәаҟынтә изыхнымҳәыз зегьы ргәалашәара ҳмырԥхашьааит, уахь иҟоу иалхымзааит! Ҳара урҭ ахаангьы иаҳхашҭраны ҳаҟаӡам».
Урыстәыла Аибашьцәа-аинтернационалистцәа ргәалашәара амш азгәарҭоит жәабран 15 рзы. Абри амш азы, 35 шықәса уажә аԥхьа, жәабранмза 15, 1989 шықәса рзы асовет ар Афганисҭан иалган. Инҵәеит жәа-шықәса ицоз, 15 нызықьҩык инареиҳаны асовет тәылауаа зықәӡыз аибашьра. Афгантәи аибашьра Аԥснытәи иалахәын 136-ҩык аибашьцәа -аинтернационалистцәа. Урҭ рахьынтә 11-ҩык еиуеиԥшым ахәрақәа роуит, 15-ҩык ҭахеит, 13-ҩык ԥсрашьҭахь арратә Аиаҵәа Ҟаԥшь аорден ранашьахеит.
