Аҟәа. Рашәарамза 22, 2023 шықәса. Аԥсныпресс. Аминистрцәа Реилазаара Ақәҵарала, рашәарамза 28, ахаша, Кәырбанныҳәа («Курбан-баирам») аныҳәа азгәаҭара иазкны иусуратәым аныҳәатә мшны ирылаҳәахоит. 

Аҟәа. Рашәарамза 22, 2023 шықәса. Аԥсныпресс.  аӡиудо азы XV жәларбжьаратәи атурнир «Аиааира Ахраҿа» аицлабрақәа  рҿы  2010-2011 шш. рзы ииз ақәратә категориа иаҵанакуа рыбжьара аиаареи аԥхьахәқәеи згаз алкаахеит.   

34 - кьыла иҟоу акапантә категориа иаҵанакуа рыбжьара актәи аҭыԥ ааникылеит Гордеи Шакура (ақ. Ессентуки), аҩбатәи - Лука Кәарацхьелиа (ақ. Гал), ахԥатәи аҭыԥқәа ааныркылеит - Елисеи Петровец (ақ.Пермь), Лаша Ҳашба (ақ. Аҟәа).

38 - кьыла иҟоу акапантә категориа иаҵанакуа рыбжьара актәи аҭыԥ ааникылеит Кирилл Попов (Пермтәи атәылаҿацә), аҩбатәи аҭыԥ ааникылеит Ладо Гулордаа (ақ. Шәача), ахԥатәи аҭыԥқәа ааныркылеит - Арзум Арутиуниан (Ареспублика Адыгеиа), Ника Кәарацхьелиа (ақ. Гал).

42 - кьыла иҟоу акапантә категориа иаҵанакуа рыбжьара актәи аҭыԥ ааникылеит Степан Тымченко (Ареспублика Адыгеиа), аҩбатәи - Иусуф Џьобиров (Адыгеиа), ахԥатәи аҭыԥқәа ааныркылеит - Аркади Топчиан (ақ. Шәача), и ара убас Илиас Усенов (ақ. Аҟәа).

Аҟәа. Рашәарамза 22, 2023 шықәса. Аԥсныпресс. Аԥсны Ахәаахәҭра-ааглыхратә Палата Апрезидент Ҭамила Мерцхулаа Жәларбжьаратәи ахәаахәҭратә палатеи Адунеизегьтәи апалатақәа Рфедерациеи Женеватәи ахәаахәҭреи ааглыхреи амаҵзурақәеи рпалатеи рыла еиҿкаау ахәаахәҭратә палатақәа XIII Адунеизегьтәи рконгресс лхы алалырхәуеит.  

Аконгресс Женева ақалақь (Швеицариа), жәларбжьаратәи ахәаахәҭра-цәыргақәҵатә центр «Palexpo» аҿы имҩаԥысуеит. 

Иахьа имариам агеополитикатә ҭагылазаашьа шыҟоугьы, Аԥсны Ахәаахәҭра-ааглыхратә Палата абар хәынтәуп Адунеизегьтәи аконгресс аҿы ҳреспубликеи аԥснытәи абизнес еилазаареи аинтересқәеи рӡыргара мҩаԥго ари аусмҩаԥгатә иалахәхоижьҭеи, - ҳәа адырра ҟаҵоуп Аԥсны Аҳәынҭқарра Ахәаахәҭра-Ааглыхратә Палата асаит аҿы.

«Ҳара ҳзы аконгресс – ари баша усмҩаԥгатәны иҟаӡам,  уи реалла иҟоу аԥсҭазааратә ԥышәа ала ишьаҭарку апартниортә еизыҟазаашьақәа рыҿиареи рышьақәгылареи абизнес ацхыраара аҭареи атәыла аҿы аусдкылара аҿиареи рзы иҿыцу адыррақәа раиура рзы зеиӷьаҟам платформаны иҟоуп. Ҳара ас еиԥш аҵак ду змоу аусмҩаԥгатә алахәхара ҷыдала ахшыҩзышьҭра аҳҭоит. Уи зыгәра угаратәы иҟоу абизнес-партниор иаҳасабала жәларбжьаратәи аилазаара аҿы ахаԥшьгара анаҩс, егьырҭ алахәылацәа зегьы ҳраҟараны наҟ-ааҟтәи аинтерес аарԥшразы алшара ҳанаҭоит.  Жәларбжьаратәи апартниорцәа адиалог амҩаԥгара азхиара аадырԥшуеит», – ҳәа илҳәеит Ҭамила Мерцхәлаа.

