Аҟәа. Рашәарамза 8, 2023 шықәса. Аԥсныпресс. 1987 шықәсазы ииз Адгәыр Бгеу иԥсыбаҩ рыԥшааит иахьа ашьжьымҭан, 09 сааҭи 20 минуҭи рзы, Гәдоуҭа араион Калдахәара ақыҭа азааигәара, ҵаҟа  Бзыԥ аӡиас амҩасрала, ҳәа адырра ҟанаҵоит Иҷыдоу аҭагылазаашьақәа рзы Аминистрра апресс-маҵзура.  

Аҟәа. Рашәарамза 7, 2023 шықәса. Аԥсныпресс.  «Москва Аҩны» Аҟәа ақалақь аҿы аурыс поет дуӡӡа Алеқсандр Сергеи-иԥа Пушкин иира Амш азгәаҭара мҩаԥнагеит, ҳәа адырра ҟанаҵеит «Москва Аҩны» апресс-маҵзура.

Аусмҩаԥгатә мҩаԥысит аихамҩатә станциа «Гума» аҿы.

Ахәылԥаз асасцәа рзы иалагалан адресс-код: аҳәса рзы ацәацәҩыча ҵкқәа, аԥшандагақәа, анапхазқәа, ашьаҵатәы ҷыда, ахацәа рзы –  аклассикатә костиумқәа, афракқәа, акомзолқа.

«Москва ақалақь Анапхгареи хаҭала сара сыхьӡалеи, аурыс поет дуӡӡа Алеқсандр Сергеи-иԥа Пушкин диижьҭеи 224- шықәса аҵра иазку ари ахәылԥаз аҿы бзиала шәаабеит ҳәа шәасҳәоит. Ари аусмҩаԥгатә аурыс бызшәа Амш азгәаҭара аҳәаақәа ирҭагӡаны имҩаԥысуеит.

Алеқсандр Пушкин аурыс литература ашьақәгылара аҿы идуӡӡоу илагала ахә ашьара уадаҩуп, уи жәаҳәарада аурыс литературатә бызшәа ашьаҭаркҩыс дыԥхьаӡазар ҟалоит», – ҳәа асасцәа рахь ихы рханы иҳәеит «Москва Аҩны» адиректор Алеқсандр Бигәаа.

Аҟәа. Рашәарамза 7, 2023 шықәса. Аԥсныпресс. Аҟәатәи ақалақьтә ӡбарҭа, рашәарамза 6 рзы Аԥсны Аҳәынҭқарра Ашьаустә Закәанеидкыла ахәҭаҷ 224, ахәҭа 3, апункт «в» (ҷыдала зыкапан рацәоу анаркотикатә маҭәашьарқәа изакәанымкәа раахәареи рыҭиреи) рзы ахара зду, 1998 шықәсазы ииз Узбекьысҭан атәылауаҩ Шамсиддинов Рамзиддин Вохиџьон иганахьала  ахарадҵатә зыӡба аднакылеит.  

Апрокуратура Хада асаит аҿы иҟоу адыррақәа рыла, Шамсиддинов Рамзиддин Вохиџьон ҷыдала зыкапан рацәоу – 30 полиетилентә еилаҳәара рыла еихшаз, 14,281 грамм рҟынӡа инаӡо анаркотикатә маҭәашьар «метадон» анаҩс «имаӡоу аҭыԥқәа рҿы рҭаҵәахрала» аҭира хықәкыс иҟаҵаны изакәанымкәа аахәареи аҵәахреи рзы ахара идҵан.

Аҟәа. Рашәарамза 7, 2023 шықәса. Аԥсныпресс. Рашәарамза 7 рзы имҩаԥысит агәабзиарахьчара аминистр Едуард Быҭәбеи ахәыҷы изинқәа рыхьчаразы Азинмчы змоу, акультура-гәыҳалалратә фонд «Ашана»  адиректор Мактина Џьынџьали русуратә еиԥылара, ҳәа адырра ҟанаҵоит агәабзиарахьчара Аминистрра апресс-маҵзура.  

Аомбудсмен аминистр илҭаз адыррақәа рыла, Урыстәылатәи Афедерациа Ахада иҟны иҟоу ахәыҷы изинқәа рыхьчаразы Азинмчы змоу Марииа Львова-Белова лԥылара аҳәаақәа ирҭагӡаны, Аԥсныҟа аҳақьымцәа раара азы аиқәшаҳаҭрақәа рыбжьаҵара алыршахеит.

Аҟәа. Рашәарамза 7, 2023 шықәса. Аԥсныпресс. Аԥыза-министр Алеқсандр Анқәаб аԥыза-министр ихаҭыԥуаҩ, афинансқәа рминистр Владимир Делбеи шьаҭанкылатәи аргылара Аусбарҭа аиҳабы Ҭемыр Агрбеи алархәны 2023 шықәсазы иазԥхьагәаҭоу  аргыларатә усурақәа рымҩаԥгара иазку  азҵаарақәа рзы аилацәажәара мҩаԥигеит.

Иарбоу аобиектқәа рҿы аусурақәа рфинанстәра мҩаԥысуеит Аԥсны абиуџьет ахатәы ԥаратә хархәагақәа рыла. Зынӡа асиа иҭагалоуп 73 усмҩаԥгатә. Урҭ рыхәԥса  270 млн. мааҭ рҟынӡа инаӡоит.

