Аҟәа. Мшаԥымза 9, 2024 шықәса. Аԥсныпресс.  Аԥсны Аҳәынҭқарра акомпозиторцәа Реидгыла алахәыла, Аԥсны зҽаԥсазтәыз артист Пиотр Дмитри-иԥа Петров ииубилеитә концерт мҩаԥгахоит мшаԥымза 18 рзы, С.Ҷанба ихьӡ зху Аԥснытәи аҳәынҭқарратә драматә театр аҿы.

Аҳәынҭқарратә камертә оркестр ала еиҿкаахо аиубилеитә концерт акомпозиор 75-шықәса ихыҵра иазкхоит. Аиубилеитә хәылԥазы рхы аладырхәраны иҟоуп акомпозитор Пиотр Петров ихаҭа, Артак Агаджаниан - атруба, Нана Черқьезиа - сопрано, Анастасиа Курочкина -флеита, Вера Ҳагба – аскрипка. Аиубилеитә хәылԥазы иалахәхоит иара убас Аҳәынҭқарратә камертә оркестр. Уи анапхгаҩыс дамоуп Адам Ҳагба.

Аҟәа. Мшаԥымза 9, 2024 шықәса. Аԥсныпресс.  Инал Гаделиа аиааира игеит, Анастасиа Погосова араӡнытә медал ланашьахеит Урыстәыла зҽаԥсазтәыз азыҟаҵаҩ А.Ф. Малина игәалашәара иазкны Тамбов ақалақь аҿы имҩаԥысуаз  аҳәсеи ахацәеи рыбжьара аӡиудо азы Урыстәылазегьтәи атурнир аҿы, ҳәа адырра ҟанаҵоит Аԥсны аҿари аспорти русқәа рзы Аҳәынҭқарратә Еилакы.  

Инал Гаделиа  акапантә категориа 100 кьылак рҟынӡа иҟоу иаҵанакуа  рыбжьара дықәгылон, Анастасиа Погосова –  52 кьыла иҟоу рыбжьара.

Аҟәа. Мшаԥымза 5, 2024 шықәса. Аԥсныпресс.   50 шықәса раԥхьа, мшаԥымза  7, 1974 шықәса рзы акыр шықәса анызҵыз аԥсуа быргцәа рансамбль «Нарҭаа» Венгриа имҩаԥысуаз Жәларбжьаратәи авокалтә коллективқәа рфольклортә конкурс аҿы иреиҳаӡоу аҳамҭа «Ахьтәы ԥсаркәты» анашьахеит.

Аԥсны акыр шықәса анызҵыз абыргцәа рансамбль «Нарҭаа» раԥхьа иаԥҵан 1948 шықәса рзы акомпозитор Иван Кортуа ила, анаҩс уи напхгара аиҭон акомпозитор Кәасҭа Ченгелиа.  Ансамбль Аԥсны еиԥш уи хара анҭыҵгьы, Асовет Еидгыла зегьы аҿы еицырдыруан. Уи иалахәыз артистцәа 70 шықәса инаркны 130 шықәса рҟынӡа рхыҵуан.  

«Мшаԥымза, 1974 шықәса рзы аԥснытәи абыргцәа рансамбль «Нарҭаа» аӡбахә Европа иалаҩит, избан акәзар уи иаиуит аҳамҭа хада – «Ахьтәы ԥсаркәтәы».  Аԥсны жәлар зегьы уи гәырӷьара дуны ирзыҟалеит, уимоу ачынуаагьы аиааирагаҩцәа ҳаҭырла ирԥылон, гәыкала реихьӡарақәа иреигәырӷьон», –  ҳәа ишәҟәы «Поёт ансамбль долгожителей «Нартаа»» аҿы иҩуан Алеқсеи Аргәын.

Усҟантәи амшқәа рзы агазеҭ «Советская Абхазия», мшаԥымза 18, 1974 шықәсазы ареспублика акультуратә ԥсҭазаараҿы иҟалаз ари акыр зҵазкуаз ахҭыс инарҭбааны иалацәажәон:

Аҟәа. Мшаԥымза 7, 2024 шықәса. Аԥсныпресс. Егрытәи аӡфымцатә Станциа аӡымҩахгагатә тоннель аҿы иҟалаз аҭӡы аилабгара ахҟьаԥҟьақәа рықәгара рҽеиҭныԥсахуа иаҿуп. Аусуратә бригадақәа аӡымҩангага абетонтә ҭӡы аԥҽыхақәеи егьи ахаҳәи-мҿыҳәи рҟынтәи арыцқьара иаҿуп, ҳәа адырра ҟанаҵоит Ареспубликатә Унитартә Наплакы «Амшынеиқәафымцамч».

