Аҟәа. Рашәарамза 8, 2023 шықәса. Аԥсныпресс. Аԥсны Жәлар Реизара-Апарламент адепутатцәа «Аԥсны аныҳәатәи агәалашәаратәи амшқәа рзы» азакәан аиҭакрақәа аларгалеит.  

Аԥсны иҿыцу даҽа х-занааҭ ныҳәа ацлеит :

Лаҵарамза 17 – Аԥсны Адипломатиатә Маҵзура Амш;

Рашәарамза 10 – Аԥсны астатистика аусзуҩ Имш;

Ԥхынгәымза 4 – Аԥсны аԥсеиқәырхаҩ Имш.

Аҟәа. Рашәарамза 8, 2023 шықәса. Аԥсныпресс. Ашәба Лаша Аԥсны Аҳәынҭқарра Ауаажәларратә палата Амаӡаныҟәгаҩ Кьычба Гәули Лира амш лыдиныҳәалеит. Аԥсны Жәлар Реизара - Апарламент Аиҳабы Ашәба Лаша Аԥсны Аҳәынҭқарра Ауаажәларратә палата Амаӡаныҟәгаҩ Кьычба Гәули Лира амш инамаданы адныҳәалара ҟаиҵеит.

Адныҳәалараҟны иҳәоуп:

«Ҳаҭыр зқәу Гульнара Мелитон-иԥҳа!

Аԥсны Жәлар Реизара - Апарламент ахьӡала гәык-ԥсык ала ишәыдысныҳәалоит Шәира амш!

Шәара шәыԥсҭазаара зегьы ишәызгәакьоу Аԥсны иадҳәалоуп. Ауаажәларратәи аполитикатәи усзуҩы иаҳасабала Шәара ишәымоу ахьӡ ҳреспубликаҟнеиԥш, уи анҭыҵгьы ахә ҳаракны иршьоит.

Зажәеи зуси еимадоу, зыжәлар рыҩныҵҟа зыгәрагоу, Аԥсадгьыл аҿаԥхьа аҭакԥхықәра аныҟәгара зылшо ауаҩы – абарҭ аҟазшьақәа ҿырԥшыга бзианы иҟоуп.

Ҳара ахә ҳаракны иаҳшьоит аиҿкаара «Аԥсны анацәа аҭынчреи асоциалтә иашареи рзы» анапхгараҿы шықәсарацәала имҩаԥыжәго аусура. Шәара иаашәырԥшуа ахачҳара, агәбылра, агәкамыжьреи аԥсҭазаара агәрагареи ихьанҭаз аибашьрашьҭахьтәи ашықәсқәа рзы ҳауаажәлар рзы аҵак ду аман. 

Аҟәа. Рашәарамза 8, 2023 шықәса. Аԥсныпресс. Сынтәа Аҟәа ақалақь Амш азгәарҭоит ԥхынгәымза  8 азы.  Абри азы адырра ҟанаҵоит аҳҭнықалақь Ахадара.

Аҟәа ақалақь Амш,  Ареспублика ахьыԥшымра азхаҵара  ҟалеижьҭеи 15-шықәса аҵреи Аԥсны жәлар Рџьынџьтәылатәи еибашьра аҿы Аиааира агара Амш 30-шықәса ахыҵреи ишахәҭоу азгәаҭаразы аҽазыҟаҵара иаҿуп. Ақалақь аҿы, ауааԥсыра зегьы реиҳа бзиа ирбо аԥшаҳәа аҿгьы аиҭашьақәыргыларатә усурақәа мҩаԥысуеит.

Аҟәа ақалақь ахада Беслан Ешба аиҭашьақәыргылара-рҽеиратә усурақәа ахьымҩаԥысуа аҭыԥ даҭааит. Араҟа аныҳәатә умҩаԥгатәқәа рӷьырак мҩаԥыслоит.

Аҟәа ақалақь еиҳа изҭаауа аҭыԥқәа иреиуоуп – аколоннада, Аҟәа зегьы гәыблыла «Брехаловка» ҳәа изышьҭоу еицырдыруа акаҳуажәырҭа.

