Аҟәа. Лаҵарамза 21, 2024 шықәса. Аԥсныпресс /Алеқсей Шамба/. Аспектакль «Ахьча Махаз» аԥхьарбара иазкыз апресс-конференциа мҩаԥысит аҩаша, лаҵарамза 21 азы, Ф.Искандер ихьӡ зху Аҳәынҭқарратә аурыс драматә театр аҿы.
Атеатр адиректор Хада Иракли Хьынҭәба Фазиль Искандер итекст асценаҿы абжьы ахҵазарц ауп ақәыргыламҭа ахықәкы хаданы иҟоу ҳәа иазгәеиҭеит.
«Сара агәра ганы сыҟоуп, ахәаԥшцәа автор имариам атемақәа ахьышьҭихуа, аха уи хра злоу аирониа аҵаны иҟаиҵо асиужет аҿиара амҩаԥысшьа ацклаԥшра шырзыманшәалахо», - ҳәа иҳәеит Иракли Хьынҭәба.
Уи иажәақәа рыла, «Ахьча Махаз» – ари ахьӡ-аԥша, аҭаацәа, ажәеи ауси реимадара, уҳәа реиԥш иҟоу акыр зҵазкуа азҵаарақәа шьҭызхуа Фазиль Искандер ихадоу иновеллақәа иреиуоуп.
Иракли Хьынҭәба, аспектакль аҿы арольқәа зегьы шымариам, аха аԥышәа змоу арежиссиор, Урыстәылатәи Аҳәынҭқарратә аҟазара Аинститут (ГИТИС) аушьҭымҭа, убасҵәҟьа актиортә ҟазара арҵаҩыс аус зуа Олесиа Невмержицкаиеи атеатр атруппеи русеицура алҵшәа бзиақәа аанарԥшит ҳәа инаҵшьны иазгәеиҭеит.
«Уажәы аихшьаалатә ҽазыҟаҵарақәа зегьы мҩаԥысуеит. Ахәаԥшцәа асиужет еиҳа имарианы рызнагара азы актиорцәа излауа ала аус руроуп, урҭ русура ахьынӡанарыгӡо ауп зегьы зыдҳәалоу», – ҳәа иҳәеит иара.
Хазы атеатр адиректор хада Махаз ироль назыгӡо Саид Лазба ас еиԥш арольқәа уажәаԥхьа рынагӡара иқәымшәаӡацызт ҳәа иазгәеиҭеит.
«Иара изы уи даҽа ҩаӡарак ахь ахалара ауп. Уи иара изы иаарту акосмос ахь ацара иадукылар ауеит. Саид ауаҩи актиорки раҳасабала џьара инагӡаны иузеилымкаауа амаӡарак илоушәа убоит, уи аҩыза аҟазшьа иперсонаж Махази иареи ҷыдала еизааигәанатәуеит», – ҳәа игәаанагара иҳәеит Иракли Хьынҭәба.
Арежиссиор Олесиа Невмержицкаиа арҿиамҭа «Ахьча Махаз» иаразнак лгәаҵанӡа инеит ҳәа илҳәеит.
«Сара ари аҭаацәа, ахәыҷқәеи уи раби ирызку арҿиамҭа акыр сгәы иақәшәеит. Уи дарбанызаалак ауаҩы ҷыдала изааигәоу ауп, избан акәзар, ҳара зегьы ахәыҷра ҳагәылҵны иааз ҳауп. Ҳара зеиӷьаҟам аусуратә ҭагылазаашьа аԥҵаны иҳамоуп, атруппа рзанааҭтә ҩаӡара даара иҳаракуп, убри аҟынтәи уи аус ацура гәахәара дууп сара сзы», - ҳәа илҳәеит арежиссиор.
Ари аспектакль аҿы Шьаликәа ироль назыгӡо Аԥсны зҽаԥсазтәыз артист Џьамбул Жорданиа иааркьаҿны иҳәеит: «Ари аспектакль уи злақәыргылоу арҿиамҭа автор Фазиль Искандер ахьиаку мацара азы уахәаԥшыр ахәҭоуп».
Апресс-цәырҵра ашьҭахь амассатә информациа ахархәагақәа русзуҩцәа ааԥхьара рырҭеит иарбоу аспектакль арепетициа ахь.
Аурыс драматә театр асахьаҭыхыҩ-ақәыргылаҩ Витали Кацәба – аспектакль зда ихәарҭам аконструкциақәа дрызҟазоуп.
Арежиссиор актиорцәа асценаҿы реиҭаҵра шьаҿа-цыԥхьаӡа дацклаԥшуеит. Уажәазы еиҳа инҭкааны уаҳа џьара акы аҳәара уадаҩуп, избан акәзар алашара азы асахьаҭыхыҩ, Апремиа «Ахьтәы Сабрада» («Золотая Маска») ԥшьынттәи алауреат Сергеи Василиев инапхгарала алашаратә партитура аԥҵара апроцесс мҩаԥысуеит.
Аспектакль аԥхьарбара мҩаԥгахоит лаҵарамза 24 – 25 рзы
.
