Аҟәа. Рашәарамза 14, 2023 шықәса. Аԥсныпресс. XXVI Петербургтәи жәларбжьаратәи аекономикатә Форум аҳәаақәа ирҭагӡаны имҩаԥысит Аԥсны адәныҟатәи аусқәа рминистр Инал Арӡынбеи Ареспублика Никарагуа Ахада аинвестициақәеи ахәаахәҭреи жәларбжьаратәи аусеицуреи рзы иабжьгаҩ, Урыстәыла аус ацура азы Никарагуа иҷыдоу ахаҭарнак Лауреано Ортега Мурилио напхгара зиҭо Никарагуа аделегациа ахаҭарнакцәеи реиԥылара мҩаԥысит.  

Аԥсны адәныҟатәи аусқәа Рминистрра Амедиацентр иҟанаҵо адыррақәа рыла, аиԥылараҿы аганқәа Аԥсни Никарагуеи рыбжьара ахәаахәҭра-економикатә усеицуреи уи афинанстәи алогистикатәи еиқәыршәареи ирыдҳәалоу азҵаарақәа жәпакы ирылацәажәеит.

Аҟәа. Рашәарамза 14, 2023 шықәса. Аԥсныпресс.  Иахьа ашьыжь шаанӡа Гагра ақалақь  аҿы илеиз ақәыршҩы иахҟьаны ареспубликатә трасса ахәҭаки ахатәы ҩнқәеи асасааирҭаки ааха роуит.

«Иахьа, рашәарамза 14 рзы, ашьыжь шаанӡа, асааҭ 5 инарзынаԥшуа Гагра ақәыршыҩ ӷәӷәаны иауит. Уи иахҟьны ареспубликатә трасса ахәҭаки ахатәы ҩнқәеи асасааирҭаки ааха роуит»,  – ҳәа Аԥсныпресс акорреспондент диҿцәажәо адырра ҟаиҵеит Гагра араион ала Иҷыдоу аҭагылазаашьақәа Рминистрра иатәу амцарцәара-еиқәырхаратә отриад аиҳабы Давид Бганба.

Ареспубликатә трасса ахәҭак илеиз ақәыршҩи аӡыҳәынҵәатә ҩарӡқәеи ирыхҟьаны аамҭала иаркхеит.

Аҟәа. Рашәарамза 14, 2023 шықәса. Аԥсныпресс. Аԥсны адәныҟатәи аусқәа рминистр Инал Арӡынба Санкт-Петербург ақалақь иреиҳаӡоу аҵараиурҭақәа рҿы аҵара зҵо, ахәҭакахьала, аплатформа «Аԥсны аԥеиԥш» ацхыраара иҭалаз астудентцәа дырԥылеит.

Аԥсны адәныҟатәи аусқәа Рминистрра Амедиацентр иҟанаҵо адыррақәа рыла, Инал Арӡынба астудентцәа хара имгакәа Аҳәынҭқарра Ахада Урыстәылатәи Афедерациа адәныҟатәи аусқәа Рминистрра аус ацура аиӷьтәра хықәкыс иҟаҵаны Санкт-Петербург иҟоу ҳаҭыр зқәу Аԥсны аконсул икандидатура аликаауеит ҳәа адырра риҭеит.

Аҟәа. Рашәарамза 14, 2023 шықәса. Аԥсныпресс.  Аԥснытәи аделегациа рашәарамза  14 – 17 рзы Петербург ақалақь, ацәыргақәҵатә центр «Экспофорум» аҿы имҩаԥысуа XXVI  Петербургтәи жәларбжьаратәи аекономикатә Форум  ахы аланархәуеит.

Аԥснытәи аделегациа аилазаараҿы иҟоуп: Жәлар Реизара-Апарламент Аиҳабы Лаша Ашәба, атәыла аԥыза-министр ихаҭыԥуаҩ, аекономика аминистр Кристина Озган, аԥыза-министр ихаҭыԥуаҩ, афинансқәа рминистр Владимир Делба, адәныҟатәи аусқәа рминистр Инал Арӡынба, Апарламент адепутатцәа Беслан Ҳалуашь, Алхас Ҳагба, Алиса Гәылариеи Наур Нарманиеи.

Петербургтәи жәларбжьаратәи аекономикатә Форум 1997 раахыс имҩаԥгахоит, уи аполитикцәа, абизнеси атехнологиатә стартапқәеи рхаҭарнакцәа реибабареи реиҿцәажәарақәеи рзы ауникалра злоу плошьадканы иҟоуп.

