2023 шықәсазы Аԥсны аусура иалагеит 183 рҟынӡа атуристцәа рыдкылара иазку аобиект ҿыцқәа, иахьатәи амш азы атәыла аҿы аус руеит - 1025.
Аԥсны Ахада иажәақәа рыла, Аԥсны атуристтә потенциал ду амоуп. Атуризм аҿиара азҵаара Аԥсны ҷыдала ахшыҩзышьҭра арҭоит. Уи акыр иацхраауеит хара имгакәа иҟало аҟәатәи аҳаирбаӷәаза аартра.
Аҟәатәи аҳаирбаӷәаза аусура ианалагалак ашьҭахь, иара иаднакылалоит урыстәылатәи ақалақьқәа быжьба рҟынтәи аҳаирпланқәа, ҳәа иҳәеит Аҳәынҭқарра Ахада Аслан Бжьаниа.
«Аҳаирбаӷәаза аусура анхацыркхо ашықәсан иара иаднакылалоит урыстәылатәи ақалақьқәа быжьба рҟынтәи аҳаирпланқәа. Заанаҵтәи ҳазԥхьагәаҭарақәа рыла, иаауа аԥсшьаҩцәа рхыԥхьаӡара 50% рыла еиҳахоит ҳәа агәыӷра ыҟоуп», – ҳәа иҳәеит Аслан Бжьаниа.
Жьҭаарамза, 2023 шықәсазы Аԥсны Анапхгареи Урыстәылатәи Аилазаареи «Инфраструктурное развитие» рнапы аҵарҩит В. Арӡынба ихьӡ зху аҳаирбаӷәаза «Аҟәа» аиҭашьақәыгылареи аусура аиҭаларгареи наҟ-наҟ аусуреи ирызку аинвестициатә проект анагӡаразы аиқәшаҳаҭра.
«РИА Новости» аинтервиу аҭо Аслан Бжьаниа иара убас IT-технологиақәа ртемагьы дазааҭгылеит. Аԥсны иазҿлымҳауп Ҭаҭарсҭан иҟоу аҩыза IT-кластер аԥҵара.
«Аҵыхәтәантәи аамҭазы ҳара IT-технологиақәа ирызҟазоу аспециалистцәа ҳҭахны ҳаҟоуп, ҳрызҿлымҳауп. Казань ақалақь аҿы иҟоу IT-кластер «Иннополис» аҩыза Аԥсны аԥҵара азы аидеиа ҳазцәырҵит. Аитишникцәа ирҭахузеи? Аԥхарра, аҳауа зҩыда, аҿиара бзиа змоу, зхаҭабзиара ҳараку атранспорттә коммуникациақәа. Ҳара уи зегьы ҳамоуп», - ҳәа «РИА Новости» акорреспондент диҿцәажәо иҳәеит Аԥсны Аҳәынҭқарра Ахада Аслан Бжьаниа.
