Аҟәа. Лаҵарамза 24, 2024 шықәса. Аԥсныпресс. Приднестровтәи Молдавтәи Ареспублика Иреиҳаӡоу Асовет Ахантәаҩы Алеқсандр Коршунов ПМА иҟоу Аԥсны Ахаҭарнакра ахадеи ПМА иҟоу Аахыҵ Уаԥстәыла аофициалтә хаҭарнакра ахадеи - Александр Ватамани Витали Ианковскии дырԥылеит, ҳәа адырра ҟанаҵоит Приднестровтәи Молдавтәи Ареспублика Иреиҳаӡоу Асовет апресс-маҵзура.
Александр Коршунов ас еиԥш иҟоу аусуратә аиԥыларақәа традициала шьҭа аиҩызаратә ҟазшьа рыманы иҟалеит, урҭ жәаҳәарада Приднестровиеи Аԥсни Аахыҵ Уаԥстәылеи рыбжьара аимадара арӷәӷәара иацхраауеит ҳәа инаҵшьны иазгәеиҭеит.
Аиԥылараҿы уи алахәылацәа Приднестровиеи Аԥсни Аахыҵ Уаԥстәылеи рыбжьара аусеицура арҿиара азҵаарақәа ирылацәажәеит, ргәаанагарақәа еибырҳәеит.
Аиԥылара ахыркәшамҭаз аганқәа аконструктивтә усеицуреи аилибакаареи рформат ала адиалог ацҵаразы еиқәшаҳаҭхеит.
Аиԥылара ихы алаирхәит Приднестровтәи Молдавтәи Ареспублика Иреиҳаӡоу Асовет ахантәаҩы адәныҟатәи аимадарақәа рзы иабжьгаҩ Сергеи Широков.
