Аҟәа. Абҵарамза 19, 2022 шықәса. Аԥсныпресс.   Абҵарамза 18, 2022 шықәса рзы апрокуратура Хада аусеилыргара Аусбарҭа «Аԥснытәи аихамҩа» аенергетикатә еимадаратә хәҭа абригада аиҳабы Ҳарания Р.И. иганахьала ауаҩы иԥсҭазаара алҵра зыхҟьаз аџьа ахылаԥшра аԥҟарақәа реилагара (АА АЗ ахәҭаҷ 140 ахәҭа 2) афакт ала аусеилыргара хацнаркит.

Ашьаусеилыргара аматериалқәа рыла ишышьақәыргылахаз ала, мшаԥымза 27, 2022 шықәса, 11:00 сааҭ инаркны 13 сааҭи 20 минуҭи рҟынӡа Ареспубликатә Унитартә Наплакы «Аԥснытәи аихамҩа» аенергетикатә еимадаратә хәҭа (ЭЧК) абригада аиҳабы Ҳараниа Р.И., аҭакԥхықәра зду аплантә усурақәа рнапхгаҩи рынагӡаҩи иаҳасабала,  афымцаеибыҭаҩцәа рыбригада - Возба Гари  Акаки-иԥеи Царгәыш Алхас Виктор-иԥеи ицны Аҟәа араион Аладатәи Ешыра ақыҭан иҟоу атоннель №16 аҿы аимадаратә каҭа агәаҭареи «Афон Ҿыц-Ешыра» акацар аҿы афымцарахәыцқәа рыԥсахреи мҩаԥыргон. Аиҭашьақәыргыларатә усурақәа рзы рхы иадырхәон амотокәырҷыжь АГВ №810 аплатформа.  

Ҳараниа Р.И., абригада анапхгаҩы иаҳасабала, аџьа ахылаԥшра азы аԥҟарақәа рынагӡара азы аҭакԥхықәра идын.

Ҳараниа Р.И., аџьа ахылаԥшреи аусуразы ишәарҭадоу аҭагылазаашьақәа раԥҵареи рзы идҵаз аҭакԥхықәра ишахәҭоу ала анамыгӡара азы ахарадҵа идуп.  

Аҟәа. Абҵарамза 19, 2022 шықәса. Аԥсныпресс.  Апрокуратура Хада аусеилыргаратә усбарҭа  арепатриациа ԥыхьатәи аминистр Б.А. Дбар, Зҭакԥхықәра Ҳәаақәҵоу Аилазаара «РемСтрой2012» адиректор  Лакербая А.Г., арепатриациа Афонд атехникатә хылаԥшра анџьныр Ақаҩба  Д.Р. рганахьала (Гәылрыԥшь араион, Маҷара ақыҭа, Далтәи амҩа) ала иҟоу  Акоттедџьтә еиланхарҭа аҿы аргыларатә усурақәа рымҩаԥгараан анапхыцәгьара аҳасабала зеицҵалыҵ 34 257 360  мааҭ рҟынӡа инаӡо аԥаратә хархәагақәа рымпыҵакра азы ихацыркыз аусеилыргара амҩаԥгараан амазара аимҵәара иадҳәалоу иҿыцу афактқәа хәба аанарԥшит.

Уи аԥхьа Дбар Б.А., Лакербаиа А.Г., Ақаҩба Д.Р.  анапхыцәгьара аҳасабала Аԥсны арепатриациа  Афонд амазара аимҵәара азы ахара рыдҵан, ахәҭакахьала, «Гәылрыԥшь араион Маҷара ақыҭа  иҟоу Акоттедџьтә еиланхарҭа адәахьтәи аӡымҩангагақәеи ацрыӡмҩангагақәеи рышьақәыргылара» азы анардкыларатә еиқәшаҳаҭра ала иртәыртәыз аԥаратә хархәагақәа реицҵалыҵ 25 296 598 рҟынӡа инаӡон.