Аҟәа. Рашәарамза 22, 2023 шықәса. Аԥсныпресс. Рашәарамза 22 рзы 1941 – 1945 шш. Аџьынџьтәылатәи еибашьра Дуӡӡа алагеижьҭеи  82 шықәса ҵит. Есышықәса рашәара 22 рзы адунеи аҿы ари агәалашәареи алахьеиқәреи Рымш азгәарҭоит.

Рашәара 22, 1941 шықәса, асааҭ ԥшьба ашамҭаз уи азы иарбанызаалак ҳәамҭак ҟамҵаӡакәа афашисттә Германиа Асовет Еидгыла иақәлеит. Ԥшьы - шықәса ицоз аибашьра ду алагеит.

Аибашьра раԥхьатәи амшқәа инадыркны атәыла апартиатәи аҳәынҭқаратәи аусбарҭақәа зегьы  атәылахьчара азҵаарақәа рыӡбара иазку аусура анагӡара иалагеит.

Атәыла аибашьраамҭатәи аԥсҭазаашьа ахь аиасра алагеит. Рашәарамза 22 рзы Асовет Едгыла Иреиҳаӡоу Асовет Апрезидиум «Кавказнҭыҵтәи арратә округгьы уахь иналаҵаны,  арратә округқәак рыла, аррамаҵзура зуалу  рмобилизациа азы» Аусԥҟа ҭнажьит. 

Рашәарамза 23, 1941 шықәсазы  Аԥснытәи АССР ажәлар ркомиссарцәа Рхеилаки Қырҭтәыла Акомпартиа Аԥснытәи аобком абиурои автономтә республикаҿы аррамаҵзура зуалу  рмобилизациа қәҿиарала амҩаԥгаразы ақәҵара рыдыркылеит. Апартиатә еиҿкаарақәа, араионтә Хеилакқәеи Аҟәатәи ақалақьтә Хеилаки арратә комиссиарцәа қәҿиарала амибилизациатә усмҩаԥгатәқәа рынагӡаразы ацхыраара рыҭара азы адҵа рыҭан.

Ареспублика иахьаҵанакуа атәылауаа рмобилизациа аиҿкаара бзиа аманы, амобилизациатә план инақәыршәаны имҩаԥысуан. Убас, Гагра араион аҿы рашәарамза 23, 1941 шықәса асааҭ  11 рзы амобилизациа иаҵанакуа атәылауаа зегьы ааԥхьашәҟәы рнапаҿы иаркын, аррамаҵзура зуалу  Аҟәаҟа ргара азы атранспорт еиқәыршәан. Рашәарамза 27, 1941 шықәсазы Қырҭтәыла Акоммунистә Партиа Ацентркомитет ахь Гагра араион ала амобилизациа аплан аҵыхәтәанӡа ишынагӡоу азы адырра  дәықәҵан.

Арҭ амшқәа рзы Аԥсны арратә комиссариат  ахь аҿар рҟынтәи афронт ахь рдәықәҵаразы шәкыла арзаҳалқәа неиуа иалагеит. Аибашьра раԥхьатәи ахымш рыла Аҟармара аҳаблатәи арра-шәҟәҭагаларатә стол ахь инаган афронт ахь адәықәҵаразы   300 инарзынаԥшуа арзаҳалқәа. Урҭ рахьынтә 40% арзаҳалқәа аҭыԥҳацәа рыла иалаҵан. Ԥхынгәы 4 – 19, 1941 шықәса рзы Аԥсны арратә комиссариатқәа рахь афронт ахь адәықәҵаразы 5974 арзаҳал нашьҭын.   Лассы-лассы 16-17-шықәса зхыҵуаз апатриотцәа афронт ахь идәықәырҵарц азы рықәра иацырҵон. …

