Аҟәа. Лаҵарамза 25, 2024 шықәса. Аԥсныпресс. XVIII Жәларбжьаратәи амедиафорум «Акультурақәа рдиалог» аусура ахыркәшамҭаз, лаҵарамзы 25 рзы уи алахәылацәа Тверь ақалақь иаҭааит, араҟа урҭ Твертәи аобласт аҿы иреиҳау амедиахолдингқәа рахь иаҵанакуа РИА «Верхневолжье» аҟынтәи рколлегацәеи дареи еибадырит.
Амедиахолдинг аилазаараҿы иҟоуп арегион аҿы инагоу амассатә информациа акьыԥхьтә хархәагақәа реиԥш, ҳаамҭазтәи аинтернет-ресурсқәагьы. Ажуналистцәа дырԥыло убри, иара убас егьырҭ атемақәеи дрыхцәажәеит РИА «Верхневолжье» аредатор хада Иулиа Овсианникова:
«Амедиахолдинг «Верхневолжье» еиднакылоит есымчыбж иҭыҵуа ҩ-газеҭк, ԥшь-саитк, аилазаараҿы иҟоуп иара убас авидеои адизаини-рыстудиа, иҟоуп SMM (Social Media Marketing — асоциалтә ҳақәа рҿы амаркетинг - аредакциа азгәаҭа). Ҳара ҳмедиахолдинг Твертәи аобласт аҿы иԥхьагылоу усбарҭаны иҟоуп».
Иулиа Овсианникова ааигәа иҟоу егьырҭ атәылақәа аԥышәеимадара рыбжьаҵара акыр зҵазкуа усны иҟоуп ҳәа иазгәалҭеит.
«Ҳара ҳаидызкыло иаҳзеиԥшу аҭоурыхи атрадициақәеи ҳамоуп, аха убри аан иҟоуп аусура аиҿкаара еиуеиԥшым аформақәа, амассатә информациа ахархәагақәа рыҿиаразы еиуеиԥшым амҩақәа. Сара сгәаанагарала, ажурналист – ари зегьы здырырц зҭаху, специалистк иаҳасабала дзырбеио, дгәылызҭәаауа адырра ҿыцқәа раиура иашьҭоу уаҩызаоуп», - ҳәа илҳәеит лара.
Афорум ахыркәшамҭаз, аҳәаанырцәтәи ажурналистцәа рзы ақалақьқәа Ржев, Старица, Тверь рахь аекскурсиақәа еиҿкаахеит.
Аекскурсиа иалахәыз даара иргәаԥхеит, ацәанырра ӷәӷәа рызцәынагеит Ржев ақалақь аҿы иҟоу, Аџьынџьтәылатәи еибашьра Дуӡӡа аан зегь реиҳа ишьаарҵәыраз аидсларақәа ахьцоз аҭыԥ аҿы игылоу Асовет солдаҭ имемориал. Ари идуу, 25-метр рҟынӡа инаӡо асолдаҭ иԥшынра змоу абаҟа ауп. Араҟа иара убас ишьақәыргылоуп иҭахаз аибашьцәа рыхьӡқәа зну ахаҳәҟьаԥсқәа. Аексурсиа амҩаԥгаҩ иажәақәа рыла, араҟа, 14 мзы, ажьырныҳәамза 8, 1942 шықәса инаркны хәажәкырамза 31, 1943 шықәсанӡа Ржев ақалақь агаразы имҩаԥысуаз акыр ишьаарҵәыраз аидысларақәа раан иҭахеит 776 889-ҩык Асовет ар аибашьцәа.
Афорум алахәылацәа иара убас аекскурсиа аҳасабала иаҭааит Старицктәи Анцәа дзыхшаз Ацқьа Мариа лылацәеиқәыԥсара ахьӡала иргылоу аберҭыԥ. Уи Твертәи адгьыл аҿы зегь реиҳа ижәытәӡоу аныхабаақәа иреиуоуп. Аҭыԥантәи ажәытәжәабжь ала, ари аныхабаа XII ашәышықәса азы идыргылахьан. Иахьа ари аберҭыԥ аҵакыра аҭеиҭыԥш акыр иԥшӡоуп, уи ахылаԥшра бзиа амоуп.
Ажурналистцәа рныҟәара хыркәшахеит Урыстәыла ижәытәӡатәиу ақалақь – Тверь аҿы анеиааирала. Араҟа урҭ иаҭааит Твертәи Аимператортә хан, иара убас Аԥсеиқәырхаҩ Иаса Қьырса ахҩеила рҿаԥхьа иқәгылара ахьӡала иргылаз Акафедралтә ныхабаа.
