Аҟәа. Цәыббрамза 20, 2023 шықәса. Аԥсныпресс. 200-ҩык инареиҳаны ԥсшьараҳәа Нальчик ақалақь аҟынтәи Аԥсныҟа амҩа иқәлеит. Уи, 1992 – 1993 шш. Аԥсны жәлар Рџьынџьтәылатәи еибашьраан хатәгәаԥхарала еибашьуаз, иҭахаз рҭаацәа роуп. Дара иара убас рыуацәа анышә иахьамадоу аҭыԥқәа ирҭаауеит, Аԥсны Аиааира Амш 30-шықәса ахыҵра иазку аныҳәатә усмҩаԥгатәқәа рхы рыладырхәуеит.
Нальчик ақалақь аҿы иҟоу Аԥсны аплошьад аҿы еизеит аԥснытәи хатәгәаԥхарауаа рыуацәа, анапхгареи ауаажәларратә еиҿаарақәеи рхаҭарнакцәа. Урҭ 1992 – 1993 шш. рзы бџьаршьҭыхлатәи аиҿагылараан аиашьаратә республика ахақәиҭра иазықәԥоз ргәалашәаразы иргылоу абаҟа амҵан ашәҭ шьыҵәрақәа шьҭарҵеит, амитинг мҩаԥыргеит, ҳәа адырра ҟанаҵоит «Вести Кабардино-Балкарии».
Усҟан Ҟабарда-Балкариантәи Аԥсны ахьчаразы 59-ҩык ҭахеит.
Кенже ақалақь аҟынтәи Мадина Гучева лашьа 1992 шықәсазы аԥсуа-қырҭуатә еибашьраҿы дҭахеит. Иҭаацәа шықәсык еиҳаны Мураҭ иԥсыбаҩ аԥшаара иаҿын. Аҵыхәтәаны урҭ ирылшеит иԥсыбаҩ ԥшааны иԥсадгьыл аҿы анышә амадара.
Мадина Гучева, егьырҭ аӡәырҩы реиԥш, ареспублика анапхгара ааԥхьарала Аԥсныҟа даауеит.