Аҟәа. Рашәарамза 14, 2023 шықәса. Аԥсныпресс. Зшәгаа маҷу аӷбақәа рзы аҳәынҭқарратә Инспекциа аӡхәыҵалацәа Аҟәатәи ақалақьтә ӡҭаларҭа иаҵанакуа амшын аҵа агәаҭареи арыцқьареи ирызку аусурақәа мҩаԥыргеит.  Акорреспондент Аԥсныпресс диҿцәажәо абри азы адырра ҟаиҵеит зшәгаа маҷу аӷбақәа рзы аҳәынҭқарратә Инспекциа аиҳабы Ҭенгиз Сабуа.

Уи иажәақәа рыла, ас еиԥш аусурақәа есышықәса имҩаԥгахоит.

«Амшын аҵа агәаҭареи арыцқьареи раан аӡхәыҵалацәа есымша аиха иалху еиуеиԥшым амаҭәарқәа, аихаҵәқәа, уи моу, аметалл иалху атәарҭақәагьы рԥыхьашәоит», –  ҳәа иҳәеит иара.

Ҭенгиз Сабуа ҷыдала ишазгәеиҭаз ала, амшын аҵа агәаҭараан ус баша иузышьҭымхуа аихаҵәқәеи аихацқәеи рыԥшааит, урҭ ихҵәаны, хәҭа-хәҭала рықәгара ада уаҳа ԥсыхәа ыҟам.   

«Абри зегьы ҳара асхема аҿы иаҳарбоит, анаҩс урҭ анаҩс аҽыкәабаразы азин ахьыҟам аҭыԥқәа адырбарц азы ақалақь Ахадара ахь инаҳашьҭуеит. Иара убас иԥҽу ацәқәырԥаеиҩсагақәа рааигәара аҽыкәабаразы азин шыҟам ала адыргақәа рышьақәыргылара, мамзаргьы иарбоу аҭыԥқәа зынӡа рыҩкаареи хымԥадатәиуп», – ҳәа иҳәеит Ҭенгиз  Сабуа.

Аҟәа. Рашәарамза 14,  2023 шықәса. Аԥсныпресс.  Иҟалаз ақәыршҩи аӡыҳәынҵәатә ҩарӡқәеи ирыхҟьаны Гагра ақалақь аҿы ашьыжь, асааҭ  5 инаркны ӡыла аиқәыршәара аанкылан.  

«Аӡхагаларатә станциақәа «Репруа-1», «Репруа-2» русура аанкылан, избан акәзар аӡыҳәынҵәатә ҩарӡқәа аӡхагаларатә станциа иаҿасуан. Аӡи аӡыҳәынҵәатә ҩарӡқәеи маҷк ианықәҵ ашьҭахь ҳара аӡхагаларатә станциа ашҟа ҳалбааит, иҟоу аҭагылазаашьа гәаҳҭеит. Уажәы ауааԥсыра ӡыла реиқәыршәара еиҭашьақәыргылоуп», – ҳәа иҳәеит Гагра араион ахада ихаҭыԥуаҩ Адамыр Цишба. 

Уи иажәақәа рыла, афымцамч ала аиқәыршәара аганахьала уадаҩра ыҟам.

Гагра иахьаҵанакуа ареспубликатә мҩаду ахәҭакала амашьынақәа рныҟәаразы иаартуп.

«Автомашьынақәа рныҟәара аамҭала ишьақәыргылоу ареверсивтә хырхарҭала иныҟәоит. Амҩа ахаҳәи-мҿыҳәи рацәаны иҿықәнагалеит, уи инагӡаны макьаназы арыцқьара залыршам», - ҳәа иҳәеит Адамыр Цишба.

Амшцәгьа ахҟьаԥҟьақәа рықәгара ашьҭахь, Гагра араион  Ахадара азарал аихшьаалақәа рыҟаҵара иалагоит.  

Аҟәа. Рашәарамза 14, 2023 шықәса. Аԥсныпресс. Аԥсныҟа иаауаз апассаџьыртә дәыӷбақәа «Москва – Аҟәа», иара убас «Санкт-Петербург – Аҟәа аихамҩатә станциа «Цандрыԥшь иаанкылан. Шьҭахьҟа урҭ дәықлоит дусы реихшанҵа инақәыршәаны.

Адәыӷбақәа рпассаџьырцәа зегьы автотранспорт ала рымҩа ахьынӡахо астанциақәа рҟынӡа инаргоит, ҳәа Аԥсныпресс ахь адырра ҟарҵеит Ареспубликатә Унитартә Наплакы «Аԥснытәи Аихамҩа» апресс-маҵзура аҿы. Аҟәантәи идәықәлараны иҟаз апассаџьырцәа адәыӷбақәа рныҟәара аихшанҵа инақәыршәаны, Аҟәантәи, Афонынтәи, Гәдоуҭантәи, Гагрантәи Цандрыԥшь аихамҩатә станциа аҟынӡа рнагара еиҿкаахоит.