Аԥсны апрокуратура Хада асаит иҟанаҵо адыррақәа рыла, арепатриациа ԥыхьатәи аминистр Беслан Дбар, Ареспубликатә унитартә наплакы «Анхарҭа-хархәаратә Усбарҭа» адиректор Ахба З.В., Зҭакԥхықәра Ҳәаақәҵоу Аилазаара «РемСтрой2012» Лакербаиа А.Г., арепатриациа Афонд атехникатә хылаԥшра анџьныр Ақаҩба   Д.Р.  заанаҵтәи ацәыҵеицәажәара ала ԥхынҷкәынмза, 2017 шықәса инаркны ԥхынҷкәынмза, 2019 шықәсанӡа, Гәылрыԥшь араион, Маҷара ақыҭа, Далтәи амҩа ала иҟоу Акоттедџьтә еиланхарҭа аҿы игылоу аҩнқәа №7, 8, 9 аҿы аргыларатә усурақәа рымҩаԥгара иалагӡаны иртәыртәит 19 961 973 мааҭ.

Иара убас Дбар Б.А., Лакербаиа А.Г., Ақаҩба Д.Р.  хәажәкырамза, 2018 шықәса инаркны ԥхынҷкәынмза,  2019 шықәсанӡа аобиект «Акоттедџьтә комплекс иаҵанакуа аҩны №6»    ала иртәыртәит 9 017 395 мааҭ.

Аҟәа. Абҵарамза 19, 2022 шықәса. Аԥсныпресс. Арежиссиор Дмитри Статеинов Анемец фашистцәа рконцлагерқәа рҿы иҭакыз Аԥснытәи аруааи урҭ рҭынхацәеи рыԥшаара  иаҿу аԥснытәи акурсантцәа русура иазкны иҭихыз  адокументалтә фильм «Поиск» аԥхьарбара урыстәылатәи ателеканал  Russia Today аҿы имҩаԥысит. 

«Аԥхьарбара ахәашаҽны имҩаԥысит. Асабша, амш иалагӡаны, уи ахәаԥшцәа ԥшьынтә иддырбеит. Афильм праим-таим иақәшәеит. Ҳара ас еиԥш алҵшәа акыр гәахәарыла иҳадаҳкылоит», - ҳәа иҳәеит  Дмитри Статеинов.

Афильм авторцәа Аԥсны аԥыза-министр ихаҭыԥуаҩ Сергеи Пустовалови Аԥсны атәылахьчара Аминистрреи афильм урыстәылатәи ателехәаԥшра аҿы арбара алыршара аҿы иҟарҵаз ацхыраара азы  иҭабуп рҳәоит.

Рашәарамза, 2022 шықәса рзы афильм «Поиск» аԥхьарбара мҩаԥысит афедералтә телеканал  НТВ аефир аҿы имҩаԥысит.

Аҟәа. Абҵарамза 19, 2022 шықәса. Аԥсныпресс /Алексеи Шамба/. Абҵарамза 18 рзы Р. Гәымба ихьӡ зху Аԥснытәи аҳәынҭқарратә филармониа аҿы имҩаԥысит еицырдыруа апианинорҳәаҩы,  П. И. Чаиковски ихьӡ зху XV Жәларбжьаратәи аконкурс аҿы аиаара згаз Дмитри Маслеев исолотә концерт мҩаԥысит.

Аконцерт амҩаԥгаҩ, амузыкадырҩы Есма Џьениа Урыстәылатәи Афедерациа акультура аминистр Ольга Лиубимова иаалышьҭыз адныҳәаларатә цҳамҭа даԥхьеит. Уаҟа, ахәҭакахьала иазгәаҭоуп:

«Урыстәылеи Аԥсни ҭоурыхла ишьақәгылахьоу акультуратә партниорра рыбжьоуп, урҭ аизыҟазаашьақәа аҳаҭырқәҵареи иаҳзеиԥшу аҭынха акультуратә традициақәа реиқәырхара ала ишьаҭаркуп. Агәра ганы сыҟоуп, ҳаԥхьаҟа ҳажәларқәа ирыбжьоу аимабзиаратә еизыҟазаашьақәа рыҿиареи рырӷәӷәареи иацхраауа акультуратә еимадара ишацҵахо».  

Аконцерт х-ҟәшак рыла ишьақәгылан. Актәи аҟәша аҿы апианинорҳәаҩы Бетховен исонатақәа ҩба – №8 ("Патетическая") и №7 ("Буря") наигӡеит.  Амузыкант акомпозитор дуӡӡа ирҿиамҭақәа ирыҵоу аҵакы, аенергиа, аритм зеиӷьаҟам ала аарԥшра илиршеит.