«Ақалақь Амш азгәҭара аламҭалазы зегьы бзиа еицаабо Брехаловка аҭеиҭыԥш арҽеира ҳахьӡар ҳҭахуп. Ари аусмҩаԥгатә иҳаҩсыз ашықәс азы иазԥхьагәаҭан. Ахыргьагьа арҽеира аҭахуп. Иазгәасҭарц сҭахуп, уи сынтәа 75 шықәса ахыҵуеит. Саԥыҩланы исҳәар сҭахӡам, аха ақалақь Амш азы ихадоу аусмҩаԥгатәқәа руак Брехаловка имҩаԥгахоит. Убри аҟнытә уи ԥшӡахарц азы арҽеира ҳгәы иҭоуп. Сгәы иаанагоит, ҳақалақь ауааԥсыреи уи иаҭаауа асасцәеи уи ргәаԥхап ҳәа», - иҳәеит аҳҭнықалақь ахада Беслан Ешба.   

Акаҳуажәырҭа «Амра» инаркны амҳаџьыраа рбаҟа аҟынӡа абетон иалху афонартә шьаҟақәа рҿыцхоит, иҿыцу афымцамҩангага шьақәыргылахоит, аус зымуа афонарқәа ԥсаххоит. Абетонтә дақәқәеи абагьырқәеи ршәуеит.

«Аҳәынҭргыларапроект» адиректор Асҭамыр Ԥлиа иҟаиҵаз адыррақәа рыла, иахьазы аплафонқәа рыҵаҟа афымцамҩангага ҿыцқәа рышьҭаҵара хыркәшоуп, иҟам афонартә шьаҟақәа рҭыԥан аҿыц шьақәыргылахоит.

Аҟәа. Рашәарамза 8, 2023 шықәса. Аԥсныпресс. Аԥыза-министр ихаҭыԥуаҩ Сергеи Пустовалов аҳәынҭқарратә хықәкытә программа «Анхарҭаҭыԥ 2023-2025 шш.» анагӡаразы Анапхгарабжьаратәи анагӡара-еиҿкааратә Комиссиа аилатәара мҩаԥигеит, ҳәа адырра ҟанаҵоит Аԥсны аминистрцәа Реилазаара апресс-маҵзура.

Акомиссиа анхарҭаҭыԥ аахәаразы афинанстә цхыраара аҭара азы Ареестр иалагалоу 10-ҩык атәылауаа рҟынтәи азыҳәамҭақәа рынагӡара иақәшаҳаҭхеит.   Урҭ рахьынтә:

Аинвалид ма зхәыҷаахыс зхы иамыхәо ахәыҷы знапы дану аҭаацәа – азыҳәамҭақәа 7;

Аҟәа. Рашәарамза 8, 2023. Апсныпресс. Иахьа, рашәарамза 8 рзы, Шәачантәи Гаграҟа иааит раԥхьатәи апассаџьырцәа зҭаз иццакны ицо жәларбжьаратәи афымцадәыӷба «Ласточка».

Гагра авокзал хада аҿы адәыӷба аԥыларазы аныҳәатә ҭагылазаашьа аԥҵан. Иааз апассаџьырцәа рзы кавказтәи акәашарақәа рынагӡарала аконцерт еиҿкаан.

Адәыӷба иаԥылеит аеконоика аминистр лхаҭыԥуаҩ Ҭеимураз Миквабиеи Аҳәынҭқарратә Еилакы «Аԥсны Аихмҩа» адиректор хада Октаи Хазириши.

Афымцадәыӷба есымша, абарҭ апунктқәа рҿы аамҭала аанкыларала ареисқәа нанагӡалоит: Мацеста, Хәасҭа, Адлер, Имеретиатәи Акурорт, аплатформа «Гагрыԥшь»,  аплатформа «Абааҭа».

Есыҽны апассаџьырцәа рыиагара иалагаанӡа аԥышәатә реисқәа мҩаԥган, аспециалистцәа разгәаҭарақәа зегьы ҳасаб рызун.

Афымцадәыӷба «Ласточка» Аԥсныҟа ареисқәа рынагӡара алыршахеит Аҳәынҭқарратә Еилакы «Аԥснытәи Аихамҩеи» Зҭакԥхықәра Ҳәаақәҵоу Аилазаара "Урыстәылатәи аихамҩақәеи» ирыбжьарҵаз аиқәышаҳаҭрақәа ирыбзоураны.  

