Аҟәа. Цәыббрамза 27, 2024 шықәса. Аԥсныпресс. Иахьа Аԥсны Аҳәынҭқарра аҳҭнықалақь Аҟәа Қырҭтәыла Аҳәынҭсовет архәҭақәа рҟынтәи ахақәиҭтәра Амш 31 шықәса ахыҵит. Ашьжьымҭан, Аҟәа ақалақь Ахьӡ-Аԥша апарк аҿы 1992-1993 шш. Аԥсны Аџьынџььтәылатәи еибашьра аҿы иҭахаз афырхацәа Рмемориал амҵан ашәҭ шьыҵәрақәа шьҭарҵеит.

Арахь иааит Аҳәынҭқарра Ахада Аслан Бжьаниа, Жәлар Реизара-Апарламент Аиҳабы Лаша Ашәба, Жәлар Реизара-Апарламент адепутатцәа, Аҳәынҭқарра Ахада Иусбарҭа анапхгаҩы Абесалом Кәарҷиа, Аԥсны иҟоу Урыстәыла Ацҳаражәҳәаҩ Михаил Шургалин, Аԥсны Аџьынџьтәылатәи еибашьра аветеранцәа, иҭахаз аибашьцәа ранацәа, рыуацәеи рҭынхацәеи, ауаажәларра рхаҭарнацәа.

Аҟәа ахақәиҭтәразы 12 мшы имҩаԥысуаз ажәыларатә операциа напхгара арҭон Аԥсны атәылахьчара аминистр, аинрал-маиор Сулҭан Сосналиеви Аԥсны Аҳәынҭқарра Арбџьармчқәа ркомандаҟаҵаҩ Хада Сергеи Дбари. Ҳаибашьцәа гәымшәақәа  ирываршьааз акыр ишырацәазгьы ирылшеит 12-нызықьҩык рҟынӡа инаӡоз аӷа хәымга ирхәҭақәа шьҭахьҟа рынаскьагара.

Аҟәа. Цәыббрамза 27, 2024 шықәса. Аԥсныпресс. Ашәба Лаша Аԥсны жәлар Аԥсны Аҳәынҭқарра аҳҭнықалақь Аҟәа аҳақәиҭтәра амш рыдиныҳәалеит.

Аԥсны Жәлар Реизара – Апарламент Аиҳабы Ашәба Лаша Аԥсны жәлар Аԥсны Аҳәынҭқарра аҳҭнықалақь Аҟәа аҳақәиҭтәра амш рыдиныҳәалеит.

Адныҳәалараҟны иҳәоуп:

"Ҳаҭыр зқәу аветеранцәа!

Ҳаҭыр зқәу Аԥсны жәлар!

Аԥсны Жәлар Реизара – Апарламент ахьӡала ишәыдысныҳәалоит Ҳаԥсадгьыл Аԥсны аҳҭнықалақь ақырҭуа қәылаҩцәа рыҟнытә ахы ақәиҭтәра амш. 

1993 шықәса цәыббрамза 27 амш Аԥсны жәлар рҭоурых ианылеит хьӡи-ԥшеи змоу рыцхәны, уи инашьҭарххны 1992-1993 шш. Аԥсны Аџьынџьтәылатә еибашьраҟны Аиааира ду амшгьы азгәаҳҭо иҟалеит. 

Аҟәа. Цәыббрамза 27, 2024 шықәса. Аԥсныпресс. Аҳәынҭқарра  Ахада Аслан Бжьаниа  Аԥсны жәлар Аҟәа ахақәиҭтәра амш рыдиныҳәалеит.

Ҳаҭыр зқәу ҳауажәлар!  Акыр иаԥсоу аҳҭнықалақьуааи асасцәеи!

1993 шықәса цәыббрамза 27 Аԥсны аҭоурых адаҟьақәа рҟны инхоит ҳаҳҭнықалақь ақырҭуа мпыҵахалаҩцәа рҟынтә ахы ианақәиҭтәыз иамшны. Ари ахҭыс Аԥсны Аџьынџьтәылатә еибашьраҟны акырӡа зҵазкуа хҭысын иҟалеит Ҳаԥсадгьыл ахи-аҵыхәеи ахақәиҭтәра иазкыз ақәԥараҟны. Аҟәа ахы иақәиҭтәын, ари Аиааирала ихацыркын ахьыԥшьымрахь инагаз амҩа.

Аҟәа. Цәыббрамза 27, 2024 шықәса. Аԥсныпресс. Иахьа, Аԥсны Аҳәынҭқарра аҳҭнықалақь Аҟәа Қырҭтәыла аҳәынҭсовет архәҭақәа рҟынтәи ахақәиҭтәра  амш 31 - шықәса ахыҵуеит. Аҟәа ахақәиҭтәразы 12 мшы имҩаԥысуаз ажәыларатә операциа напхгара арҭон Аԥсны атәылахьчара аминистр, аинрал-маиор Сулҭан Сосналиеви Аԥсны Аҳәынҭқарра Арбџьармчқәа ркомандаҟаҵаҩ Хада Сергеи Дбари. Ҳаибашьцәа гәымшәақәа  ирываршьааз акыр ишырацәазгьы ирылшеит 12-нызықьҩык рҟынӡа инаӡоз аӷа хәымга ирхәҭақәа шьҭахьҟа рынаскьагара.

