Аҟәа. Цәыббрамза 20, 2023 шықәса. Аԥсныпресс. Цәыббрамза 22 – 24 рзы Аҟәа ақалақь аҿы самбо азы XX Жәларбжьаратәи аицлабрақәа «Аиааира Ахраҿа» мҩаԥгахоит, ҳәа адырра ҟанаҵоит аҿари аспорти русқәа рзы аҳәынҭқарратә Еилакы.
Жәларбжьаратәи атурнир аибашьцәа-аинтернационалистцәеи 1992-1993 шш. Аԥсны жәлар Рџьынџьтәылатәи еибашьра аҿы Аиааира агара 30-шықәса аҵреи иазкуп. Аицлабрақәа мҩаԥгахоит Сергеи Багаԥшь ихьӡ зху аспорт Ахан аҿы.
Аицлабрақәа рхы аладырхәуеит 2008-2010, 2011-2012, 2013-2014 шықәсқәа рзы ииз арԥарцәеи 2008-2010, 2011-2013 шықәсқәа рзы ииз аҭыԥҳацәеи.
Атурнир аныҳәатә аартра мҩаԥгахоит цәыббрамза 22, асааҭ 11:00 рзы.
Аусмҩаԥгатә аиҿкааҩцәа – Аԥсны аҿари аспорти русқәа рзы аҳәынҭқарратә Еилакы, Аҟәа ақалақь Ахадара аҿари аспорти русқәа рзы Аилаки Аԥсны самбо азы Афедерациеи.
