Аҟәа. Жьҭаарамза 4, 2023 шықәса. Аԥсныпресс. Ҭамаз Ҭарба жьҭаарамза 7 рзы Аҟәатәи  астадион «Динамо» аҿы имҩаԥысраны иҟоу наҟ-ааҟ ҩыџьа реиндаҭлара «Mixed Martial Arts» асериа азы 73-тәи атурнир ихы алаирхәраны дыҟоуп, - ҳәа адырра ҟанаҵоит аҿари аспорти русқәа рзы Аҳәынҭқарратә Еилакы аофициалтә саит.

Аԥснытәи аспортсмен диндаҭлоит Ҭемыр Тургат. Ҭамаз Ҭарба наҟ-ааҟ ҩыџьа реиндаҭлара «Mixed Martial Arts» асериа азы апрофессионалтә еиндаҭларақәа ҩынтә ихы алаирхәхеит.

Аҟәа. Жьҭаарамза 4, 2023 шықәса. Аԥсныпресс. Араиоқәа рхадарақәа аҵара аҟәшақәа алархәны Аԥсны аҩныҵҟатәи аусқәа Рминистрра ауаажәларратә шәарҭадара Аусбарҭала еиҿкаау амҩаҿы аныҟәара ашәарҭадара иазку акциа мҩаԥысит Гәылрыԥшь араион аҿы, ҳәа адырра ҟанаҵоит Аԥсны аҩныҵҟатәи аусқәа Рминистрра апресс-маҵзура.   

Аҟәа. Жьҭаарамза 4, 2023 шықәса. Аԥсныпресс. Амҵәышәмпылтә команда «Спартак» Славианск-на-Кубани ақалақь аҿы имҩаԥысуаз иаарту атурнир «Ахьтәы ҭагалан» аҿы актәи аҭыԥ ааннакылеит, ҳәа адырра ҟанаҵоит аҿари аспорти русқәа рзы Аҳәынҭқарратә Еилакы.  

Атурнир аҿы 2012 шықәсазы иизи урҭ иреиҵбууи аҭыԥҳацәа рыбжьара аицлабрақәа рхы аладырхәит ԥшь-командак: «Ростов», «Ростов-2», «Славянск-на-Кубани», «Спартак».

Аҟәа. Жьҭаарамза 4, 2023 шықәса. Аԥсныпресс. Аҟәа ақалақьтә Еизара адепутатцәа цәыббрамза 27, 1993 шықәсазы ақырҭуа снаипер ила иҭархаз Аԥсны Афырхаҵа, ИТАР-ТАСС афотокорреспондент Андреи Соловиов (07.10.1953 - 27.09.1993) игәалашәара анаунагӡатәра  азы аӡбамҭа рыдыркылеит. Аԥсны Афырхаҵа игәалашәара азы амемориалтә ӷәы шьақәдыргылоит иара дахьҭахаз аҭыԥ азааигәара – Владимир Аршба ихьӡ зху амҩала игылоу аҩны N53 аҿратә ган аҿы.

Андреи Соловиов ихьӡ анаунагӡатәразы аинициатива аазырԥшыз Аԥсны ажурналистцәа Реидгыла ауп.

1992 – 1993 шш. Аԥсны жәлар Рџьынџьтәылатәи еибашьраан Андреи Соловиов изныкымкәа Аԥсныҟа даахьан. Иара иҭихыз аибашьра иазку акадрқәа  Аԥсны иззымдыруа, изымбац шамахамзар аӡәгьы дыҟамзар ҟалап. Иара иҭихыз афотосахьақәа рӷьырак Аԥсны Аиааиреи Ахьыԥшымреи Рымш 30-шықәса ахыҵра иазку абаннерқәа ирнуп.  

Аҟәа. Жьҭаарамза 4, 2023 шықәса. Аԥсныпресс. Аҟәа ақалақьтә Еизара жьҭаарамза 3 рзы имҩаԥнагаз аилатәара аҿы Аҟәа ақалақь ахада Беслан Ешба иҟынтәи Аҟәа ақалақь аҿы Черниавски ихьӡ  зху амҩа Салыбеи Арӡынба ихьӡ ахҵара азы аҳәара зну ашәҟәы иахәаԥшит, ҳәа адырра ҟанаҵоит Аҟәа ақалақь Ахадара аофициалтә саит.

