Аҟәа. Лаҵарамза 22, 2024 шықәса. Аԥсныпресс. Урыстәыла иҟоу Аԥсны Ацҳаражәҳәарҭа аҿы Урыстәыла иҟоу Аахыҵ Уаԥстәыла ацҳаражәҳәаҩ Знаур Гассиев «Ахьӡ-Аԥша» аорден III аҩаӡара ианашьара ацеремониа мҩаԥысит.
Лаҵарамза 14, 2024 шықәса рзы Аԥсны Аҳәынҭқарра Ахада Аслан Бжьаниа Знаур Гассиев Аԥсни Аахыҵ Уаԥстәылеи рыжәларқәа рыбжьара аусеицуреи реиҩызара арӷәӷәареи рҟны хаҭалатәи илагала ду азы аорден «Ахьӡ-Аԥша» III аҩаӡара ианашьара азы Аусԥҟа инапы аҵаиҩит.
Иҳараку аҳәынҭқарратә ҳамҭа Москва иҟоу Аԥсны Ацҳаражәҳәарҭа аҿы Знаур Гассиев инапаҿы ииҭеит Урыстәыла иҟоу Аԥсны ацҳаражәҳәаҩ Алхас Кәыҵниа.
Знаур Гассиев Аԥсны анапхгара аҟынтәи иоуз ахшыҩзышьҭреи инаигӡо аусура аҳаҭырқәҵареи рзы иҭабуп ҳәа иҳәеит.
