Аҟәа. Ԥхынҷкәынмза 18, 2023 шықәса. Аԥсныпресс. Имҩаԥысит аҩныҵҟатәи аусқәа рминистр Роберт Киут Краснодарҟа иусуратә ҭаара. Аҭаара аҳәаақәа ирҭагӡаны, аҩныҵҟатәи аусқәа рминистр аҵараиурҭа анапхгараҭара ахаҭарнакцәеи Аԥснынтәи уаҟа аҵара зҵо акурсантцәеи дырԥылеит. Аиԥылара аҿы ирылацәажәеит анаҩстәи аусеицура, акурсантцәа аҵараҿы рихьӡарақәеи рлеишәеи ирыдҳәалоу азҵаарақәа. Иара убас 2024-2025 шш. аусеицура азы азԥхьагәаҭарақәа ҟаҵан.  

Роберт Киут, аԥснытәи акурсантцәа рахь ихы рханы, Урыстәыла аҩныҵҟатәи аусқәа Рминистрра иреиӷьу аҵараиурҭақәа ируаку аҿы ироуз атеориатә дыррақәа, ишьаҭарку азанааҭтә ҽазыҟаҵарақәа, иара убас аморал-ԥсихологиатә ӡрыжәра ҳаԥхьаҟа азинхьчаратә усбарҭақәа русзуҩцәа русуразы акырӡа зҵазкуа, узықәгәыӷыртә иҟоу уасхырны иҟалоит ҳәа инаҵшьны иазгәеиҭеит.

Аҟәа. Ԥхынҷкәынмза 18, 2023 шықәса. Аԥсныпресс. Ԥхынҷкәынмза 19 рзы Аԥсны асахьаҭыхыҩцәа Реидгыла Ацәыргақәҵатә зал Хада аҟны  иаатуеит ацәыргақәҵа «Ашықәсан иреиӷьу аусумҭа». Абри азы адырра ҟанаҵоит акультура Аминистрра апресс-маҵзура.

Аҳәынҭқарратә премиа аиуразы аконкурс 2001 шықәсазы иаԥҵан. Есышықәса, аҳәынҭқарратә комиссиа, аконкурс амҩаԥгара аԥҟарақәа инарықәыршәаны, хҩык аиааира згаз ралкаара мҩаԥнагоит.  

Сынтәа  аекспозициа аҿы ицәыргақәҵахоит шықәсык аҩныҵҟа иаԥҵаз аҿыханҵа, аграфика, аскульптура, уҳәа аусумҭақәа.  

Аҟәа. Ԥхынҷкәынмза 18, 2023 шықәса. Аԥсныпресс. Аҩныҵҟатәи аусқәа рминистр Роберт Киут инапынҵа ала, ҩ-тоннак инареиҳаны аԥснытәи  амандаринақәа, Донбасстәи ахәыҷқәа рзы ашықәсҿыцтәи аҳамҭақәа реиқәыршәара азы Краснодарҟа идәықәҵоуп. Абри атәы аанацҳауеит аҩныҵҟатәи аусқәа Рминистрра апресс-маҵзура.

Аҟәа. Ԥхынҷкәынза 18, 2023 шықәса. Аԥсныпресс. Урыстәылатәии аҳәаанырцәтәии икоммерциатәым аиҿкаарақәа рыбжьара апартниортә еизыҟазаашьақәа рыҿиареи асоциалтә аԥшьгарақәа реицынагӡареи  иазырхоу Жәларбжьаратәи афорум «Агәыҳалалратә усқәа раамҭа» Аҟәа ақалақь аҿы иаатит.

Аусмҩаԥгатә аԥшьгареи аиҿкаареи ахахьы иагеит Урыстәыла аус ацуразы Аԥсны иҟоу Ахаҭарнакра.