Нанҳәамза 11, 2023 шықәсазы иаашьҭыз ақалақь ахада ишәҟәы аҿы ахәҭакахьала иазгәаҭоуп: «Аԥсны Аиааиреи Ахьыԥшымреи Рымшныҳәа аламҭалазы Аҟәа ақалақь Ахадарахь иадҵаалеит атәылахьчара аминистр В. Ануа, аполитикатә партиа «Амцахара» ахантәаҩы А.Цыгәба, иара убас ақалақь ауааԥсыра. Урҭ дара ахьынхо Черниавски ихьӡ зху амҩа Аԥсны Афырхаҵа, Леон иорден занашьоу, Жәлар рфорум активла иалахәыз, Аҟәа ақалақь раԥхьатәи арратә комендантс иҟаз Салыбеи Арӡынба ихьӡ ахҵаразы аҳәара ҟарҵеит».

Ақалақьтә Еизара ахантәаҩы Дмитри Осиа иколлегацәа-адепутатцәа аҳҭнықалақь ахадарахь иаарышьҭыз ари ашәҟәы мыцхәы идуум Черниавски ихьӡ зху амҩала инхо ауааԥсыра зегьы рнапы шаҵарҩыз азы адырра риҭеит. Иара Черниавски ихьӡ ақалақь ахсаалаҿы ишаанхо, избан акәзар амҩа ауп зыхьӡ рыԥсахуа, убри аан иара уааҵәҟьа иҟоу амҩабжьахала уаанӡа еиԥш уажәгьы атәылаҿацәҭҵааҩы, аԥсабараҭҵааҩы–азоолог Владимир Черниавски ихьӡ ахызаауеит ҳәа инаҵшьны иазгәеиҭеит.

Дмитри Осиа, Салыбеи Арӡынба (Ака) акомандаҟаҵаҩыс дызмаз абаталион Аԥсны жәлар Рџьынџьтәылатәи еибашьраан аҳҭнықалақь ахақәиҭтәраан Аҟәатәи ашьха аҿы имҩаԥысуаз аидысларақәа ирылахәын ҳәа  иазгәеиҭеит. Иара аринахыс Аԥсны Афырхаҵа ихьӡ зху амҩа ахьыҟало аҭыԥ алхра машәыршақә иҟамлаӡеит ҳәа иазгәеиҭеит.

Аҟәа. Жьҭаарамза 1, 2023 шықәса. Аԥсныпресс. Урыстәылатәи Афедерациа ала Аахыҵ Уаԥстәыла аҳәынҭқарратә хьыԥшымреи асуверенитети разхаҵара ҟалеижьҭеит 15-шықәса аҵра иазкуп урыстәылатәи ажурналист, ауаажәларратә усзуҩ, Урыстәылазегьтәи Аҳәынҭқарратә Ателерадиоеилахәыра аҿга Аҳәынҭқарратә Телерадиоеилахәыра «Аланиа» адиректор, Нхыҵ Уаԥстәылатәи Ареспублика-Аланиа ажурналистцәа Реидгыла ахантәаҩы Ҭемыр Кусов иҭихыз адокументалтә фильм «Ихьыԥшым». Уи  аӡыргара мҩаԥысит Цхьынвал ақалақь аҿы нанҳәамза 26, 2023 шықәса рзы.  

Афильм аҿы иаарԥшуп ареспублика ашьақәгылара аҭоурых, рыӡбахә ҳәоуп Аахыҵ Уаԥстылатәи Ареспублика ахақәиҭреи ахьыԥшымреи зхы ақәызҵаз ауаа, Аахыҵ Уаԥстәыла ахьчаразы игылаз Урыстәылатәи абжьаҟазыҩцәа.

Аҟәа. Жьҭаарамза 3, 2023 шықәса. Аԥсныпресс.  Урыстәылатәи Афедерациа Ахада Владимир Путин ахаша, жьҭаарамза 4 рзы Аԥсны Аҳәынҭқарра Ахада Аслан Бжьаниа диԥылараны дыҟоуп, ҳәа адырра ҟанаҵоит Кремль апресс-маҵзура. 

