Аҟәа. Рашәарамза 19, 2023 шықәса. Аԥсныпресс. Аҳәынҭқарра Ахада Аслан Бжьаниа аҳақьымцәа аҳәынҭқарратә ҳамҭақәа ранашьаразы Аусԥҟақәа инапы рыҵаиҩит.

Агәабзиарахьчара аҿы алагала дууи зыҩаӡара ҳараку азанааҭдырреи рзы «Ахьӡ-Аԥша аорден III аҩаӡара ранашьоуп:

Конџьариа Маиа Алеқсандр-иԥҳа – Гәдоуҭатәи араионтә хәышәтәырҭа Хада аҟны иҟоу ахәыҷтәы поликлиника аҳақьым-педиатр.

Хәырхәмал Шьазина Родик-иԥҳа – Ареспубликатә хәышәтәырҭа аҳақьым-пульмонолог.

Аҟәа. Рашәарамза 19, 2023 шықәса. Аԥсныпресс. Рашәарамза  19 инаркны ԥхынгәымза 15, 2023 шықәсанӡа Ростов-на Дону ақалақь, аконгресс-цәыргақәҵатә центр «ДонЭкспоцентр» аҿы имҩаԥысуеит  Урыстәылазегьтәи арҿиаратә уаажәларратә еиҿкаара «Урыстәыла асахьаҭыхыҩцәа Реидгыла» Арегионбжьаратәи асахьаҭыхратә цәыргақәҵа «Юг России XIII: живопись, скульптура».

Аҟәа. Рашәарамза 19,  2023 шықәса. Аԥсныпресс. Ацқьа Ааӡабхгаҩы Вонифати ихьӡ зху Агәыҳалалратә фонд Аҟәатәи Акафедралтә ныхабаа наӡаӡатәи ашьҭаҵара азы ҳамҭас ианаҭеит Ацқьа апостол Симон Канттәи еицамкуа иибаҩ-ишаҩ аҟәырҷахақәа.

Ацқьа апостол Симон Канттәи еицамкуа ибаҩ-ишаҩ аҟәырҷахақәа  рыиагара мҩаԥысит Аимператортә аиашахаҵаратә  палестинатә еилазаара аԥшьгарала.

Аԥснытәи Аиашахаҵаратә Уахәама ахада Виссариаон Аԥлиа Аԥсныпресс акореспондент диҿцәажәо, Аԥснытәи аиашахаҵаратә уахәама азы Симон Канттәи еицамкуа ибаҩ-ишаҩ аҟәырҷахақәа ари ахҭыс Египеттәи Виссарион игәалашәара амш аҽны иахьыҟалаз даара асимволтә ҵакы аҵоуп ҳәа иазгәеиҭеит.

«Ҳара, аиашахаҵаратә қьырсианцәа ҳзы, ари даара гәырӷьара дууп. Ари ҳара ауадаҩрақәа ҳанрықәшәо ззахь ҳхьаԥшуа, ҳзымҵаныҳәо Ацқьақәа еицамкуа рыбаҩ-рышаҩ аҟәырҷахақәа роуп. Ҳара ҳамҭас иҳарҭеит Аԥснынтәи иргаз, анаҩс  Европа иҟаз, ахәҭак Дамаск иҟаз Симон Канттәи еицамкуа ибаҩ-ишаҩ аҟәырҷахақәа. Аџьар  рхаргыланы аиасрақәа раан урҭ Франциаҟа инаргеит. Арҭ Симон Канттәи еицамкуа ибаҩ-ишаҩ аҟәырҷахақәа уаҳа џьаргьы адунеи аҿы иҟам. Ацқьа ибаҩ-ишаҩ Афон Ҿыц  аԥхьакырҭа аҿы иҟоуп», - ҳәа иҳәеит аб Висарион.

Аҟәа. Рашәарамза 19, 2023 шықәса. Аԥсныпресс. Алитература-сахьаркыратә, ауаажәларра-политикатә журнал «Алашара» ахԥатәи аномер ҭыҵит.

Аномер ианылеит иаразнак аиубилеитә рыцхәқәа ҩба – Аԥсны ашәҟәыҩцәа Реидгыла 90- шықәса ахыҵреи 1992 – 1993 шш. Аԥсны жәлар Рџьынџьтәылатәи еибашьра аҿы Аиаира агара  30- шықәса  аҵреи ирызку еиуеиԥшым аматериалқәа.  

Аномер аатуеит Аԥсны жәлар Рџьынџьтәылатәи еибашьра аамҭақәа рзы иҟаҵаз арратә медиаҳәшьа Шьазина Џьопуа лгәалашәарақәа зну амшынҵатә нҵамҭақәа.