Аҟәа. Абҵарамза 18, 2022 шықәса. Аԥсныпресс. Аҳәынҭқарра Ахада Аслан Бжьаниа иҟаиҵаз адҵа инақәыршәаны, апрокурор хада актәи ихаҭыԥуаҩ Дамир Кәыҵниа азинхьчаратә усбарҭақәа рнапхгаҩцәа алархәны инарҭбаау аилатәара мҩаԥигеит.

Аилатәара аҿы абҵарамза 16 рзы ауаажәларратә Еиҿкаара «Аԥсуа жәлар реиҿкаара» ахантәаҩы Адгәыр Арӡынбеи Жәлар Реизара-Апарламент ԥыхьатәи адепутат Гарри Кокаиеи Аԥсны амассатә информациа ахархәагақәа русзуҩцәа Рассоциациа (АРСМИРА) аҿы имҩаԥыргаз апресс-конференциа аҿы ицәырыргаз аусшәҟәқәа рыхкьыԥхьлақәа рыҵабыргра аилкаара иазкны еицымҩаԥгахо  аусмҩаԥгатәқәа ралкаара мҩаԥысит.   

Иарбоу ауаа зыдгалара мҩаԥыргаз аусшәҟәқәа –ахарџьырҵа ахкьыԥхьла инақәыршәаны, звольҳараку афымцацәаҳәа «Аҽгәара» шьаҭанкыла аиҭашьақәыргылара азы иаахәаз ихымԥадатәиу амаҭәахә ахәԥса ирмыцхәны еизырҳаны иарбан.

Иарбоу агәаҭара амҩаԥысшьа азы иназыцҵоу аинформациа ҟалоит, ҳәа адырра ҟанаҵоит Аԥсны апрокуратура Хада аофициалтә саит.

Аҟәа. Абҵарамза 18, 2022 шықәса. Аԥсныпресс. Аԥсны акультура аминистр Даур Ақаҩба Аҟәа араион Ешыра ақыҭан  амонументалтә ҟазара азы Акомиссиа анҭыҵтәи аусуратә еилатәара мҩаԥигеит. Уи 1992-1993 шш. Аԥсны жәлар рџьынџьтәылатәи еибашьра аҿы иҭахаз Ешыра ақыҭа иалҵыз аибашьцәа-фырхацәа рмемориалтә Комплекс аргылареи уи иахьаҵанакуа аиқәыршәазаара амҩаԥгареи  ирыдҳәалоу азҵаарақәа ирызкын.  

Аҟәа. Абҵарамза 18, 2022 шықәса.  Аԥсныпресс.  Аҟәа ақалақь Апрокуратура атәылауаҩ Владимир Ефрем-иԥа Акопиан иганахьала Аԥсны Аҳәынҭқарра Ашьаустә Закәанеидкыла ахәҭаҷ  320  ахәҭа 1 инақәыршәаны, аусеилыргара хацнаркит.

Аԥсны апрокуратура Хада асаит иҟанаҵо адыррақәа рыла, абҵарамза 15, 12 сааҭи 30 минуҭи рзы, Аҟәа ақалақь, Акырҭаа имҩа, аҩны №26 азааигәара, Владимир Акопиан апрофилактикатә реидтә усмҩаԥгатәқәа ирылахәыз Амҩа-ԥыԥшырҭатә Маҵзура арота аинспектор, амилициа алеитенант  еиҳабы Гәыниа А.Р иҟаиҵаз азакәантә дҵа дазымӡырҩӡеит, уимоу дагьиҿасит. Гәыниа А.Р Ареспубликатә хәышәтәырҭа ахь днаган, араҟа уи аҳақьымцәа дангәарҭа ашьҭахь изықәдыргылеит адиагноз – иарку аԥынҵаҭаԥҵәара.

Аҟәа. Абҵарамза 18, 2022 шықәса. Аԥсныпресс. Аԥыза-министр актәи ихаҭыԥуаҩ, ақыҭанхамҩа аминистр Беслан Џьопуа Аԥсны иҟоу Урыстәылатәи Афедерациа ахәаахәҭратә Хаҭарнак Залина Кобесова дылԥылеит. Аиԥылара аҿы ирылацәажәеит ҳтәылақәа рыбжьара ақыҭанхамҩатә аалыҵ ахәаахәҭратә еикәыршара аизырҳара аҳасабала ахәаахәҭра-економикатә еимадарақәа рырҿиара азҵаарақәа ирылацәажәеит, ҳәа адырра ҟанаҵоит аминистрцәа Реилазаара аофициалтә саит.