Аҟәа. Рашәарамза 8, 2023 шықәса. Аԥсныпресс. Аԥсны Жәлар Реизара-Апарламент адепутатцәа «Аԥсны Аҳәынҭқарра иалҵны ацареи Аԥсны Аҳәынҭқарра аҭалареи рзы» азакәани «Аҳәаанырцәтәи атәылауаа Аԥсны Аҳәынҭқарраҿы рыҟазааразы азин шьаҭа азы» азакәани аиҭакрақәа ралагаларазы аӡбамҭа рыдыркылеит. 

Аҟәа. Рашәарамза 8, 2023 шықәса. Аԥсныпресс. Рашәарамза 9 рзы Аԥсны асахьаҭыхыҩцәа Реидгыла ацәыргақәҵатә зал Хада аҟны иаатуеит ацәыргақәҵа «Узтәызтәуа атәыла».

«Ацәыргақәҵа акультуратә феномен – аурыс сахьаҭыхыҩцәа 20-тәи ашәышықәса актәии аҩбатәи азыбжазы Аԥсны иаԥырҵаз рырҿиамҭақәа атема аанартуеит. Ицәыргақәҵоу аҿыханҵеи аграфикеи рырҿиамҭақәа Аԥсны Амилаҭтә сахьатә галереиа аизга аҟынтәи, иара убас ахатәы коллекциақәеи рҟынтәи иаагоуп», - ҳәа илҳәеит ари ацәыргақәҵа акураторс иҟоу, Аԥсны ацәыргақәҵатә Зал Хада адиректор Ельвира Арсалиа.

Аҟәа. Рашәарамза 8, 2023 шықәса. Аԥсныпресс. Жәлар Реизара–Апарламент адепутатцәа  актәи аԥхьараҿы «Астатистикатә усуразы» азакәан аиҭакрақәа ралагалара азҵаара иахәаԥшит. 

Зыдгалара мҩаԥгоу аиҭакрақәа анаплакқәа, аиҿкаарақәеи хазхаҭалатәи ахаҿқәеи аусдкылаҩцәеи аҳасабеилыргаратәи (афинанстә) астатистикатәи ашәҟәҭагалара амҩаԥгареи егьырҭ аҳәынҭқарратә статистикатә рбагақәа ргәаҭареи рзы ихымԥадатәиу аҭагылазаашьақәа ралкаареи иадҳәалахоит.  

Ахәҭаҷ 5 иалагалахо аиҭакрақәа инарықәыршәаны, ахылаԥшратә статистикатә рбагақәа Аҳәынҭстандарт ахь анашьҭра зыхәҭоу аҳәынҭқарратә напхгараҭара аусбарҭақәа рсиа Аԥсны Аҳәынҭстандарт адгаларала аминистрцәа Реилазаараҿы ишьақәырӷәӷәахоит.

Аҟәа. Рашәарамза 8, 2023 шықәса. Аԥсныпресс. Жәлар Реизара-Апарламент адепутатцәа аилатәара актәи аԥхьараҿы «Аԥсны Аҳәынҭқарра жәларбжьаратәи аиқәшаҳаҭрақәа рзы» азакәан аиҭакрақәа ралагаларазы азакәан апроект рыдыркылеит.

Аиҭакрақәа Аԥсны жәларбжьаратәи аиқәшаҳаҭрақәа рзы Апарламент адырра аҭара ҳәаақәызҵо ахәҭаҷ 7, ахәҭа 2 иалагалахоит.

Аусшәҟәы адгалара мҩаԥигеит адепутат Алхас Барцыц.

Аҟәа. Рашәарамза 8, 2023 шықәса. Аԥсныпресс.  Атуристцәа шьҭарнахыс ауаажәларратә ҭыԥқәа рҿы ишахәҭоу ала еилаҳәамкәа рцәырҵразы ахараԥса ршәалоит.  

Апарламент адепутатцәа аилатәара аҩбатәии ахыркәшаратәи аԥхьараҿы административтә зинеилагарақәа рзы Азакәанеидкыла аиҭакрақәа аларгалеит.

Убас, амҩадуқәа, аскверқәа, апаркқәа, уҳәа, ауаажәларра ахьеизо аҭыԥқәа рҿы рхәамц хтны, мамзаргьы аҽыкәабага мацара рышәҵаны анеиразы атуристцәа 100 аулафахәу иреиҵаӡоу ашәагаақәа (6 нызықь мааҭ) аҟынӡа инаӡо ахараԥса ашәара рыдҵахоит.