Аҟәа. Рашәарамза 22, 2023 шықәса. Аԥсныпресс. Абар шьҭа фымшуп уахгьы ҽынгьи Гега аӡиас  иалаҳаз балорустәи ахәыҷы –ԥшьышықәса зхыҵуа  Алеқсандр Вакулич иԥшаара иаҿууижьҭеи, - ҳәа Аԥсныпресс акорреспондент диҿцәажәо иҳәеит Иҷыдоу аҭагылазаашьақәа рминистр актәи ихаҭыԥуаҩ Тигран Делибалтиан.

«Ахәыҷы иԥшаара мҩаԥысуеит. Есыҽны аԥшааратә усурақәа ирылаху аусзуҩцәа рҽеиҭныԥахло аԥшаарақәа мҩаԥыргоит. Ахәлара ирымнахаанӡа аиқәырхаҩцәа  аӡиас аӡышьҭра иаваршәны изныкамкәа амаршрут иахысуеит», – ҳәа иазгәеиҭеит Тигран Делибалтиан.

Аҟәа. Рашәарамза 22, 2023 шықәса. Аԥсныпресс. Аԥсны иаԥҵахеит иҿыцу ауаажәларратә еиҿкаара «Аԥсны Адипломатиатә клуб». Уи аиустициа Аминистрра аҟны ашәҟәы иҭагалан рашәарамза 5, 2023 шықәсазы, ҳәа Аԥсныпресс акорреспондент диҿцәажәо иҳәеит акультура аминистр, аҳәаанырцәтәи аусқәа ԥыхьатәи аминистр Даур Ақаҩба.  

Ауаажәларратә еиҿкаара «Аԥсны Адипломатиатә Клуб» аԥҵаҩцәас иҟоуп: Саид Ҭаркьыл, Сократ Џьынџьал, Леонид Лакербаиа, Сергеи Шамба, Игорь Ахба, Максим Ӷәынџьиа, Виачеслав Чыркба, Даур Ақаҩба.

«Урҭ аԥышәа дуӡӡа змоу уаауп. Ҳҳәынҭқарра ашьақәгылара еиуеиԥшым ашықәсқәа рзы адәныҟатәи аусқәа Рминистрра нахгара азҭоз ауаа рыбжьгарақәа адәныҟатәи аполитика азҵаарақәа рылацәажәараан даара хәарҭа злоу акакәны иҟалоит», –  ҳәа инаҵшьны иазгәеиҭеит Даур Ақаҩба.

Аҟәа. Рашәарамза 22, 2023 шықәса. Аԥсныпресс. Гагра ақалақь аҿы ахәыҷбаҳҷа шьаҭанкыла аиҭашьақәыргылара ҳазҭоу 2023 шықәса анҵәамҭанӡа ихыркәшахоит. Ажурналистцәа дрыҿцәажәо абри азы адырра ҟалҵеит Гагра араион ахада ихаҭыԥуаҩ Хана Гәынба.  

Ахәыҷбаҳча аргыларазы араион Ахадара иазоунажьит 58 млн. мааҭ.

«Ахәыҷбаҳча асовет аамҭақәа раангьы аус ауан. Араҟа аа-гәыԥк ыҟан.  Уажәы уа шьаҭанкыла аремонт мҩаԥысуеит. Гәынԥҳа лажәақәа рыла, ари ахыбра иавадыргылоит аизарҭатә зали ахәыҟаҵарҭеи», - ҳәа илҳәеит лара.

Аҟәа. Рашәарамза 22, 2023 шықәса. Аԥсныпресс. Рашәарамза 22 рзы, Аҟәа ақалақь аҿы иалагеит аӡиудо азы “Аиааира Ахраҿа” агаразы XV жәларбжьаратәи аицлабрақәа.

