Аҟәа. Хәажәкырамза 1, 2024 шықәса. Аԥсныпресс. Хәажәкырамза 1 азы Аԥсны Аҳәынҭқарра Ахада Аслан Бжьаниа Очамчыра ақалақь аҟны иналукааша аҳәынҭқарратә усзуҩы, Аԥсны Аҳәынҭқарра аҩбатәи ахада, Аԥсны Афырхаҵа, «Ахьӡ-Аԥша» аорден I аҩаӡара занашьоу Багаԥшь Сергеи Уасил-иԥа диижьҭеи 75 шықәса аҵра иазку агәаларшәагатә усмҩаԥгатәқәа дрылахәын.
Аҳәынҭқарра Ахада 1992-1993 шш. Аԥсны Аџьынџьтәылатә еибашьраҟны иҭахаз рбаҟа амҵан ашәҭшьҭаҵара иазкыз аусмҩаԥгатә далахәын.
Анаҩс Ахада Акультура ахан аҟны «С.У. Багаԥшь - 75» захьӡу ацәыргақәҵеи аныҳәатә еилатәараеи дырҭааит.
Аусмҩаԥгатәқәа иара убас ирылахәын Ахада Ихаҭыԥуаҩ Гәынба Бадра, Аԥыза-министр Алеқсандр Анқәаб, Апарламент Аиҳабы Ашәба Лаша, Ахада Иусбарҭа Анапхгаҩы Кәарҷиа Абесалом, Аиҳабыра алахәцәа, адепутатцәа, араионтә Администрациа, ауаажәларра рхаҭарнакцәа.
