Аҟәа. Цәыббрамза 20, 2023 шықәса. Аԥсныпресс. Адыгеиа, Ҟарачы-Черқьессиа, Ҟабарда-Балкариа, Чечентәи Ареспублика, Аахыҵ Уаԥстәылеи Нхыҵ Уаԥстәылеи рҟынтәи 1992 – 1993 шш. Аԥсны жәлар Рџьынџьтәылатәи еибашьра иалахәыз, иара убас урҭ рҭаацәеи аԥсшьареи Аԥсны Аиааира агареи ахьыԥшымреи инарымаданы аныҳәатә усмҩаԥгатәқәа рылахәхареи рзы Аԥсныҟа иаараны иҟоуп.
Нхыҵ-Кавказынтәи хатәгәаԥхарала еибышьуаз рымадара азҵаарақәа рзы Аԥсны Аҳәынҭқарра Ахада иабжьгаҩ Рисмаг Аџьынџьал Аԥсныпресс акорреспондент диҿцәажәо, Нхыҵ Кавказтәи ареспублика аҟынтәи 850-ҩык рҟынӡа асасцәа Аԥсны Аиааира агареи ахьыԥшымреи инарымаданы аныҳәатә усмҩаԥгатәқәа рылахәхара азы Аԥсныҟа иаараны иҟоуп ҳәа иазгәеиҭеит.
«Аиҳараҩык аахьеит. Иҟоуп амҩа иқәугьы, зынӡа иааизакны ҳара 850-ҩык раара ҳазыԥшуп. Асасцәа нырхахоит Аҟәа ақалақь – асасааирҭа «Аԥсынтәыла» (ԥыхьатәи асанатори МВО), иара убас акурорт Пицунда аҿы», - ҳәа иҳәеит Рисмаг Аџьынџьал.
Уи иара убас Аиааира Амш азгәаҭара иазку аныҳәатә усмҩаԥгатәқәа аурыс хатәгәаԥхарауааи аказакцәеи рхы аладырхәуеит ҳәа иҳәеит.
