Ақалақьтә клиникатә хәышәтәырҭаҿы адкыларҭатә ҟәша шеиҭаку, иара убас ара иҟаҵоу атәы Аҳәынҭқарра Ахада изеиҭеиҳәеит аҳақьым хада Виачеслав Абыхәба. Ҷыдала, арентгентә уада арҽеиратә усура иақәхарџьын 3.5 млн. мааҭ. Аҳәынҭқарра Ахада иныҟәарақәа раан ицыз Аҟәа ақалақь ахада  иазгәеиҭеит ковид аан абылра шыҟалаз. «Апалатақәа реиҭашьақәыргылара анаҩсгьы, амаҵзуратә уадақәа жәпакы реиҭашьақәыргылара ҳалшеит. Аԥхьаҟа иҵегьы иҟаҵатәу рацәоуп. Иазԥхьагәаҭоуп ахәшәтәырҭа ахыб аԥсахра», - ҳәа иҳәеит Беслан Ешба.

 Аслан Бжьаниа  имҩаԥигоз агәаҭаратә ныҟәарақәа рыҟны аҵыхәтәантәи ҭыԥын Аҟәатәи ашьха. Ара Аҳәынҭқарра Ахада идырбеит раԥхьа ишыҟаз еиԥш зеиҭашьақәыргылара азгәаҭоу аӡыршә. Иара убас нап адкылахоиит аԥсшьарҭатә ҭыԥ. 325 ԥшьыркца метра ашьаҟамҩатә хаҳәцәы  ԥсахуп.

Аихшьала ҟаҵо, Аслан Бжьаниа Аҟәа администрациа зегьы аусура ахә ҳаракны ишьеит, ҷыдала далкаан ақалақь ахада - Беслан Ешба. «Сара иазгәасҭарц сҭахуп  аиҭашьақәыргыларатә усурақәа зегьы ақалақьтә биуџьет ахарџь ала ишымҩаԥысуа. Ари ақалақь иарҳаз, ҳтәылауаа рԥароуп. Ҳара ҳганахь ала еснагь аԥшьгарақәа рыдгылара ҳазхиоуп», - ҳәа иҳәеит Аҳәынҭқарра Ахада.

Аслан Бжьаниа ажурналистцәа рызҵаарақәа рҭакқәа ҟаиҵеит.