«Аминистр, аинрал-леитенант Лев Кәыҵниа знапхгараҿы дыҟоу Аԥсны Иҷыдоу аҭагылазаашьақәа рзы Аминистрра аусзуҩцәа Курсҟа иргоит афатә аалыҵқәа: ашыла, ахырӷ, ашьақар, аконсервақәа, аԥаҭлыкақәа ирҭоу аӡрыжәтә, ахатәы гигиена ахархәагақәа, уҳәа», - ҳәа иазгәаҭоуп Аминистрра апресс-маҵзура иҟанаҵо адырра аҿы.
Агуманитартә еидара еизган ауааԥсыра иаларҵаз аԥаратә хархәагақәа рыла, иара убас ҳтәылаҿы аус зуа акоммерциатә еиҿкаарақәа рфинанстә цхыраарала. Агуманитартә акциа Аԥсны Анапгара адгыларала имҩаԥысуеит.