Ианаҭаххо азы аҭӡы идуу аԥҽыхақәа еиҳа имаҷу ала иԥҽны атоннель аҟынтәи иқәгахоит.

Авариа аӡымҩахгагатә (адеривациатә) тоннель 8-тәи акилометр аҿы  иҟалеит.  

Аҟәа. Мшаԥымза 7, 2024 шықәса. Аԥсныпресс. Урыстәыла атәылауаҩԥҳәыс Гагра ақалақь аҿы анаԥшратә плошьадка аҟынтәи далҟьаны дҭахеит.

«40-шықәса зхыҵуаз аԥҳәыс анаԥшратә плошьадка далҟьеит. Акаҳараан уи ӷәӷәала ахәрақәа лоуит. Ҳара ҳаиқәырхаҩцәа уи ахәышәтәырҭахь днаргеит, аха лара деиқәымхаӡеит», - ҳәа иҟалаз амашәыр азы Аԥсныпресс ахь адырра ҟаҵо иҳәеит Гагра араион аҿы Аԥшаара-еиқәырхаратә Отриад аиҳабы Давид Бганба.

Иҭахаз аԥҳәыс Шәача ақалақь аҿы инхоз, 1984 шықәсазы ииз  Инесса Поленко лоуп.

Аҟәа. Мшаԥымза  7, 2021 шықәса. Аԥсныпресс. Аԥсны Аҳәынҭқарра Ахада Аслан Бжьаниа Урыстәылатәи Афедерациа Афедералтә Еизара Афедерациа Ахеилак Ахантәаҩы В.И. Матвиенко лиубилеи лыдиныҳәалеит.

Адныҳәаларатә цҳамҭаҟны иҳәоуп:

«Ҳаҭыр зқәу Валентина Иван-иԥҳа!

Гәык-ԥсыкала ишәыдысныҳәалоит Шәымшира.

Аҟәа. Мшаԥымза 3, 2022 шықәса. Аԥсныпресс. Аԥсны Аҳәынҭқарра Ахада Аслан Бжьаниа М. В. Ломоносов ихьӡ зху Москватәи аҳәынҭқарратә университет аректор Виктор Садовничи иубилеи идиныҳәалеит.

Адныҳәаларатә цҳамҭаҿы иҳәоуп:

«Ҳаҭыр зқәу Виктор Антон-иԥа, ишәыдысныҳәалоит шәиубилеи.

Шәара ректорс шәыҟазаара аамҭа аҩныҵҟала М. В. Ломоносов ихьӡ зху Москватәи аҳәынҭқарратә университет Урыстәылатәи Афедерациа аҟнеиҧш, адунеи зегьы аҟынгьы иреиҳау аҵараиурҭақәа рыбжьара заҳаҭыр ҳараку, аԥхьагылара змоу аҵараиурҭақәа ируакхеит.

Аҟәа. Мшаԥымза 6, 2024 шықәса. Аԥсныпресс. Москва ақалақь аҿы Ихьыԥшым Аҳәынҭқаррақәа Реиҩызара аконгресстәи ацәыргақәҵатәи аусура азы Анапхгарабжьаратәи Ахеилак изаамҭанытәиу аилатәара мҩаԥысит. Ахеилак аусура рхы аладырхәит Урыстәылатәи Афедерациа, Ареспублика Белорусь, Ҟазахсҭан, Азербаиџьан, Ҟыргызсҭан, Ермантәыла, Молдова ахаҭарнакцәа.

Ареспублика Аԥсны аделегациа Ахеилак аусура абар шьҭа хынтәиуп ахы аланархәуижьҭеи.

Урыстәыла иҟоу Аԥсны ахәаахәҭратә хаҭарнак, Аԥсны Аҳәынҭқарра Москватәи Акультуратә Усуратә Центр аԥҵаратә Хеилак ахантәаҩы  Олег Барцыц иқәгылараҿы, Аԥсны формалла макьаназы Ихьыԥшым Аҳәынҭқаррақәа Реиҩызара ишаламгьы, ԥыхьатәи Асовет Еидгыла иалаз атәылақәа аус рыцура азы агәҭакқәа амоуп ҳәа инаҵшьны иазгәеиҭеит.

Аҟәа. Мшаԥымза 6, 2024 шықәа. Аԥсныпресс. Аслан Бжьаниа Иира амш азы адныҳәаларақәа идикылоит. Аҳәынҭқарра Ахада 61 шықәса ихыҵит.

Аслан Бжьаниа адныҳәалара изааит аладауаԥстәылатәи ахада иҟнытә: Алан Гаглоев изеиӷьеишьеит агәабзиара, еицакра зқәым агәамч, агәыхәтәыхьӡара, Аԥсны Аҳәынҭқарраҟны аҭынчреи аизҳазыӷьареи рыхьӡала иҿаԥхьа иқәиргылаз ауснагӡатәқәа рынагӡара. 