Аҟәа. Жьҭаарамза 3, 2023 шықәса. Аԥсныпресс. Аԥсны Ахәаахәҭра-ааглыхратә Палата аҿы Апрезидент Ҭамила Мерцхәлааи Аԥсны Аҳәынҭқарра Ахьыԥшымра  жәларбжьаратәи азхаҵара 15 шықәса ахыҵреи, Аиааиреи  Ахьыԥшымреи 30 шықәса рхыҵреи иазкны аныҳәатә усмҩаԥгатәқәа рылахәхаразы зколлегацәа зыцны Аԥсныҟа иааз Афедеративтә Республика Германиа  иҟоу Аԥсны Ахәаахәҭра-ааглыхратә Палата ахаҭарнак Вольфганг Мацкеи русуратә еиԥылара мҩаԥысит.  Аиԥылара иара убас лхы алалырхәит Германиа иҟоу Аԥсны адәныҟатәи аусқәа Рминистрра аҷыдалкаатә зинмчы змоу ахаҭарнак Хьыбла Амҷба.

Аиԥылара аартуа, Аԥсны Ахәаахәҭра-ааглыхратә Палата апрезидент  асасцәа Аԥсны ахь иаадырԥшуа аинтереси аԥсуа жәлар рзы аҵак ду змоу  арыцхә иадҳәалоу ргәырӷьара рыцеиҩыршарц иахьааз иҭабуп ҳәа ралҳәеит. 

Аҟәа. Жьҭаарамза 3, 2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа Шәача ақалақь аҿы Урыстәылатәи Афедерациа адәныҟатәи аусқәа рминистр Сергеи Лавров диԥылеит.

«Ҳаиԥылара сеигәырӷьоит. Раԥхьаӡа иргыланы ишәыдысныҳәаларц сҭахуп арыцхә хадақәа – Аԥсны Аҳәынҭқарра ахьыԥшымра азхаҵара ҟалеижьҭеит 15- шықәса аҵреи Аԥсны жәлар Рџьынџьтәылатәи еибашьраҿы Аиааира агара Амши Ахьыԥшымреи рымшныҳәеи.  Издыруеит аныҳәатә усмҩаԥгатәқәа мҽхакы ҭбаала ишымҩаԥысыз, Урыстәылатәи Афедерациа ахаҭарнакцәагьы урҭ ишрылахәыз.

Ҩаԥхьа иазгәасҭарц сҭахуп Аԥсны Аҳәынҭқарра ашьақәгылараҿы, аекономика, асоциалтә усхк, афымцамч уҳәа, еиуеиԥшым ахырхарҭақәа русхк аҟны ҳусеицзура, жәларбжьаратәи аизыҟазаашьақәа рганахьала аусеицурагьы убрахь иналаҵаны, Аԥсны Аҳәынҭқарра ахьыԥшымра азхазҵара амҽхак  аԥхьаҟагьы иҳарҭбаалоит», - ҳәа иҳәеит Сергеи Лавров, Аслан Бжьаниа аԥсшәа иаҳәо.

Урыстәыла адәныҟаполитикатә усбарҭа Ахада Аслан Бжьаниа иҭабуп ҳәа иеиҳәеит  Урыстәыла иҷыдоу арратә операциа иалахәу аибашьцәа еснагьтәи ириҭо ацхырааразы.

«Сгәы иаанагоит иҟашәҵо адгылара Урыстәылатәи Афедерациа Ахада иқәгыларақәа рыҟны иазгәеиҭо алҵшәақәа ралыршараҟны ицхыраагӡахоит ҳәа. Иахьа абарҭқәа зегьы ҳрылацәажәоит, урҭ рхыԥхьаӡараҿы аԥхьаҟатәи егьырҭ аиԥыларақәа рыҟны ишьҭыххо азҵаарақәагьы налаҵаны», - ҳәа иҳәеит Сергеи Лавров.

Аҟәа. Жьҭаарамза 3, 2023 шықәса. Аԥсныпресс.  Аԥхынтәи аԥсшьарамшқәа рышьҭахь Урыстәылатәи Афедерациа иҟоу Аԥсны Ацҳаражәҳәарҭа аҟны амҽышатәи ашкол аҿы аҽазыҟаҵарақәа ирылагеит. Аԥсуа бызшәа аурокқәа  мҩаԥылгоит аԥышәа змоу арҵаҩы  Виолетта Перцхьелиа.

Ашкол апрограмма аҿы иара убас алитература, Аԥсны аҭоурых, акультура азы алекциақәа азԥхьагәаҭоуп.

Урыстәыла иҟоу Аԥсны Ацҳаражәҳәарҭа ахәыҷқәа реиԥш аиҳабацәагьы хәыда-ԥсада амҽышатә школ ахь ааԥхьара рынаҭоит.