Аҵыхәтәаны, ҽынла, цәыббрамза 27, 1993 шықәса рзы ҳаҳҭнықалақь агәаҿы игылаз Аминистрцәа Реилазаара ахыбра иахашәыршәырит Аԥсны Аҳәынҭқарра абираҟ. Ҳаԥсадгьыл аҳҭнықалақь ахы иақәиҭтәын. Араҟоуп иахьыҵхыз Аиааира ашьаҭа! Иаанхаз хымш рыла аӷа шьҭахьҟа, Егры аӡиас ала инагоу аҳәынҭқарратә ҳәаа ахь дыԥхаҵан. Цәыббрамза 30 рзы Қырҭтәылеи Аԥсни ирыбжьоу аҳәынҭқарратә ҳәаа аҿы ишьақәыргылан Аԥсны абираҟ. 

Аҟәа. Цәыббрамза 26, 2024 шықәса. Аԥсныпресс. Аминистрцәа Реилазаара аҿы «2024 шықәсазы  ацитрустә шәырқәа реингалареи рыҭиреи рзы» Ақәҵара рыдыркылеит.  

Аԥсны аиҳабыра ацитрусқәа раахәаразы ахәқәа шьақәдыргылеит.

Кьылак ашәыр азы иреиҵаӡоу ахәԥса абасеиԥш ишьақәыргылоуп:

амандаринеи апельсини — 45 мааҭ.

алимон — 42 мааҭ.

истандартым ашәыр — 10 мааҭк.

Сынтәа иазыԥшуп 37 000 тонна рҟынӡа амандарина аҽаҩра ҳәа иҳәеит Аминистрцәа Реилазаара аилатәараҟны ақыҭанхамҩа аминистр Беслан Џьопуа.

Аҟәа. Цәыббрамза 26, 2024 шықәса. Аԥсныпресс. Аԥсны Арбџьар мчқәа рыдҵаҟаҵаҩ, Ахада Аслан Бжьаниа Аԥсны Аџьынџьтәылтә еибашьраҟны  Аиааиреи Ахьыԥшымреи  рныҳәа 31 шықәса ахыҵра иазкыз аусмҩаҧгатә далахәын. Абри азы адырра ҟанаҵоит Аҳәынҭқарра Ахада ипресс-маҵзура.

Аизара мҩаԥысит атәылахьчара Аминистрраҟны.

Аслан Бжьаниа Аиааиреи Ахьыԥшымреи рымш азы аррамаҵзураа дрыдныҳәалеит.

Аҳәынҭқарра Ахада иҟаиҵаз адныҳәаларатә текст аҟны иҳәоуп:

«Аҩызцәа аофицарцәа! Сара, арбџьар мчқәа рыдҵаҟаҵаҩ иаҳасаб ала,  ҳаҭырқәҵарыла исыдыскылоит аныҳәа ду  - Аиааира амш аламҭалазы Аԥсадгьыл ахьчаҩцәа шәыдныҳәалара.

Иҵит 31 шықәса амилаҭ рԥыза Владислав Арӡынба инапхгарала Аԥсынтәыла ақырҭуа мпыҵахалаҩцәа рҟынтәи ахы иақәиҭтәуижьҭеи. Абра итәоу аӡәырҩы Аԥсны Аџьынџьтәылатә  еибашьра шәалахәын, фырхаҵарыла шәыԥсадгьыл шәыхьчеит. Иахьагьы шәуалԥшьа нашәыгӡоит, шәԥышәа ду еизҳауа абиԥара ирымыжәдоит Шәара шәыԥсҭазааратә мҩа гәыла-ԥсыла шәџьынџь ахьчара ишазку ҩашьара ақәым.

Аҟәа. Цәыббрамза 26, 2024 шықәса. Аԥсныпресс. Аԥсны адәныҟатәи аусқәа Рминистрра Қарҭ ахь Аԥсны исуверентәу, ихьыԥшыму ҳәынҭқарраны иазхаҵаны амч ахамырхәаразы аиқәшаҳаҭра анапы аҵарҩызарц азы даҽазныкгьы ааԥхьара ҟанаҵеит.

Адәныҟатәи аусқәа Рминистрра ахҳәаа:

«Аԥсны АдәАР аҟны азхьаԥшра аҳҭеит Қырҭтәыла аԥыза-министр Иракли Кобахиӡе ЕАА Ассамблеиа хада 79-тәиасессиаҿы 2024 шықәса цәыббра 25 азы иқәгылара.

Аҟәа. Цәыббрамза 24, 2024 шықәса. Аԥсныпресс. 2024 шықәса рзы Аҳәынҭқарра Ахада инапынҵа ала ареспублика аҿы ақалақь аиланхарҭатә раионқәа ринфраструктура аиӷьтәра иазкны аҩнеихагылақәа рааигәа-сигәа иҟоу аҵакырақәа реиқәыршәазаара иадҳәалоу аусмҩаԥгатәқәа  мҩаԥысуеит, ҳәа адырра ҟанаҵоит Аҳәынҭқарра Ахада ипресс-маҵзура.