1992-1993 шш. Аԥсны жәлар Рџьынџьтәылатәи еибашьра аҿы Аиааира агара Амш 30-шықәса ахыҵра  иазку атурнир аартра иазкыз аныҳәатә церемониа рхы аладырхәит аҿари аспорти русқәа рзы Аҳәынҭқарратә Еилакы ахантәаҩы Ҭарашь Ҳагба, аҿари аспорти русқәа рзы  Аусбарҭа  аиҳабы Ельза Ҳагба, Аԥсны аӡиудо Афедерациа апрезидент  Михаил Чалмаз.

Аԥсны аҿари аспорти русқәа рзы Аҳәынҭқарратә Еилакы иҟанаҵо адыррақәа рыла, атурнир рхы аладырхәуеит  Аԥсны, Белорус, Урыстәыла (Ареспубликақәа Адыгеиа, Башкортосҭан, Ингушетиа, Саха-Иакутиа;  Камчаттәи, Краснодартәи, Пермтәи, Ставропольтәи атәылаҿацәқәа, Архангельтәи, Ростовтәи, Самаратәи, Челиабинсктәи аобластқәа) рҟынтәи 15 командак реилазаараҿы иҟоу 330-ҩык аспортсменцәа. Аицлабрақәа 2007-2009, 2010-2011, 2012-2013, 2014-2015 шш. рзы ииз арԥарцәеи аҭыԥҳацәеи рыбжьара имҩаԥысуеит.

Аҟәа. Рашәарамза 22, 2023 шықәса. Аԥсныпресс. Рашәарамза 23 рзы акруизтә ӷба «Князь Владимир» Аҟәаҟа аԥышәа-гәаҭаратә реис   мҩаԥгахоит.  Алаинер Аҟәатәи амшынтә баӷәазанӡа асааҭ – 08:00 инарзынаԥшуа инаӡароуп.

2023 «Князь Владимир» – амаршрут Шәача – Новороссиск – Иалта – Севастополь – Шәача ала акруизқәа мҩаԥнагалоит.

Аҟәа. Рашәарамза 21, 2023 шықәса. Аԥсныпресс. Урыстәылатәи Афедерациа Аҳәынҭқарратә Дума аҿы Аԥсны Жәлар Реизара-Апарламент Аиҳабы Лаша Ашәбеи Аҳәынҭқарратә Дума ахантәаҩы ихаҭыԥуаҩ Пиотр Толстои Ихьыԥшым Аҳәынҭқаррақәа Реиҩызара аусқәеи евразиатәи аинтеграциеи аидгьылуаа рымадареи рзы Аҳәынҭқарратә Дума Аилак ахантәаҩы актәи ихаҭыԥуаҩ Казбек Таисаеви реиԥылара мҩаԥысит. Аиԥылара иара убас лхы алалырхәит Урыстәылатәи Афедерациа иҟоу Аԥсны Аҳәынҭқарра ацҳаражәҳәаҩ-абжьгаҩ Мадина Аҩӡба.

Аԥсны Аҳәынҭқарра Жәлар Реизара-Апарламент аофициалтә саит иҟанаҵо адыррақәа рыла, аиԥылара аҿы апарламентбжьаратә усеицура иадҳәалоу актуалра злоу азҵаарақәа рзы ргәаанагарақәа еибырҳәеит.

Ахәҭакахьала, аԥсуа ган Урыстәылатәи Афедерациеи Аԥсны Аҳәынҭқарреи ирыбжьоу аҳәынҭқарратә ҳәаа ахысра апроцедура армариара атема иазааҭгылеит. Убри инамаданы аԥсны-урыстәылатәи аҳәынҭқарратә ҳәаа ахысра ирыдҳәалоу азҵаарақәа рыӡбараҿы аусеицура азы 2022 шықәсазы иаԥҵаз аԥсны-урыстәылатәи апарламентбжьаратәи аусуратә гәыԥ аусура аинтенсификациа иаҵоу аҵакы ахадара алкаан, иара убас иарбоу ахырхарҭала аусеицура активла ахалархәра ишазхиоу  азгәаҭан.