Аҟәа. Ԥхынҷкәынмза 16, 2023 шықәса. Аԥсныпресс. «Аҿкчымазарақәа риммунатә профилактика азы» азакәан апроект   иахәаԥшит асоциалтә политикеи аџьеи агәабзиарахьчареи адемографиеи аветеранцәеи аибашьра аинвалидцәеи русқәа рзы апарламенттә Еилакы инарҭбаау аилатәара аҿы, ҳәа адырра ҟанаҵоит Жәлар Реизара-Апарламент аофициалтә саит.

Аилатәара рхы аладырхәит атәыла агәабзиарахьчара аминистр Едуард Быҭәбеи ареспублика асанитартә ҳақьым хада Алла Белиаевеи.

Адепутатцәа хазы-хазы статиацыԥхьаӡа азакәан апроект иахәаԥшит.

Аҟәа. Ԥхынҷкәынмза 16, 2023 шықәса. Аԥсныпресс. Аԥсны Гагра араиони Шәача ақалақьи аиҩызареи аусеицуреи рзы аиқәшаҳаҭра рыбжьарҵеит. Аусшәҟәы анапаҵыҩра мҩаԥысит ԥхынҷкәынмза 15 рзы. Уи рнапы аҵарҩит  Асҭан Агрбеи Виктор Филонови,  ҳәа адырра ҟанаҵоит «Кубань Информ». 

Уаанӡа адепутатцәа Иури Немцеви Дауҭ Ақаҩбеи аиқәшаҳаҭра апроект азааҵаҩра мҩаԥыргеит.

Аҩқалақьк рыбжьара макьана аофициалтә еизыҟазаашьақәа шьақәыргыламызт. Рнапы зҵарҩыз аиқәшаҳаҭра иабзоураны адоуҳатәи акультуратәи мазара шьаҭас измоу аиашьаратә еизыҟазаашьақәа рыҿиара иацхраауеит, иара убас Гагра араиони Шәачеи рыбжьара аусеиура арҿиоит.

«Аиқәшаҳаҭа анапаҵыҩра ҳпарламентқәа рыбжьара аизыҟазаашьақәа иҿыцу рдаҟьа аанартуеит. Агәра ганы сыҟоуп, уи аҩганктәи аимадарақәа рзы алшарақәа рҳәаақәа дырҭбаауеит. Уи, адепутатцәа рзакәанԥҵаратә усураҿы аҩ-парламентк рхаҭарнакратә усбарҭақәа рҿы иаԥырҵаз иреиӷьу рхархәаразы алшарақәа рзаатуеит ауп иаанаго», – ҳәа иазгәеиҭеит Виктор Филонов.

Асҭан Агарба аиқәшаҳаҭра анапаҵыҩра ихаҭоу хҭысуп ҳәа иазгәеиҭеит.

Аҟәа. Ԥхынҷкәынмза 16, 2023 шықәса. Аԥсныпресс.  Ԥхынҷкәынмза 15 рзы Михаил Чачба ихьӡ зху гәдоуҭатәи ахәыҷтәы-қәыԥштә спорттә школ аҿы иалагеит жәларбжьаратәи акласс аспорт азҟаза, Асовет Еидгылеи Европеи рчемпион, аорденқәа Ахьӡ-Аԥша» II, III аҩаӡарақәа ркавалер Рашь Ҳабыгә-иԥа Хәытаба ихраҿа агаразы зхы иақәиҭу аиқәԥаразы Жәларбжьаратәи атурнир.

Атурнир рхы аладырхәуеит Аԥсны зегьы еиԥш Урыстәыла  – Адыгеиа, Даӷьсҭани Шәача ақалақьи  рҟынтәи 100 -ҩык инареиҳаны  аспортсменцәа.

Атурнир аартра иадҳәалоу аныҳәатә церемониа аҿы алахәцәеи асасцәеи бзиала шәаабеит ҳәа раҳәо иқәгылеит Аҳәынҭқарра Ахада иабжьгаҩ  Ахра Ашәба, аԥыза-министр актәи ихаҭыԥуаҩ Џьансыхә Нанба, аҿари аспорти русқәа рзы аҳәынҭқарратә Еилакы ахантәаҩы ихаҭыԥуаҩцәа Роман Ҵкәуеи Рашь Хәытабеи.

