Аҟәа. Лаҵарамза 21, 2024 шықәса. Аԥсныпресс. Аԥсны агәабзиарахьчара аминистр Едуард Быҭәба атәыла араионтәи ақалақьтәии ахәышәтәырҭақәа рҳақьым хадацәа алархәны аусуратә еилатәара мҩаԥигеит. Аилатәара иара убас лхы алалырхәит агәабзиарахьчара аминистр ихаҭыԥуаҩ Ирма Воуԥҳа.
Аԥхынтәи акурорттә аамҭахәҭа аламҭалазы агәабзиарахьчара аминистр традициала ишышьақәгылахьоу еиԥш, ахәышәтәырҭақәа рҿы иҟоу аҭагылазаашьеи аԥсшьараамҭа азы апациентцәа рхыԥхьаӡара аизырҳара ишазыҟаҵоу азы аилкаареи рзы аҳақьымцәа раҳасабырбақәа разыӡырҩреи аҳақьымцәа рыҿцәажәарақәеи мҩаԥигоит, ҳәа адырра ҟанаҵоит атәыла агәабзиарахьчара Аминистрра апресс-маҵзура.
Ихадоу апроблемақәа иреиуоуп – акадрқәа разымхара. Лаҵарамза анҵәамҭазы аԥхынтәи аԥсшьараамҭазы рколлегацәа ирыцхраац Аԥсныҟа иаауеит урыстәылатәи амедусзуҩцәа жәаҩык.
Аԥсны агәабзиарахьчара Аминистрра ахәшәтәра-профилактикатә цхыраара Аусбарҭа аиҳабы Баҭал Кациа иажәақәа рыла, Аԥсни Урыстәылеи ргәабзиарахьчара Аминистррақәа уаанӡа ирыбжьарҵаз аиқәшаҳаҭрақәа инарықәыршәаны, аԥснытәи рколлегацәа ирыцхраарц иаауеит урыстәылатәи амедусзуҩцәа: ахәыҷыҳақьымцәа, аинфекционистцәа, ареаниматологцәа, аԥҟаҩцәа, атерапевтцәа.
Дара аус рулоит Гагра, Пицунда, Гәдоуҭа ахәшәтәырҭақәа рҟны. Убас ала аԥхынтәи аԥсшьараамҭа азы амедицинатә усзуҩцәа разымхара азҵаара аӡбара алыршахоит.
Аҳақьым хадацәа амедусбарҭақәа рҭагылазаашьақәа, хәшәыла аиқәыршәара, уҳәа рзы аҳасабырбақәа ҟарҵеит, иҟоу ауадаҩрақәа ирылацәажәеит.
Аилатәара аихшьаалақәа рыла, аҭыԥқәа рахь инеины уаҟа иҟоу аҭагылазаашьа агәаҭара азы аӡбамҭа рыдыркылеит. Иааиуа амчыбжь азы агәабзиарахьчара аминистр Гагратәии Гәдоуҭатәии араионтә хәышәтәырҭа Хадақәа, иара убас Пицундатәи ахәышәтәырҭеи аҳҭнықалақь амедицинатә усбарҭақәеи дырҭааараны дыҟоуп. Иарбоу амедусбарҭақәа роуп акурорттә аамҭахәҭа ашыкьаҳәымҭазы аиҳарак ақәыӷәӷәара зауа.