«Сгәы иаанагоит хаимадара, Аԥсны Аҳәынҭқарреи Алада Уаԥстәылеи рыбжьара традициала ишьақәгылаз аиҩызаратә еизыҟазаашьа бзиақәа ррырҭбааразы ҳусеицура иацҵахоит ҳәа.

Урыстәылатәи Афедерациа Аиҳабыра Ахантәаҩы Михаил Мишустин адныҳәаларатә аацҳамҭаҟны Аслан Бжьаниа изеиӷьеишьеит агәабзиара, аҭакԥхықәра зцу аҳәынҭқарратә маҵзураҟны ахирра, аихьӡара ҿыцқәа. Уи иара убас иҳәеит «Урыстәылатәи Афедерациеи аԥсны Аҳәынҭқарреи рзы анарха змоу акрызҵазкуа ахырхарҭақәа рырҿиара иазку мҽхакыҭбаала аимадара, ԥеиԥш змоу аԥшьгара ҿыцқәа» рыцхраара аԥхьаҟагьы иацҵахоит ҳәа игәы ишаанаго   

Урыстәылатәи Афедерациа  Афедералтә Еизара Ахеилак Ахантәаҩы Валентина Матвиенко Аԥсны Ахада Аслан Бжьаниа изеиӷьалшьеит агәабзиара, ахирра, аихьӡара ҿыцқәа инапы злаку аҭакԥхықәра зцу иусураҟны. Матвиенко илхәеит аԥснытәи апарламентари аус ацура арҭбаара дшазхиоу  аҳаҭыреиқәҵареи аиашареи, иара убас агәылаеимабзиара атрадициақәа шьаҭас ирыҭаны иқәгылоу апроблемақәа рыӡбара хықәкыс иҟаҵаны.

Аԥсны иҟоу Аҷыдалкаатәии азинмы змоу Урыстәыла ацҳаражәҳәаҩ Михаил Шургалин иҟаиҵаз аацҳамҭаҟны иазгәеиҭеит Аԥсны Ахада аидгыларатәи, астратегиатә усеицура апринципқәа уасхырс иззышьҭоу урыстәыла-аԥснытәи аизыҟазаашьақәа рыҿиараҟны инаигӡо ароль. Уи иара убас иҳәеит Урыстәыла аиашьаратә Аԥсны ганрацәала ацхраара ишацнаҵо асоциал-економикатәи акультура-гуманитартәи ҿиараҟны, ашәарҭадареи асуверенитети ралыршараҟны, жәларбжьаратәи апозициақәа рырӷәӷәареи арегионалтә шәарҭадареи рыҟны. 

Ареспублика Башкортосҭан ахада Ради Хабиров Аԥсны Ахада изеиӷьеишьеит агәабзиара, аҭынчра, ахирра, аҭакԥхықәра зцу иусураҟны аихьӡара ҿыцқәа, ахә ҳаракны ишьеит Аԥсны Ахада Ареспублика Башкортосҭан иазыҟазаашьа бзиеи аԥшьгарақәа ириҭо адгылареи.

Ареспублика Башкортосҭан Аԥыза-министр Андреи Назаров Аслан Бжьаниа изеиӷьеишьеит аҳәынҭқарратә усураҟны аихьӡара ҿыцқәа, агәабзиара, еицакра змам агәамч, анасыԥ ду. «Акыр шықәса раахыс шәыздыруеит апрофессионал ду, зыгәра гоу уаҩык иаҳасабала. Иахьа Шәара рыӡбара шәаҿуп акрызҵазкуа аекономикатә проектқәа, аинфраструктура арҿыцра, ауаа рыԥсҭазаашьа аиӷьтәра ирыдҳәалоу ауснагӡатәқәа акыр», - аҳәоит адныҳәаларатә аацҳамҭаҟны.

Агәабзиара, ахирра, аҭакԥхықәра зцу иусураҟны аԥхьаҟагьы аихьӡарақәа ирызкыз азеиӷьашьарақәа идикылеит Аслан Бжьаниа Аԥсны иҟоу Аҷыдалкаатәии азинмы змоуи Алада Уаԥстәыла Ацҳаражәҳәаҩ Олег Боциев. Уи иҳәеит Ахада иганахьала шықәсарацәалатәи аизыҟазаашьақәа рырҭбаареи наҟ-ааҟ феида змоу аусеицуреи рзы ишьҭаҵоу ауасхыр ӷәӷәа амҽхак арҭбааразы иҟаҵоу ацхыраарала  иабзоураны Аԥсны Уаԥстәылеи рыбжьара аиҩызара аҿиара еиԥҟьараны ишыҟам атәы. 