«Ҳара аибашьара иалахәыз – ашәҟәыҩцәа, ажурналистцәа, аибашьра афырхацәа ирызку ирацәаны аматериалқәеи аҿцәажәарақәеи ҳкьыԥхьуеит.  Аномер ахаҿы ҳара иаҳкьыԥхьит, аибашьра иалахәыз, уи аԥхьатәи амшқәа инаркны амшынҵа ҟазҵоз амедиаҳәшьа Шьазина Џьопуа лынҵамҭақәа. Ари даара аинтерес зҵоу аматериал ауп, уи аԥхьаҩ  иҟаз аибашьратә хҭысқәа хаҭала иалахәыз лыблала рбара азы алшара инаҭоит», – ҳәа иҳәеит ажурнал «Алашара» аредактор хада Анатоли Лагәлаа.

Аҟәа. Рашәарамза 18, 2023 шықәса. Аԥныпресс.  Аԥсны Аҳәынҭқарра Ахада Аслан Бжьаниа амедицинатә усзуҩцәа рзанааҭтә ныҳәа рыдинаҳәалеит.

Адныҳәалараҿы иҳәоуп:

"Акыр иаҧсоу аҩызцәа!

Гәык-ҧсык ала ишәыдысныҳәалоит шәзанааҭтә ныҳәа - Амедецинатә усзуҩы имш! Шәара шәнапы алакуп агәыҳалалра зҵоу, ахамеигӡара, азыҟаҵара ҳаракы зҭаху азанааҭ. Шәара - ҳара ҳфырхацәа, ҳаиқәырхаҩцәа, шәара ауаа ргәабзиара ахӡыӡаара, рыҧсҭазаара аиҷаҳара иацхраауа усзуҩцәоуп.

Шәара лассы-лассы шәхы-шәыҧсы зегьы ахҭынҵара шәазхиоуп уҳәартә еиԥш хамеигӡарада имҩаԥыжәго аус, Аҧсны атәылауаа рганахьала аҳаҭыр ду, аџьшьара ду иаҧсоуп.

Аҟәа. Рашәарамза 16, 2023 шықәса. Аԥсныпресс. Рашәарамза 16 рзы Ахәыҷы изинқәа рыхьчаразы Азинмчы змоу Мактина Џьынџьали Аппарат азиндырҩы Лиана Векуеи Очамчыра араион аҩныҵҟатәи аусқәа русбарҭа аусеилыргаанӡатәи аамҭалатәи Аԥхьакырҭа аҿы иҟоу зықәра наӡам иҭааит. «Аҭаара хықәкыс иаман – зықәра наӡам азинеилагаҩы имоу аҭагылазаашьа агәаҭареи, уи иаанкылареи иҿахәҿыхреи раан апроцессуалтә зинеилагарақәа рыҟазаара аилкаареи», –  ҳәа адырра ҟанаҵоит Ахәыҷы изинқәа рыхьчаразы Азинмчы змоу Аппарат аофициалтә саит. Зықәра наӡам азинеилагаҩи Ахәыҷы изинқәа рыхьчаразы Азинмчы змоуи реиҿцәажәара арҵаҩы-психолог далархәны имҩаԥысуан. Зықәра наӡам иҟынтәи Ахәыҷы изинқәа рыхьчаразы Азинмчы змоу лахь агәынамӡарақәеи азашшрақәеи ыҟамызт. Аха иҭаку иганахьала иаарԥшхеит аилагара ӷәӷәа. Зықәра наӡам аизинеилагаҩы дицҭакуп зықәра наӡоу ацәгьоураҿы игәҩароу ауаҩы. Ахәыҷы изинқәа рыхьчаразы Азинмчы змоу аусеилыргаанӡатәи аамҭалатәи Аԥхьакырҭа аиҳабы даниҿцәажә ашьҭахь, уи ари аилагара арҽеира шалыршахо азы дақәиргәыӷит.

Аҟәа. Рашәарамза 16, 2023 шықәса. Аԥсныпресс. Урыстәыла аекономикатә ҿиара аминистри Аԥсны аԥыза-министр ихаҭыԥуаҩ, аекономика аминистр Кристина Озгани Петербургтәи жәларбжьаратәи аекономикатә Форум аҳәаақәа ирҭагӡаны В.Г.Арӡынба ихьӡ зху Жәларбжьаратәи аҳаирбаӷәаза «Аҟәа» аиҭашьақәыргыларазы Аиқәшаҳаҭра рнапы аҵарҩит.

Аусшәҟәы атекст аусдулара Аԥсни Урыстәылеи рыбжьара ишиашоу авиаеимадара аиҭашьақәыргыларазы Урыстәылатәи Афедерациа Ахада Владимир Путин иҟаиҵаз адҵа анагӡара аҳәаақәа ирҭагӡаны имҩаԥган, ҳәа адырра ҟанаҵоит Урыстәылатәи Афедерациа аекономикатә ҿиара Аминистрра аофициалтә саит.  

Аиқәшаҳаҭра инақәыршәаны, урыстәылатәи аган аинвестициатә проект аҭагылазаашьақәа зегьы рынагӡара ахахьы иагоит, аԥснытәи – иарбоу аинвестициатә проект аҳәаақәа ирҭагӡаны иргылахо аобиектқәа рхатәра азинқәа рыхьчаразы иҷыдоу аҳәынҭқарратә хәдуқәҵарақәа, иара убас ашәахтә зинҷыдақәеи ашәахтә ԥхықәрақәеи, иара убас аргыларақәа рзы адгьылтә ҵакырақәа рзоужьразы аԥхықәрақәеи ахахьы иагоит.

