Аҟәа. Жәабранмза 27, 2024 шықәса. Аԥсныпресс. Урыстәыла атранспорт Аминистрра мшаԥымза 30 инаркны цәыббрамза 30 рҟынӡа «иаку» абилеҭ ала ауаа Урыстәылантәи Аԥсныҟа, иара убас шьҭахьҟа Аԥснынтәи Урыстәылаҟа рымҩангара иалагоит, ҳәа адырра ҟанаҵоит Урыстәыла атранспорт Аминистрра Иаку атранспорттә напхгараҭара.
Раԥхьаӡа "иаку" абилеҭ ала Урыстәылантәи Аԥсныҟа аара еиҿкаан 2017 шықәсазы.
2024-тәи ашықәс азы акурорттә аамҭахәҭа азы абилеҭқәа рыҭира иалагахьеит.
Адлер аихамҩа авокзали Шәача аҳаирбаӷәазеи рҟынтәи ауаа автобус маҷқәа рыла имҩаныргоит Аԥсны хә-қалақьк рахь: Гагра, Пицунда, Гәдоуҭа, Афон ҿыц, Аҟәа.
«Иаку» абилеҭ «адәыӷба+автобус» ааухәар ҟалоит аихамҩатә вокзал акассақәа зегьы рҿы, иара убас Ауционертә Еилазаара «ФПК» агенттә ҳақәеи Зҭакԥхықәра Ҳәаақәҵоу Аилазаара «Урыстәылатәи Аихамҩақәа» аофициалтә саити www.rzd.ru рҿы.
«Иаку» абилеҭ «аҳаирплан + автобус» хадырҭәаауеит атуристтә мҩақәа рмаҵзурақәа ркаcсақәа рыҟны иара убас онлаинла аҳаирбилеҭқәа раахәара амаҵзурақәа рҟынтәи. «Иаку» абилеҭ азы еиҳа адыррақәа раиура ҟалоит Автономтә Икоммерциатәым Аиҿкаара «Иаку атранспорттә напхгараҭара» аофициалтә саит аҿы, иара убас уахи-ҽни аус зуа еиԥырҟьам аҭелтә еимадара аҭел ала: 8 (800) 600-1-006.