Урыстәылатәи Афедерациа ашәарҭадара  Ахеилак Ахантәаҩы Николаи Патрушев адныҳәаларатә аацҳамҭаҟны иҳәеит «ашәарҭадара алыршара иазку азҵаараҟны Урыстәыла аганахьала Шәара шәреспублика аус шәыцура зылшо, зыгәрагоу аҩыза бзиа дамоуп».  Патрушев Аԥсны Ахада изеиӷьеишьеит агәамч, Аԥсны жәлар реизҳазыӷьара ахьӡала аусураҟны аԥхьаҟагьы аихьӡарақза. 

Урыстәылатәи Афедерациа ашәарҭадара Ахеилак актәи Амаӡаныҟәгыҩ Рашид Нургалиев Аслан Бжьаниа изеиӷьеишьеит иҩызцәа, изааигәоу иҭынхацәа  рганахьала адгылара, агәабзиара, агәамч, аизҳазыӷьара. «Шәара шәыԥсҭазааратә мҩа аԥсуа жәлар рымаҵ ауреи Аԥсны Аҳәынҭқарра аизҳазыӷьареи ирызкуп», - аҳәоит ателеграммаҟны.

Агәабзиара, агәеизҳара, ақәҿиарақәа, еицакра змам агәамчи аоптимизмреи Аслан Бжьаниа изеиӷьеишьеит аацҳамҭаҟны Ҟабарда-Балкариатәи Ареспублика Ахада Казбек Коков.

Шьамтәылатәи Арабтә Республика Ахада Башар Аль-Асад адныҳәаларатә цҳамҭаҟны Аԥсны Аҳәынҭқарра Ахада изеиӷьеишьеит аихьӡарақәа, ахирра, анасыԥ. 

Александр Новаки Максим Решетникови Аслан Бжьаниа ҭелла Иира амш идырныҳәалеит.

Имҩаԥысит Аԥсны Ахада Аслан Бжьаниеи Краснодартәи атәылаҿацә агубернатор Вениамин Кондратиеви ҭелла реицәажәара.  Вениамин Кондратиев Краснодартәи атәылаҿацә ауааԥсыра рыхьӡала, хаҭала иара ихьӡала Аслан Бжьаниа иира Амш идиныҳәалеит.

Шәача ақалақь Ахада Алеқсеи Копаигородски ҭелла Аслан Бжьаниа иира Амш идиныҳәалеит. Алеқсеи Копаигородски Аԥсны Аҳәынҭқарра  Ахада изеиӷьеишьеит агәабзиара, ахирра, аҭакԥхықәра зцу аусураҟны аихьӡара ҿыцқәа.

Имҩаԥысит Аԥсны Аҳәынҭқарра Ахада Аслан Бжьаниеи Русҭам Минниханови ҭелла реицәажәара.  Ҭаҭарсҭан Ареспублика Ахада Аслан Бжьаниа иирамш идиныҳәалеит. «Гәык-ԥсык ала ишәзеиӷьасшьоит агәамч, аихьӡарақәа Аԥсны Аҳәынҭқарра аизҳазыӷьара ахьӡала шәусураҟны, агәабзиара, анасыԥ, ахирра Шәаргьы ишәзааигәоу ауаагьы», - иҳәеит иара. 

Рашид Темрезов гәыблыла Аслан Бжьаниа ҭелла иира Амш идиныҳәалеит.

Ҟарачы Черкесстәи Ареспублиа  Ахада Аԥсны Аҳәынҭқарра Ахада изеиӷьеишьеит аизҳазыӷьара, аҭынчра, инапы злаикуа аусқәа рыҟны аихьӡарақәа. 

Аҟәа. Мшаԥымза 7, 2024 шықәса. Аԥсныпресс. Аԥсны Жәлар Реизара – Апарламент Аиҳабы Ашәба Лаша Урыстәылатәи Афедерациа  Афедералтә Еизара Афедерациа Ахеилак Ахантәаҩы Валентина  Матвиенко  Лира амш лыдиныҳәалеит.

«Шәара адунеитә ҩаӡараҟны иҟоу политикоуп. Жәларбжьаратәи аиԥыларақәа рыҟны Шәара шәажәа акрылнадоит аусеицура, аҭынчра, аиашара аидеиа ныҟәызго, ауаатәҩса рԥеиԥш еиҷаҳауа аӡә иаҳасабала. Шәара ԥсахрада иаанышәкыло атәылауаҩратә позициала аурыс жәлари Урыстәыла Аҳәынҭқарреи ринтересқәа рыхьчаразы шәгылоуп.