Беслан Џьопуа ацитрустә шәырқәеи ацхеи ареспублика иалганы урыстәылатәи аџьармыкьа ахь ацәыргара еиԥш иҟоу ақыҭанхамҩатә аалыҵ аекспорт аҿиара хадара злоу егьырҭ ахырхарҭақәа аликааит.

Аҟәа. Абҵарамза 18, 2022 шықәса. Аԥсныпресс. Аԥыза-министр Алеқсандр Анқәаб Аԥсны аҳәынҭқарратә шәарҭадаразы Амаҵзура  Аҳәаахьчаратә отриад анапхгараҭареи хаҭалатәи аилазаареи аветеранцәеи Аҳәаахьчаратә отриад аԥҵара Амш 30- мшы ахыҵра рыдиныҳәалеит.

«Аҳәынҭқарратә ҳәаа ахьчара азы амчқәа раԥҵара азы аӡбамҭа акыр иуадаҩыз аамҭа –1992-1993шш. Аԥсны жәлар рџьынџьтәылатәи еибашьра анцоз ирыдыркылеит. 

Аҳәаахьчаратә маҵзура хадара злоу аусхкы аҿы иаку аҳәынҭқарратә политика назыгӡо  атәыла ашәарҭадара аиқәыршәара иазку асистема иаҵанакуеит.

Раԥхьа игылоу ахыдҵақәа рыӡбаразы ирыду аҭакԥхықәра еилкааны, аԥснытәи аҳәаахьчаҩцәа есымша ламысцқьала рмаҵуратә уалԥшьа нарыгӡон. Убас акәын ишыҟазгьы иуадаҩыз аибашьра ашьҭахьтәи ашықәсқәа раан. Усҟан Гал араион аҿы лассы-ласы Аҳәынҭқарратә ҳәаа ахьчаразы абжьааԥны аҳәаахьчаҩцәа рыԥсҭазаара акыр ашәарҭара иҭазыргылоз иҷыдоу аҭагылазаашьақәа шьақәгылон. Агәра ганы сыҟоуп ҳаԥхьаҟагьы аҳәаахьчаҩцәа ишахәҭоу ала руалԥшьа шынарыгӡало.

Аҟәа. Абҵарамза 18, 2022 шықәса. Аԥсныпресс.  Аԥсны аҳәынҭқарратә шәарҭадара Амаҵзура Аҳәаахьчаратә Усбарҭа аԥҵара Амш 30-шықәса ахыҵра азгәарҭоит.

Аԥсны аҳәаахьчаратә архәҭақәа Аԥсны Адҵаҟаҵаҩ Хада Владислав Арӡынба иҭижьыз Аусԥҟа ала иаԥҵахеит абҵарамза 20, 1992 шықәса рзы.  Зеилазаара 120-ҩык асолдаҭцәеи 30-ҩык офицарцәеи рыла ишьақәгылаз аотриад Ԥсоу аӡиас ала инагоу Аҳәынҭқарратә ҳәаа ахьчара рыдҵан.  

Аҳәаахьчаратә Усбарҭа аԥҵара амш 30- шықәса ахыҵра иубилеитә рыцхә азгәаҭара иазку аныҳәатә усмҩаԥгатә Ахьӡ-Аԥша апарк аҿы афырхацәа Рмемориал амҵан ашәҭ шьыҵәрақәа рышьҭаҵарала иалагеит. Уи рхы аладырхәит Аԥсны аҳәынҭқарратә шәарҭадара Амаҵзура ахантәаҩы Роберт Киут, Аԥсны аҳәынҭқарратә шәарҭадара Амаҵзура ахантәаҩы ихаҭыԥуаҩ, Аҳәаахьчаратә отриад анапхгаҩы Рустам Латипов, аҳәаахьчаратә маҵзура аветеранцәа, аҳәынҭқарратә шәарҭадара Амаҵзура аусзуҩцәа.  

Анаҩс аҳәаахьчаратә отриад аныҳәатә цәаҳәақәгылара мҩаԥысит. Аусмҩаԥгатә ихы алаирхәит Аԥсны Адҵаҟаҵаҩ Хада, Аҳәынҭқарра Ахада Аслан Бжьаниа.

Аныҳәатә усмҩаԥгатә иацҵахеит В. Г. Арӡынба ихьӡ зху рратә Ахьӡ-Аԥша амузеи аизарақәа рзал аҿы. Араҟа аныҳәа инамаданы аекспозициа аартын.