Сасцәаны атурнир иаҭааит Урыстәыла зҽаԥсазтәыз азыҟаҵаҩ, Урыстәыла ачемпион, Али Алиев ихьӡ зху зхы иақәиҭу аиқәԥаразы жәларбжьаратәи атурнир хәынттәи аиааирагаҩы Виктор Козлиаков, Асовет Еидгыла аспорт азҟаза, Асовет Еидгыла зхы иақәиҭу аиқәԥаразы ачемпион Зураб Цоцориа, Асовет Еидгыла аспорт азҟаза Џьемал Гәыбаз, Аолимпиатәи ахәмаррақәа рҿы аџьазтә медал згахьоу Денис Царгәыш иаб – Игорь Царгәыш.

Аицлабрақәа 2007-2008, 2009-2010шш.рзы ииз аспортсменцәа рыбжьара имҩаԥысуеит. Атурнир хыркәшахоит ԥхынҷкәынмза 16 рзы.

Атурнир аӡбаҩ хада – жәларбжьаратәи акатегориа змоу аӡбаҩ Виачеслав Багаев.

Аҟәа. Ԥхынҷкәынмза 16, 2023 шықәса. Аԥсныпресс. Ԥхынҷкәынмза 16 рзы Аҟәа ақалақь аҿы иаатит ашахматқәа рзы Ареспублика Аԥсны   ачемпионат. Ахәмаррақәа мҩаԥысуеит Анатоли Карпов ихьӡ зху ашахматқәа рышкол аҿы.

Ачемпионат аҳәаақәа ирҭагӡаны имҩаԥгахоит х-турнирк: атурнир МД 9 (2014 шықәсазы иизи урҭ иреиҵбууи аспортсменцәа рыбжьара), атурнир МД 12 (2011 шықәсазы иизи урҭ иреиҵбууи аспортсменцәа рыбжьара), иара убас атурнир А (ихадоу).

Аҟәа. Ԥхынҷкәынмза 16, 2023 шықәса. Аԥсныпресс. Ааигәатәи Мрагылара атәылақәа рахь иусуратә ҭаарақәа аҳәаақәа ирҭагӡаны, Аԥсны адәныҟатәи аусқәа рминистр Инал Арӡынба  Ливан даҭааит. Абри атәы аанацҳауеит Аԥсны адныҟаполитикатә  Хылаԥшырҭа апресс-маҵзура.

Беирут ақалақь аҿы Аԥсны адәныҟатәи аусқәа рминистри Ливан иҟоу Урыстәыла ацҳаражәҳәаҩ Алеқсандр Рудакови реиԥылара мҩаԥысит. Инал Арӡынбеи Алеқсандр Рудакови Аԥсни Ливани еиуеиԥшым ахырхарҭақәа рыла русеицуразы актуалра злоу азҵаарақәа жәпакы ирылацәажәеит.

Аҟәа. Ԥхынҷкәынмза 15, 2023 шықәса. Аԥсныпресс. Абоксиор Харитон Агрба атурнир «IBA  ачемпионцәа рыҵх» аҳәаақәа ирҭагӡаны Казахсҭантәи аспортсмен  адунеи ачемпион-2023, Азиа -2023 ачемпион  Дулат Бекбауов дииааит.  Атурнир мҩаԥысит ԥхынҷкәынмза 15 рзы Асҭана ақалақь аҿы.

Аиндаҭлара аа-раундк рыла ишьақәгылан. Уи аӡбаҩцәа еиҟәшоу рыӡбарала, асчиот 2:1 ҳәа Харитон Агрба ииааирала ихыркәшахеит.  

Харитон Агрба икариера аҿы 13 иааира игахьеит, зныкгьы даҵамхаӡацт.