Аҟәа. Цәыббрамза 20, 2024 шықәса. Аԥсныпресс. Аԥсни Урыстәылеи ирыбжьарҵаз аидгылареи астратегиатә еиҩызареи рзы Аиқәшаҳаҭра апунктқәа зегьы рынагӡара аамҭа ааит, ҳәа Аԥсуа телехәаԥшра инарҭбаау аинтервиу аҭо иҳәеит Аҳәынҭқарра Ахада Аслан Бжьаниа.
Аҳәынҭқарра Ахада 2014 шықәсазы знапаҵаҩра мҩаԥгаз Аиқәшаҳаҭра Аԥсни Урыстәылеи ринтересқәа ирықәшәоит, ареспубликазы иара шәарҭара аҵам ҳәа инаҵшьны иазгәеиҭеит.
«Абҵарамза, 2014 шықәса рзы знапаҵаҩра мҩаԥгаз аиқәшаҳаҭра аҿы абас иҳәоуп. Сара аиқәшаҳаҭра апунтқәак аазгоит. Аиқәшаҳаҭра апункт хԥа иаҳәоит: «Аидгылареи астратегиатә еиҩызареи рыҿиара ихадоу хырхарҭаны иҟоуп: акоординациа зызу адәныҟатәи аполитика амҩаԥгара; атәылахьчареи ашәарҭадареи рзы азеиԥш ҵакыра аԥҵара; азеиԥш економикатәии асоциалтәии аҵакыра ашьақәыргылара. Ас еиԥш иҟоу апунктқәа уаанӡа аиқәшаҳаҭрақәа рҿы иҟаӡамызт. Сара сгәаанагарала, ари аиқәшаҳаҭра Аԥсни Урыстәылеи ринтересқәа ирықәшәоит», – ҳәа иҳәеит Аслан Бжьаниа.
Иара еиуеиԥшым амзысқәеи аҭагылазаашьақәеи ирыхҟьаны Аԥсуа ган ашықәсқәа рыҩныҵҟа зынагӡара иацәхьаҵуаз ари аиқәшаҳаҭра апунктқәа рынагӡара аамҭа ааит ҳәа инаҵшьны иазгәеиҭеит.
«Ара ҵыхәаԥҵәарада ас еиԥш ахымҩаԥгашьа залыршахом. Ҳара ҳхьыԥшымра азхазҵаз аҳәынҭқарра заҵәык, Еиду Амилаҭқәа Реиҿкаара Ашәарҭадара Ахеилак алахәылас иҟоу, уаҳа зда ҳамам ҳастратегиатә партниорс иҟоу Урыстәыла ауп. Сара азҵаарақәа сызцәырҵуеит, ианбеижьҭеи, насгьы ҵаҵӷәыс иҳамоузеи ҳара Урыстәыла анапхгара аганахьала агәрамгара ааҳарԥшуа ҳалагара? Ианбаҟалеи уи аҩыза ҳара ҳабжьара, хыҵхырҭас иаиузеи? Иарбан факту уи зыхҟьаз? Сара уи азы ҵаҵӷәы сымам (Сара Урыстәыла агәрамгаразы ҵаҵӷәы сымам – аред. АП азгәаҭа). Иреиҳаӡоу аҳәынҭқарратә маҵзуратә чын змоу, ҳажәлар рыхьӡала иқәгыло ауаҩы иаҳасабала, жәаҳәарада, иарбоу аиқәшаҳаҭра апунктқәа зегьи урҭ ирхырҿиаауа аԥҟарақәеи рынагӡара сҽазышәалоит. Избан ҳәа шәҵаауазар? Избан акәзар, уи раԥхьа иргыланы, Аԥсны жәлар ринтересқәа ирықәшәоит азы», – ҳәа инаҵшьны иазгәеиҭеит Аслан Бжьаниа.
Урыстәыла Ахада Иусбарҭа анапхгаҩы ихаҭыԥуаҩ Дмитри Козак иҿы аилатәара апкаанҵа дазааҭгыло, Аслан Бжьаниа иҳәеит:
«Сара исҭахымызт, аиҩызаратә акәзаргьы, егьи аҳәынҭқарра аусшәҟәқәа рылацәажәара. Шәара, ижәдыруазар акәхап Урыстәылатәи Афедерациа аҟынтәи ишааз аусшәҟәы. Уи ишарбоу ала, аԥсуа ган ҳхахьы иаҳгаз аҭакԥхықәрақәа рынамыгӡара иалкаау санкциақәак рымҩаԥгара цәырнагар алшоит ҳәа ауп. Ахәҭакахьала ишеилкаахаз ала, Урыстәыла, цәыббрамза 1 инаркны Аԥсны афинанстә цхыраара ахәҭак ааннакылеит. Иҟоу адыррақәа рыла, ашәатәқәа раанкылара иаҵанакит арҵаҩцәа, аҳақьымцәа, амчратә структурақәа русзуҩцәеи егьырҭ акатегориақәеи. Аилатәара апкаанҵа инақәыршәаны, Урыстәыла акоммерциатә еиҭамҵуа амазара аџьармыкьа аҿы урыстәылатәи аинвесторцәа рзы аԥкрақәа раԥыхра, наҟ-ааҟтәи аӡбаратәи арбитражтәи азыӡбақәа разхаҵара азы аиқәшаҳаҭра ашьақәырӷәӷәара, иара убас урыстәылатәи аиуристтә хаҿқәа рыла Аԥсны аинвестициатә проектқәа рынагӡара азы аҽадцалара аарԥшуа азҵаарақәа ықәныргылоит. Ас еиԥш афакт аҭыԥ амоуп. Убри аҟнытә уажәы Аԥсны анапхгара зегьы – Аҳәынҭқарра Ахада, атәыла Анапхгара, Жәлар Реизара-Апарламент адепутатцәа – иарбоу азҵаара аҭышәынтәалара рҽазыршәароуп. Уи аҵакы апкаанҵақәа рылацәажәара аасҭа акырӡа еиҳауп», – ҳәа инаҵшьны иҳәеит Аслан Бжьаниа.