Аҟәа. Рашәарамза 14, 2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа абарҭ асааҭқәа рзы Гагра ақалақь аҿы акоммуналтә маҵзурақәеи Иҷыдоу аҭагылазаашьақәа рзы Аминистрреи рхаҭарнакцәа алархәны анҭыҵтәи аилатәара мҩаԥигоит.  Уи иахьа ашьжьымҭан Гагра араион аҿы иҟалаз аԥсабаратә рыцҳара ахҟьаԥҟьақәа рықәгареи араион иаиуз азарал заанаҵтәи аихшьаалақәеи рызҵаарақәа ирызкуп.  

Аҳәынҭқарра Ахада  ипресс-маҵзура иҟанаҵо адыррақәа рыла, Аслан Бжьаниа излауа ала ирласны аихамҩа ала аныҟәара алагара алыршареи аиҭашьақәыргыларатә усурақәа рымҩаԥысшьа азы есыҽны адырра иҭареи рзы адҵа ҟаиҵеит.  

Аҟәа. Рашәарамза 14, 2023 шықәса. Аԥсныпресс. Иахьа  иҟалаз ақәоура бааҧс иахҟьаны араион аинфраструктура ааха ӷәӷәа аиуит.

Аҭагылазаашьа ҷыдақәа рзы аминистр Лев Кәыҵниа Ахада адырра ииҭеит арыцҳара ахьыҟалаз аҭагылазаашьа зеиҧшроу азы:

«Уажәы амашьынамҩа аартуп, хырхарҭа ԥсахрала аусура цоит. Рыцҳарас иҟалаз, аихамҩа ҵнаӡәӡәааит, уахь макьана аусура аанкылоуп».

Аминистр, иара убас иҳәеит Москвеи Санкт- Петербургынтәии иаауаз Гагра аҳәаа Цандрыԥшь араион аҟны ишгылоу, аԥсшьаҩцәа ракәзар, агәҭынчымра шаадырԥшуа.

Аҟәа. Рашәарамза 13, 2023 шықәса. Аԥсныпресс. Аԥсны Апрокуратура Хада  аӡбаратә усбарҭа ашьауӷатә усеилыргарақәа рзы Иреиҳаӡоу аӡбарҭа акассациатә коллегиа ахь лаҵарамза 24, 2023 шықәсазы заанаҵтәи аусеилыргара аусбарҭала ԥхынҷкәынмза, 2018 шықәсазы аулафахәы аазгоз Ҭҟәарчал ахәышәтәырҭа аусзуҩцәа рықәлара, иара убас гәыԥҩык ауаа еицны иҭҟьо амцабџьар изакәанымкәа аҵәахреи ахархәареи аиҭарсреи  инарымаданы  ахара здыз Миквабиа Р.Б., Миквабиа А.Б., Сар-оглы А.Р., Гогәуа М.С., рганаьала Ҭҟәарчалтәи аӡбарҭа  ишьақәнарӷәӷәаз ашьауӷақәҵара азы акассациатә дгалара ахәаԥшразы инанашьҭит. .  

Апрокуратура аганахьала иарбоу аӡбаратә ӡбамҭа азашшра шьаҭас иаиуит ашьауӷақәҵара аиашамра. Миквабиа Р.Б., Гогәуа М.С., Миквабиа А.Б. рганахьала аӡбарҭа ала ишьақәыргылоу ахьырхәра Аԥсны Аҳәынҭқарра Аусеилыргаратә Закәанеидкыла ахәҭаҷ 59 санкциақәа рыла иазԥхьагәаҭаӡам; Сар-оглы А.Р. ҵаҵӷәыда дыриашоуп. Аҳәынҭқарратә харадҵа агәаанагарала, иарбоу аусеилыргарала  аӡбарҭа  ашьауӷатә процессуалтә закәанԥҵара ӷәӷәала аилагара аҭыԥ аиуит.

Ашьауӷақәҵара атекст ала: 

Миквабиа Рамин Баграт-иԥа ахара идуп ҳәа дыԥхьаӡоуп, уи имазара имхрала ирӷәӷәоу арежим змоу ариашаратә калониа аҿы хәы-шықәса аҭакрала ахгара иқәҵоуп.

Иара аусеилыргаанӡатәии аӡбаратәии аусеилыргарақәа мҩаԥысуанаҵы аҩнытә баандаҩтәреи аҭакреи рыҽҳәара ахьынҵәаз инамаданы ихы дақәиҭтәуп.  

Миквабиа Аслан Бено-иԥа ахара идуп ҳәа дыԥхьаӡоуп. Уи аԥышәаратә шықәсык ацны згәаҭарала ҩы-шықәсеи фы-мзи аҭакрала ахьырхәра дақәыршәоуп. Убри аан аӡбарҭа азыӡба ала уи иқәҵаз ахьырхәра аҽҳәара ииасхьеит ҳәа иԥхьаӡаны  ахьырхәра аҟынтәи дақәиҭтәхеит.