Убас, Аршба имҩаҿы ауадарацәа змоу аҩнеихагылақәа №65, №71 рыҩнгәарақәа реиқәыршәазаара иадҳәалоу аусурақәа ахыркәшамҭахь инеиуеит.  Аҳәынҭқарратә еилазаара «Аԥсныргылара» инанагӡо арҭ аусурақәа рфинансыркра мҩаԥысуеит ареспубликатә биуџьет аҟынтәи.

Аҟәа. Цәыббрамза 24, 2024 шықәса. Аԥсныпресс. Аслан Бжьаниа Санкт-Петербург агубернатор ихаҭыԥуаҩ Кирилл Полиаков напхгара ззиуаз аделегациа  идикылеит, ҳәа адырра ҟанаҵоит Аҳәынҭқарра Ахада ипресс-маҵзура.

Аиԥылара иалахәын иара убас  атәыла аԥыза-министр актәи ихаҭыԥуаҩ, афымцамчи атранспорти рминистр Џьансыхә Нанба, аԥыза-министр ихаҭыԥуаҩ, аекономика аминистр Кристина Озган, Аҟәа ақалақь ахада Беслан Ешба.

Абизнес ахаҭарнакцәа зеилазаараҿы иҟоу аделегациа аара ахықәкы хаданы иҟоуп — Аԥсны аинвестициатә потенциали алшарақәеи реилкаара, аусеицура аперспективақәа рганахьала атәыла анапхгара рыҿцәажәара. Аиԥылара аҿы Аԥсни Санкт-Петербурги аԥхьаҟатәи русеицура иалацәажәеит.

Аҳәынҭқарра Ахада асасцәа аԥсшәа раҳәо, иазгәеиҭеит ари аиԥылара иазыԥшуижьҭеи акыр шыҵуа. 

«Сынтәатәи аԥхынразы ҩынтә Санкт-Петербург анеира сылшеит. Аԥсуа делегациа шшәыдышәкылаз, иаашәырԥшыз асасдкылара, ҳәарада, даараӡа ҳаҭыр ақәаҳҵеит», -  иҳәеит Аслан Бжьаниа, Аԥсни Санкт-Петербурги реизыҟазаашьа аҿиара аҩ-ганкгьы рзы хәарҭара шаиуа, хыԥхьаӡара рацәала аус дуқәа рыҟаҵара шалнаршо азгәаҭаны. 

Агубернатор ихаҭыԥуаҩ Аԥсны Ахада иҭабуп ҳәа еиҳәеит иаадырԥшыз асасдкыларазы, иазгәеиҭеит Аԥсны уажәада дшымаацыз. «Сара раԥхьаӡаакәны Урыстәылеи Аԥсни рҳәаа сахысит, уамашәа ибаны исыдыскылеит ара инхо ауаа, ареспублика иамоу асасдкылара. Акырӡа аҵанакуеит ҳәа исыԥхьаӡоит хаҭалатәи аимадарақәа рнаҩсангьы, ҳнаплакқәа русеицура арҿиара, Аԥсынгьы Санкт-Петербурггьы аинвестициақәа реизырҳара ацхраара», – иҳәеит Полиаков.

Санкт-Петербург агубернатор Александр Беглов ихьӡала Аԥсны Ахада иҭабуп ҳәа еиҳәеит ааигәа агубернатор имаҵурахьы еиҭалхразы Аслан Бжьаниа иҟаиҵаз адныҳәаларазы. «Уи иара даара деигәырӷьеит. Шәара раԥхьа аҭел изасқәаз шәыруаӡәкын. Ари иҭабуп ҳәа ахиҳәаауеит, аҿиаразы аусеицура дшазхиоу ацҵаны. Ҳара анаплакқәа жәпакы рыҟнытә аколлегацәа ҳацуп  аизыҟазаашьақәа рышьақәыргыларазы, Аԥсны абизнес-уаажәларра ахаҭарнакцәеи ҳареи ҳаибадырырц азы», – ҳәа иҳәеит иара.

Аҟәа. Цәыббрамза 24, 2024 шықәса. Аԥсныпресс. Аҳәынҭқарра-зинтә политика азы апарламенттә Еилакы аҿы азакәан апроектқәа ԥшьба ирылацәажәеит.

«Ареспублика Аԥсны Аџьатә закәанеидкыла аиҭакрақәа ралагаларазы» азакәан апроект ианалацәажәа ашьҭахь, Аилак алахәылацәа уи иааиуа Апарламент асессиа аилатәара актәи аԥхьараҿы адкыларазы адгалара аҟаҵаразы аӡбамҭа рыдыркылеит.

Автор игәаанагарала, зыдгалара мҩаԥгоу аиҭакрақәа аусурақәеи аусзуҩцәа рзанааҭқәеи рзы иаку атариф-квалификациатә дырранҵа иану азанааҭқәа рыла аусзуҩцәа рзанааҭҟазареи  рзанааҭдырра аҩаӡареи рышьҭыхра ахымԥадатәра иадҳәалоуп.