Убас зеиҭашьақәыргылара, мамзаргьы зыргылара азԥхьагәаҭаны Аҟәа ақалақь аҿы иҟоуп 14 обиект, урҭ рыхәԥса азеиԥш еицҵалыҵ  44 млн. 542 нызықь мааҭ рҟынӡа инаӡоит. ;

Гагра араиони Пицунда ақалақьи рҿы 8 обиект, урҭ рыхәԥса азеиԥш еицҵалыҵ  25 млн. 842 нызықь мааҭ рҟынӡа инаӡоит. ;

Гәдоуҭа ақалақь аҿы 13 обиект, урҭ рыхәԥса азеиԥш еицҵалыҵ  57 млн. 946 нызықь мааҭ рҟынӡа инаӡоит. ;  

Аҟәа араион аҿы 6 обиектк, урҭ рыхәԥса азеиԥш еицҵалыҵ  21 млн. 800 нызықь мааҭ рҟынӡа инаӡоит. ; 

Аҟәа. Рашәарамза 7, 2023 шықәса. Аԥсныпресс. Д.И.Гәлиа ихьӡ зху алитературеи аҟазареи архитектуреи рзы Аҳәынҭқарратә премиа Акомиссиа, апремиа аиуразы аконкурс аҽҳәара ҳазҭоу ашықәс ԥхынгәымза 1 аҟынӡа ишацҵоу азы адырра ҟанаҵоит.

Аконкурс ахь инашьҭхоит   2020-2022 шш. адунеи збаз аԥҵамҭақәа.

Уи иазку аусшәҟәқәа рыдыркылоит Аҟәа ақалақь, Ажәанба имҩа, аҩ. №9, Д.И.Гәлиа ихьӡ зху алитературеи аҟазареи архитектуреи рзы Аҳәынҭқарратә премиа Акомиссиа.

Аҟәа. Рашәарамза 4, 2023 шықәса. Аԥсныпресс.  Анатоли Карпов ихьӡ зху аҟәатәи ашахматтә школ ааӡамҭа Нестор Багаҭелиа ахацәа рыбжьара ашахматқәа рзы адгьылҿацәтә еицлабрақәа «Мемориал А.А. Сапфирова» рҿы аџьазтә аԥхьахә игеит, ҳәа адырра ҟанаҵоит аҿари аспорти русқәа рзы аҳәынҭқарратә Еилакы.

Аицлабрақәа лаҵарамза 26 инаркны рашәарамза 3 аҟынӡа Шәача ақалақь аҿы имҩаԥысуан.  Атурнир рхы аладырхәит Урыстәыла еиуеиԥшым арегионқәеи Аԥсни рҟынтәи ашахматистцәа.

Аҟәа. Рашәарамза 4, 2023 шықәса. Аԥсныпресс. Аҟәатәи «Динамо» ааӡамҭа 2008 шықәсазы ииз Леон Агрба Арра аспорттә клуб Хада (ЦСКА) акоманда аилазаараҿы Москватәи афутбол Афедерациа апрезидент Ихраҿагара аҿы аиааира игеит, ҳәа адырра ҟанаҵоит Аԥсны аҿари аспорти русқәа рзы аҳәынҭқарратә Еилакы.

Арра аспорттә клуб Хада (ЦСКА) ааӡамҭацәа сасцәас изҭаз Аҿар ршьапылампылтә школ ааӡамҭацәа асчиот 2:0 ҳәа ириааит. Убас ала урҭ Ахраҿа ргеит.  

Аҟәа. Рашәарамза 5, 2023 шықәса. Аԥсныпресс. Аԥсны аҩныҵҟатәи аусқәа Рминистрра Автоҳәынҭинспекциа аҟәшеиҵақәа русзуҩцәа амҩатә шәарҭадара ашьақәыргылара иазкны имҩаԥыргаз ареидтәи апрофилактикатәии аусмҩаԥгатәқәа рыла иҳаҩсыз амчыбжь азы 1 4791 479 амҩатә ԥҟарақәа реилагарақәа аарԥшхеит.  

Урҭ рахьынтә 53 – автосаркьақәа рыԥшшәахәыркра анормақәа реилагара иадҳәалоуп. 43-ҩык амашьынарныҟәцаҩцәа ижәны амашьына аԥсҟы акразы административтә хьырхәра иақәыршәоуп.  

Аҟәа. Рашәарамза 5, 2023 шықәса. Аԥсныпресс. Амилициа аусзуҩцәеи Аҳәынҭқарратә шәарҭадара Амаҵзура аусзуҩцәеи Аҳәынҭстандарти "Амшынеиқәафымцамчи" русзуҩцәеи акриптовалиута арҳара азы изакәанымкәа аусура аарԥшреи аԥхьырҟәҟәаареи ирызку аусмҩаԥгатәқәа рымҩаԥгараан Гагреи Очамчыреи ақалақьқәа рҿы 18 цыра амаининг арҳара иазку аппаратқәа рымхра мҩаԥыргеит.

Гагра ақалақь,  Лакоба имҩа ала игылоу ахыбра аҿы иԥшаан иагьимырхит Клавишев Даниил Владислав-иԥа итәыз аппаратқәа  7.

Очамчыра ақалақь, Гәлиа имҩала игылоу, Квирквелиа Мераб Зураб-иԥа иҩны аҿы иԥшаан иагьимырхит   11 аппарат.