Максим Решетников иажәақәа рыла, Урыстәылеи Аԥсни рыбжьара ииашоу авиаеимадара аиҭашьақәыргылара аҩ-ҳәынҭқаррак рнапхгарақәа арегионқәеи абизнеси алархәны атуризм аҿиара иазкны  инарыгӡо астратегиа ду иахәҭакны иҟоуп.

Аҟәа. Рашәарамза 16, 2023 шықәса. Аԥсныпресс. «Иахьа Аԥсны Аҳәынҭқарразы даара акыр зҵазкуа ахҭыс ҟалеит. Аҟәатәи аҳаирбаӷәаза аиҭашьақәыргылареи Урыстәылатәи Афедерациеи Аԥсны Аҳәынҭқарреи рыбжьара авиоеимадара аиҭалагареи рзы анапхгарабжьаратәи аиқәшаҳаҭра анапаҵыҩра Санкт-Петербургтәи жәларбжьаратәи аекономикатә Форум аҳәаақәа ирҭагӡаны иахьыҟалаз даара асимволтә ҵакы аҵоуп», -ҳәа Аиқәшаҳаҭра анапаҵыҩра ашьҭахь илҳәеит Аԥсны аԥыза-министр ихаҭыԥуаҩ, аекономика аминистр Кристина Озган.

«Ацҵацәарада исҳәар сҭахуп, ҳтәыла азы ари даара акыр зҵазкуа хҭысуп. Уи 30 шықәса зегьы ҳаззыԥшыз хҭыс дууп. Иарбоу аинвестициатә проект анагӡара Аԥсны аекономика аҿиара даара хра злоу анырра анаҭоит», - ҳәа иазгәалҭеит лара.  

Аҟәа. Рашәарамза 16, 2023 шықәса. Аԥсныпресс. Аҟәа ақалақь, О.Беигәуа имҩала инагоу аӡымҩангага шәыра ԥхасҭахеит. Аиԥҟьара аԥшьаша, рашәарамза 15 рзы ҽынла ауп ианыҟала.  «Аӡыканал» аусзуҩцәа аус руан рашәарамза 16, асааҭ ҩба рҟынӡа.  Иахьа, амш агәазы ӡыла аиқәыршәара еиҭашьақәыргылахеит. Абри атәы Аԥсныпресс акорреспондент диҿцәажәо иҳәеит Амуниципалтә Унитартә Наплакы «Аӡыканал» аиҳабы Даур  Пачкориа.  

Аҟәа. Рашәарамза 16, 2023 шықәса. Аԥсныпресс /Алеқсеи Шамба/. Аԥшьаша, рашәарамза 15 рзы Р.Гәымба ихьӡ зху аҳәынҭқарратә филармониа аҿы еицырдыруа урыстәылатәи аскрипкарҳәаҩы Виктор Абрамиан-Ешба иконцерт мҩаԥысит.

Ахәылԥаз аартуа, амҩаԥгаҩ Есма Џьениа амузыкант активла имҩаԥиго агастрольтәи арҵаҩратәи иусуреи, уи Аԥснытәи артистцәеи иареи русеицуреи ртәы еизаз ирзеиҭалҳәеит.

Ишьақәгылаз атрадициа ала, аскрипкарҳәаҩы ҳреспубликаҿы иқәгылараан аконцерт рхы аладырхәуеит Аҳәынҭқарратә филармониа артист ҿарацәеи аԥышәа змоу анагӡаҩцәеи. Убасҵәҟьа иҟалеит иацы имҩаԥысыз аконцертгьы. Араҟа иқәгылеит Нана Черқьезиа (сопрано), Кристина Ешба (сопрано), Елена Ҳагба (арфа), Емилиа Терзиан-Ҳагба (аскрипка), Алеқсандр Аҩӡба (альт), Светлана Сариан (афортепиано), Лана Адлеиба (афортепиано).

Апрограмма еиуеиԥшым аепохақәа ирыҵанакуа аклассикатә музыка ала ишьақәгылан: Бах иҟынтәи Роберто ди Марино иҟынӡа. Аконцерт даара игәылҭәаахеит, уи ҩ-сааҭк рҟынӡа имҩаԥысуан. Акомпозиторцәа Чаиковски, Брамс, Креислер, Сен-Санс шьахәла инагӡаз рсолотә рҿиамҭақәа рнаҩс Виктор Абрамиан-Ешба афилармониа асолистцәа дрыцны ансамбль аилазаарала дықәгылеит.  Убас, иара Емилиа Терзиан-Ҳагба длыцқәгыло инаигӡеит Бах ирҿиамҭақәа рыла ре-минор аконцерт, Елена Ҳагԥҳаи Алеқсандр Аҩӡбеи дрыцқәгыло – Габриель Форе исиуита.