Аҟәа. Жәабранмза 15, 2024 шықәса. Аԥсныпресс. Аԥсны Аҳәынҭқарра Ахада Ихаҭыԥуаҩ Бадра Гәынба Дырмит Иасыф-иԥа Гәлиа диижьҭеит 150-шықәса аҵреи агазеҭ «Аԥсны» 105-шықәса ахыҵреи ирызкны агәалашәаратә усҩаԥгатәқәа рымҩаԥгаразы Аҳәынҭқарратә комиссиа аҩбатәи аилатәара мҩаԥигеит, ҳәа адырра ҟанаҵоит Аҳәынҭқарра Ахада ипресс-маҵзура.
Акомиссиа алахәылацәа инашьҭыз ажәалагалақәа жәпакы ирылацәажәаны ишьақәдырӷәӷәеит. Урҭ рхыԥхьаӡараҿы иҟоуп:
- Д.Гәлиа диижьҭеи 150-шықәса аҵра иазкны Аҟәа ақалақь аҿы имҩаԥгахо аусмҩаԥгатәқәа рыплан;
- Аԥсны аҳәынҭқарратә шәҟәҭыжьырҭа адиректор Даур Наҷҟьебиа аҭыжьразы зыдгалара мҩаԥигаз асахьаркыратәии егьи алитературеи рсиа;
- Ажурнал «Алашара» аредактор Хада Анатоли Лагәлаа аԥсышәалеи аҭырқә бызшәалеи «Д.И.Гәлиа еизга «Агәалашәарақәа» аиқәыршәара азы иажәалагала;
- 2024 шықәсазы иҭыжьхоит «Ахәыҷқәа рзы ажәеинраалақәа», «Аԥсуа жәлар рҳәамҭақәа рҟынтә», «История Абхазии. Этнография», «Дырмит Гәлиа ибызшәа ажәар» ҳәа реиԥш иҟоу ашәҟәқәа.
Аиԥылара аҿы Аԥсны ажурналистцәа Реидгыла ахантәаҩы Руслан Ҳашыг «Сара саԥсыуоуп, Аԥсуа жәлар рԥа соуп сара!» атема ала ареспублика амассатә информациа ахархәагақәа русзуҩцәа рыбжьара арҿиаратә конкурс амҩаԥгаразы иҟаиҵаз ажәалагала иалацәажәеит.
Аԥсны ашәҟәыҩҩцәа Реидгыла ахантәаҩы Вахтанг Абҳазоу иҟынтәи 20 инарзынаԥшуа ажәалагалақәа ҟаҵан. Уи зызку аҵараиурҭақәа рҿы афотоцәыргақәҵақәа, аԥхьаҩцәеи Дырмит Гәлиа инысымҩеи ирҿиарамҩеи адырыҩцәеи рыбжьара аконкурсқәа рымҩаԥгара, иара убас аиубилеитә хәылԥазқәа реиҿкаара ауп.
Аԥсны асасцәа атәыла акультуреи алитературеи реилыркаара азы Д.Гәлиа ихьӡ иадҳәалоу аҭыԥқәа рахь атуристтә маршрут шьақәыргылахоит.
Аҵара Аминистрра Д.Гәлиа ирҿиара ахәыҷқәеи аҿари рыларҵәара азы аусмҩаԥгатәқәа ркомплекс адгалара мҩаԥнагеит. Убас, иазԥхьагәаҭоуп «Аԥсуа милаҭтә хдырра аҿиара аҿы Д.И.Гәлиа инаигӡаз ароль» атема ала аконференциеи «Д.Гәлиа изкны зегьы ҳдыруама ҳара?» атема ала аҭҵааратә усумҭақәа рконкурси рымҩаԥгара.
Аԥснытәи аҳәынҭқарратә Университет «Д.И.Гәлиа – аԥсуа лиература апатриарх, ашьаҭаркҩы иоуп» атема ала жәларбжьаратәи анаука-практикатә конференциеи «Д.И.Гәлиа ирҿиара. Апоезиеи апрозеи» атема ала астол гьежьи рымҩаԥгара азы ажәалагала ҟанаҵеит.
Аҳәынҭқарратә комиссиа ААУ аҿы аусмҩаԥгатәқәа рымҩаԥгараҿы адгылара ҟанаҵоит.
Бадра Гәынба акультура Аминистрра амонументалтә ҟазара азы Акомиссиа алархәны 2024 шықәса хыркәшахаанӡа 1992-1993 шш. Аԥсны жәлар Рџьынџьтәылатәи еибашьраан еиларбгаз рцынхәрас Аӡҩыбжьеи Тамшьи иргылахо Д. И. Гәлиа ибиустқәа рзы иреиӷьу апроектқәа ралкааразы аконкурсқәа рымҩаԥгаразы адҵа аиҭеит. Аминистрра иара убас иадҵоуп «Д.И.Гәлиа иажәеинраалақәа рыла иреиӷьу ашәа» ҳәа аконкурс аиҿкаареи амҩаԥгареи.
Аилатәара аҿы Акомиссиа алахәылацәа Аҳәынҭқарра Ахада иахь ажәалагалақәак рыҟаҵаразы аӡбамҭа рыдыркылеит:
- 2024-тәи ашықәс Дырмит Иасыф-иԥа Гәлиа ишықәсны аԥхьаӡара;
- Алитературеи аҟазареи архитектуреи рҿы Д. И. Гулиа ихьӡ зху Аԥсны Аҳәынҭқарратә премиа аԥаратә ҳамҭаҭара ахышәа-ҵышәа 100 % рыла ашьҭыхра, иара убри ала уи 200 000 мааҭ рҟынӡа анагара;
- 2024 шықәсазы «Аԥсны иналукааша ахаҿқәа» асериа аҟынтәи агәалашәаратә ԥараҿырпы аҭыжьра.
Аԥсны жәлар рпоет Д.И.Гәлиа дижьҭеи 150-шықәса аҵреи раԥхьатәи аԥсуа газеҭ «Аԥсны» 105-шықәса ахыҵреи ирызку аныҳәатә усмҩаԥгатәқәа ашықәс зегьы иалагӡаны имҩаԥыслоит.
Аусмҩаԥгатәқәа реиҳарак рымҩаԥгара иара убас цәыббрамзазы иазԥхьагәаҭоуп, усҟан ауп «Д.И.Гәлиа илитература-мемориалтә Музеи» ҩынҩажәижәаба шықәса ахыҵра аназгәанаҭогьы.
